Ibrani 10 - Muna Southern Dialect

Kapopanga sumangka 10:1-18

¹ Weo Kitabino anabii Musa notiwoha dandahano sabhaha metaaꞌano so humatono te wise, tamaka suanoꞌo kasalamati mpuuno. Dadiꞌanomo noangka ne kapopanga nefendu-fendua setaꞌu-setaꞌu, tubhono agama Yahudi pae bhe kapoolia namosangka totono lalondo mie maino sumambaheano maitu.

² Kapaꞌamo ane ibahano naembali, ingka tantumo dametumpumo daefoampe kapopanga. So kafetumpuꞌando hampano paemo danumamisi wutondo dokodhosa mbaꞌinomo ingka padamo dofekangkiloda sepaku ampa suhue dhamani.

³ Tamaka hampano bhe kapopanga amaitu, setaꞌu-setaꞌu manusia dofeꞌulaianda dhosando.

⁴ Kapaꞌamo heano sapi bhe heano membe ingka pae bhe kapoolia naetolosi dhosa.

⁵ Kanandooꞌanomo wakuutuno Kristus nopesua ne dhunia ini, nopugaumo ⸤ ne Lahataꞌala⸥ , “Hintu miina moindaloe kafoampe bhe kapopanga nesumbele, tamaka padamo mefotoka kanau mbadhaku.

⁶ Kapopanga netunu bhe kapopanga so katolosino dhosa, miina moꞌiaꞌanea.

⁷ Maka ambaku, ‘Ainiꞌa kanau, o Lahataꞌala! Weo kaluluno Kitabi bhe tibuhino nopulaoꞌao Idi. Kahatoꞌaku ini so adhumalangiꞌao kapoindalomu.’ ”

⁸ Saꞌituini nopugau ambano, “Kapopanga nesumbele, kafoampe, kapopanga netunu, bhe kapopanga so katolosino dhosa miina moindaloea, miina dua moꞌiaꞌanea.” Gahaꞌaitumo sabhaha kapopanga naꞌa ingka dofoampee doangkafi tubhono agama Yahudi.

⁹ Pada aitu ambano toha, “Ainiꞌa kanau, o Lahataꞌala! Kahatoꞌaku ini so adhumalangiꞌao kapoindalomu.” Dadiꞌanomo Lahataꞌala nofosali sabhaha kapopanga ngkodau maka nololiane kapopangano Kristus.

¹⁰ Hampanomo kapoindalono Lahataꞌala nedhalangino Kristus naꞌa, intaodi dofekangkilo kaitaomu maiꞌao ne sabhaha dhosa, noangka ne kapopangano wutono Yesus Kristus, sepaku kaowu ampa suhue dhamani.

¹¹ Seemie-seemie imamuno agama Yahudi nodhalangi takano seꞌo-seꞌoleo bhe tanofendu-fenduamo nefoampe kapopanga. Tamaka kapopanga naꞌa pae bhe kapoolia naetolosi dhosa.

¹² Tamaka Imamu seemieno maitu nefoampe kapopanga sehonda kaowu mbali katolosino dhosa, nolaku ampa suhue dhamani. Palusi anaꞌa nengkohamo ne suanano Lahataꞌala.

¹³ Ampa aitu tanoanta-antagimo tempono sabhaha kaewano nahumabuda Lahataꞌala so kafindaꞌano.

¹⁴ Kapaꞌamo noangka ne kapopanga sehondano maitu, mie nefekangkilo maiꞌao ne dhosando nofosangkadamo ampa suhue dhamani.

¹⁵ Pokaiꞌano bhe aini, Rohino Lahataꞌala nosakusiiane dua ne intaodiomu. Kabhao-bhaono Rohino Lahataꞌala nokobhoasao,

¹⁶ “Ainiꞌaemo podhandiꞌa so nehabuku bhe miendo Israel we oleo mbuhumai, bhoasaono Ompu: pahintaku atumeiꞌe weo fekihindo, tubhoku abuhie weo totono lalondo.”

¹⁷ Pada anaꞌa nokobhoasaomo dua, “Sabhaha dhosa bhe podiu modaindo paemo ameꞌu-meꞌulaiꞌea.”

¹⁸ Dadiꞌanomo ane sabhaha dhosa notiꞌamponimo, ingka miinamo namaraluua kapopanga so katolosino dhosa.

Kakampuu-mpuuno kaparasaea 10:19-39

¹⁹ Dadiꞌanomo bhahitieꞌiku, hampano tuhuno heano Yesus intaodiomu dokadomoomu dopesuaꞌomu weo Boloku Foliuno Kangkilo.

²⁰ Yesus padamo nofomelengkaꞌao kaangkaꞌa buꞌou meowano dadi. Kaangkaꞌa amaitu nolempagi kai bhalano kahondomino Boloku Mongkilo, ingka o mbadhano wutono Yesus.

²¹ Ampa aitu intaodiomu bhe Imamuntoomu Bhalano mandeꞌaonomo Lambuno Lahataꞌala ⸤ te surugaa⸥ .

²² Hampano bhahi-bhahiꞌae naꞌa, haa kaitaomu domaꞌotiomu Lahataꞌala, weo kahelasino lalo bhe kaparasaea tumangka; wobhano handantoomu dofekangkiloemo, totono lalontoomu kumatanga-tangano nohempomo, ⸤ miinamo naekenda-kendaꞌao habu modai⸥ , mbadhantoomu nongkilomo mbaꞌinomo padamo dokadiuane oe moinda.

²³ Fintaha motangka kaitaomu ne kaposahunaꞌao neꞌakuintoomu, kapaꞌamo Lahataꞌala notiparasaea, tetewei namekoꞌulae dhandino.

²⁴ Fodo-fodoli kaitaomu fekihi so dapofeka-fekatangka lalo, neanomo sedhuluꞌa dua kabhalano kanini kaasi bhe habu metaantoomu.

²⁵ Koe dowoowulea dopohompu-hompuomu dosambahea, peda kaneando seemie hoduano mantawano itu. Intaodiomu tabeano dapotanga-tangahiomu, bhe nasedhuluꞌa kakampuu-mpuuno lalo hampano dowohaomu oleo so kahatoꞌano Ompu dhulu kamaꞌo.

²⁶ Ane padamo dotahima bhe dopandeꞌao kabanara, tamaka dofepuuꞌe nandoo dua dehabu dhosa, ingka miinamo bhe kapopanga so katolosino dhosantoomu naꞌa.

²⁷ Sehonda-hondano ndumandoono, intaodiomu deanta-antagi kabhotusino Lahataꞌala timoteꞌino bhe efi ngkalai-laino so tumunulino sabhaha manusia mewangie.

²⁸ Mie mokiidono meangkano ne tubhono agama Yahudi, ane dosakusiiane kaowu dohodua dototolu putae nokokaꞌala, lasao dopongkoe miina bhe ampoa.

²⁹ Ane peda anaꞌa, nada amai bhahaa kolauno mie minda-mindaꞌino Anano Lahataꞌala, mabhino heano podhandiꞌa o giu mohaku tapa kofahalaano? Gahaꞌaitumo hampano tuhuno heano naꞌa dhosano nonggelamo. Pakade nofekandidiki dua Rohino Lahataꞌala fowaꞌaono rahamati. Ingka kahukumu so neꞌawano mie medano naꞌa sedhuluꞌa kabhieno!

³⁰ Ingka dopandeꞌaaneomu laꞌae kobhoasaono, “Inodimo so bhoosiangko! Inodimo so fohukumuno!” Nokobhoasao dua, “Ompu tetewei nabhitahaki umatino.”

³¹ Ingka notimoteꞌi mpuu ane seemie manusia nohakoe limano Lahataꞌala dumadino.

³² Feꞌulaiꞌeomu kumundoꞌano. Wakutuu anaꞌa, pada notilakoomu tilangano Lahataꞌala, nobhahi meꞌawaomu kakadee-dee, tamaka sadaa-daa potaami bhe poewangiomu.

³³ Sigaꞌa dofekandidiki bhe dofekasabhakoomu ne wisendo mie bhahi. Sigaꞌa dua menamisiomu kakadee-dee nenamisindo mie nefodee-dee peda anaꞌa.

³⁴ Padamo dua menamisiomu kapeano lalondo mie netohongku. Wakutuuno arataamiu dorampasie, tatahimamoomu weo kawulano lalo, hampano pandeꞌaaneomu bhe arataamiu lumiuꞌe kakesa so motahano ampa suhue dhamani.

³⁵ Dadiꞌanomo, koise hunsaomu kaposahunaꞌaomiu! Ane sadaa-daa kaposahunaꞌaomiu, ingka nandoo bhe ponambo bhalano so netahimamiu.

³⁶ Nofaraluu kosabaha potaamiomu neanomo namada dhumalangiomu kapoindalono Lahataꞌala, tetewei umawaeꞌomu nedhandiꞌaono.

³⁷ Kapaꞌamo ⸤ notibuhi weo Kitabi⸥ , “Tana sekabantaha sepaliꞌa, Anoa so maino ingka nahumatomo, paemo namodhulu tempono.

³⁸ Mie pometaano bhe Idi hampano kaparasaeano, anoamo itu so meꞌawano dadi; tamaka ane nandoo bhe sumowono, pae naetaaꞌane lalokua.”

³⁹ Ampamo kaowu intaodiomu ini suano umati mesowo-sowono so binasano, tamaka intaodiomu ini umati marasaeano so meꞌawano dadi.