Galatia 6 - Muna Southern Dialect

Potulu-tulumiꞌa 6:1-10

¹ Bhahitieꞌiku, ane nandoo mie nehatofimiu nehabu dhosa, hintimiu dumadino mangkafino Rohino Lahataꞌala tabeano tumondaeꞌomu so nasumuliꞌao ne metaaꞌano. Tamaka tabeano malu-malusieꞌomu bhe dhagani wutomiu bhahasaa tiwudhuomu dua bhe hintimiu.

² Potulu-tulumiomu weo kasabha, ane peda naꞌa ingka dhalangiemoomu pahintano Kristus.

³ Ane seemie noabhi wutono nofoliuda bhaindo, gahaꞌa miina, mie aitu nogau-gau wutono.

⁴ Seemie-seemie tabeano namahakesaa diuno wutono, netaa bhahaꞌi miina. Ane netaa ingka naembali naowoseane bhakeno, ampamo kaowu koemo nopoꞌondoane bhe diuno mie bhaino.

⁵ Kapaꞌamo seemie-seemie ingka bhe wowoꞌono wutono so netongkunoa.

⁶ Mie nefoinaꞌuꞌao bhoasaono Ompu, naetaa nadumawue dua sabhaha kanandoono metaaꞌano bhe guruno.

⁷ Koise tibhohe-bhoheꞌiomua, Lahataꞌala pae naembalia dapokalalambuanea. O ae maka dua nemontisando mie, aituꞌaemo dua so netobheno.

⁸ Ane doangkafi kapoindalono mbadha tantumo datumobhe dua hasilino kapoindalono mbadha, o kabinasa. Tamaka mangkafino kapoindalono Rohino Lahataꞌala datumobhe dua hasilino kapoindalono Rohino Lahataꞌala, o dadi suhue dhamani.

⁹ Dadiꞌanomo koise dowoowulea dahumabu metaaꞌomu, kapaꞌamo nahumato tempono datumahimaomu pehapintoomu, sumanomo koise dofetumpuomu.

¹⁰ Tinangke bhe kasalawamiu, habu metaa ne kosasawindo mie, mangke-mangkemo ne bhahitie marasaeano ne Kristus.

Kafodhaga bhe kasongkono suha 6:11-18

¹¹ Ondoe kabuhi aini, kabhalaꞌino maka horofuno hampano abuhiane limaku wutoku.

¹² O mie mosuhukoomu mesunaomu, ingka gaondo defewoha kaowu putae doangkafi tutuhano mbadha. Tamaka kahabuꞌando peda aitu keana kaowu dofodee-deeda ⸤ miendo Yahudi⸥ hampano kaparasaeando ne mateno Kristus te sau salipu.

¹³ Sakotuꞌuno mie mangkafino tutuhano kasuna naꞌa miina dua dadhumalangiea kosasawiꞌae tubhono agama Yahudi. Gaondo dasumunakoomu so kaowu damekawoseꞌao bhakendo putae hintimiu angkafiomu tubhono agama Yahudi hampano andoa.

¹⁴ Tamaka o idi akiido naowose bhakeku ne ae maka dua, mpahinomo Ompuntoomu Yesus Kristus mateno te sau salipu nefosibhalakua. Kapaꞌamo mbaꞌinomo mateno Kristus te sau salipu, dhunia ini miinamo bhe fahalaanoa so idi, kao-kaomo nomatemo so idi. Pedamo dua idi ini, kao-kaomo amatemo so dhunia.

¹⁵ Desuna bhe miina daesuna miina nakomaꞌa-maꞌanaa, ampamo dembali manusia buꞌou komaꞌanaꞌano.

¹⁶ Sio-siomo Lahataꞌala namosampu katohopono dadi bhe rahamatino ne kosasawindo mangkafino tubho aini bhe umatino Israel fehebuaꞌano Lahataꞌala.

¹⁷ Panda-pandano, koemo bhe mosabha kanaua, hampano bhemo ponteno ne uluku inia, katandaino idi ini fehebuaꞌano Yesus.

¹⁸ Bhahitieꞌiku! Sio-siomo kabarakatino Ompuntoomu Yesus Kristus sadhia napobhaiꞌao totono lalomiu. Amin.