Ibrani 1 - Muna Southern Dialect

Lahataꞌala nokobhoasao noangka ne Anano 1:1-3

¹ Ne dhamani wawono Lahataꞌala nofendu-fenduaꞌe nokobhoasao ne awuaꞌintoomu noangka ne ana-anabii nepake sabhaha dhala.

² Ne pandano dhamani ini Lahataꞌala nokobhoasao ne intaodiomu noangkamo ne Anano. Anoamo toka nefotantuno mbali kohakuꞌaono bhahi-bhahiꞌae ndumandooꞌano. Noangkamo dua ne Anano ini, Lahataꞌala nofokonandoo alamu bhalano.

³ Anoa nofotiwoha tilangano kakalabhiano Lahataꞌala, katuno bhe sifatino pasae wutono Lahataꞌala. Anoamo dua tumukono alamu bhalano ini nopake bhoasaono foliuno kuasa. Nopalusi nofekangkilo manusia maiꞌao ne dhosando, Anoa nengkohamo ne suanano Lahataꞌala fofoliuno kakalabhia te wawono wawo.

Anano Lahataꞌala nofoliuda malaꞌekati 1:4-14

⁴ Anano Lahataꞌala neꞌawa kaengkohaꞌa te wawono kaengkohaꞌando malaꞌekati, pedamo dua o nea netahimano ne Lahataꞌala nofoliu dua katifosibhalano bhe neando malaꞌekati.

⁵ Kapaꞌamo Lahataꞌala miina sepaliꞌa nakobhoasao bhe nasepaku ne seemie malaꞌekati, “Hintumo itu Anaku, akoanaꞌangkomo oleo itu.” Miina dua nakobhoasao ne malaꞌekati sigaoꞌano, “Idi aembali so amano, anoa naembali so anaku.”

⁶ Wakutuuno nofopesua Anano titiisa we dhunia ini, nokobhoasao toha ambano, “Kosasawindo malaꞌekatiku tetewei datumaohao sombado ne Anoa.”

⁷ Lahataꞌala nokobhoasao nopulaoꞌao malaꞌekati peda aini, “O malaꞌekati nohabudamo dembali kawea moꞌosa, palima-lima umondofaane dembalimo hendeno efi.”

⁸ Tamaka ne Anano maitu, Lahataꞌala nokobhoasao ambano, “Hintu Lahataꞌala, kafopahintaꞌamu nadumaa-daaꞌe suhue dhamani, noꞌadhili mpuu kuasamu.

⁹ Moasiane kabanara, bansie podiu modai. Kanandooꞌanomo o Idi, Lahataꞌalamu, aminakikomo mbali tandano apiliko, awaꞌangko kawulano lalo maka liudamo sabhangkaꞌimu.”

¹⁰ Ambano toha, “Hintu Ompu, kabhao-bhaono mefongkohano sandino dhunia, o lani angkaꞌano limamu.

¹¹ Bhahi-bhahiꞌae maitu nabinasa, tamaka hintu sadaa-daako, bhahi-bhahiꞌae naonggasi nada pakea.

¹² Alamu bhalano ini lumupie nada bhadhu, nada pakea bhoosiane sigaoꞌano; tamaka hintu pae natibhaliia, dadimu pae bhe kapulia.”

¹³ Lahataꞌala ingka miina sepaliꞌa nakobhoasao ne seemie malaꞌekati peda aini, “Mengkohamo ne suanaku ini, ampa kosasawindo kaewamu ahumabuda so kafindaꞌamu.”

¹⁴ Ingka o malaꞌekati maitu saneamo rohi meompuno ne Lahataꞌala, andoamo dua netuduno Lahataꞌala daꞌumondofao manusia so metahimano kasalamati.