Galatia 5 - Muna Southern Dialect

Kabebasindo mie marasaeano ne Kristus 5:1-15

¹ Kristus padamo nofobebasi kaita, neanomo intaodiomu kotu-kotuꞌu dabebasiomu. Dadiꞌanomo ehe fekatangkaomu, koise undaomu sumuli dakumuhumakoomu so bhatuano tubhono agama Yahudi.

² Tandaiꞌeomu, ane mesaloomu dasumunakoomu, nokomaꞌana Kristus pae nakofahalaa so hintimiu. Idi, Paulus, mugauno inia.

³ Amenduaꞌe toha, sasuka mie mesalono dasumunae, tetewei nadhumalangie kosasawiꞌae tubhono agama Yahudi.

⁴ Ane posahunaꞌaoꞌomu kansuhu ne tubhono agama Yahudi so katitahimaꞌamiu ne Lahataꞌala peda mie banara, nokomaꞌana pogaatimoomu bhe Kristus, kukundomoomu rahamatino Lahataꞌala.

⁵ Tamaka insaodi, bhe katulumino Rohino Lahataꞌala, taantagi neposahunaꞌao mani putae Lahataꞌala natumahima kainsami peda mie banara hampano kaparasaea mani ne Kristus.

⁶ Kapaꞌamo doseꞌisemoomu bhe Kristus Yesus, desuna bhahaꞌi miina daesuna miinamo nakomaꞌanaa. Maraluuꞌano mpahinomo doparasaea ne Kristus bhe dofotiwohae weo kanini kaasinto ne mie bhainto.

⁷ Endefiꞌini ingka netaa sepaliꞌa dhuluno kaparasaeamiu. Laꞌae bhahaa wudhukoomua sampe miinamo meangkaomu ne kabanara?

⁸ Teteweimo kawudhu anaꞌa miina namaiꞌao ne Lahataꞌala toka bhasikoomu.

⁹ Ambado mie, “Sekandai-ndai kaowu ragi noꞌendeanemo kosekabhahiꞌae kadhalono tarigu so roti.”

¹⁰ Tamaka mahinggamo peda naꞌa, kapaꞌamo doseꞌisemoomu bhe Kristus, nandoo asahunaꞌaangkoomu mpuu paise mangkafiomu kafoinaꞌu sumempa naꞌa. Ampamo kaowu humunggano fekihimiu, laꞌae maka dua, tetewei nahumukumue Lahataꞌala.

¹¹ Bhahitieꞌiku, pedamo dua wutoku ini. Ane ibahano nandoo afofoinaꞌuꞌao putae atorano suna nandoo nofaraluu, noafa gahaꞌa sadaa-daa dofodee-dee kanauꞌao? Ane ibahano nokotuꞌu afofoinaꞌu peda naꞌa, ingka nokomaꞌana bhihitano mateno Kristus te sau salipu paemo naembali tingkuno poꞌala-alatiꞌa.

¹² O mie humunggano fekihimiu itu bhe dapokasuna-suna, selabhiꞌaku daꞌumoliumo wutondo.

¹³ Bhahitieꞌiku, daanumo nobhasikoomu Lahataꞌala so bebasiꞌaoꞌomu, ampamo kaowu kabebasi aitu koise pakeeꞌomu so tingkuno mangkafiomu sabhaha kapoindalono wuto, tamaka poꞌondo-ondofaoꞌomu pomoni-moniniꞌaoꞌomu.

¹⁴ Kapaꞌamo kosasawiꞌae tubhono agama Yahudi nefoꞌonumo ne pahinta sehondano ini, “Moasiꞌao mie bhaimu peda kaasimu ne wutomu!”

¹⁵ Tamaka ane sadhia posia-siakaomu, posiꞌondoomu bhahasaa mobinasaomu kosasawimiu.

Dadi doangkafi kapoindalono wuto bhahaꞌi kapoindalono Rohino Lahataꞌala 5:16-26

¹⁶ Patudhuku peda aini: dadiomu angkafiomu kaatono Rohino Lahataꞌala, maka paemo mangkafiomu kapoindalono wuto.

¹⁷ Kapaꞌamo kapoindalono wuto nopobhansule bhe kapoindalono Rohino Lahataꞌala, kapoindalono Rohino Lahataꞌala nopobhansule bhe kapoindalono wuto. Kohaahondaꞌae ini nopotagali sepaliꞌa sampe miinamo naembalia mehabuomu ampa kapoindalomiu.

¹⁸ Tamaka ane motawakalaomu dadimiu ne Rohino Lahataꞌala, ingka paemo namaraluua mangkafiomu sabhaha tubhono agama Yahudi.

¹⁹ Kapoindalono wuto nentaleamo notiwoha ne habu pedando ini: dopokawite-wite, dopokahaku, nafusuu modai,

²⁰ desombai barahala, o wuhake, dopowengke-wengke, dopogiha-giha, nokondua lalondo, domansoꞌamaha, doꞌondofao kaowu kafaraluuno wuto, dopokante-kantee lalo, dopowala-wala,

²¹ dopomole-moleaꞌao lalo, dololanu, sakahame dohumaa dofohoꞌu, bhe sabhaha habu modai sigaoꞌano. Peda padamo afohatokoomu endefiꞌini, aitu amenduaꞌangkoeꞌomu dua, mie humabuno sabhaha podiu medando maitu paise daeꞌawa kadawu weo Kafopahintaꞌano Lahataꞌala.

²² Tamaka ane mie dodadi nokuasaida Rohino Lahataꞌala, hasilino ingka dopomoa-moasiꞌao, nowula lalondo, notohopo lalondo, dokosabaha, nomalu lalondo, netaa lalondo, notai lalondo,

²³ dofekapanda wutondo bhe dopoolie dofewanaki totono lalondo. Miina bhe tubhono agama meꞌeleꞌaono podiu medano maitu.

²⁴ Mie membalino fehebuaꞌano Kristus Yesus, kapoindalono mbadhano padamo dofekamatee te sau salipu, maꞌanano sabhaha nafusuu bhe kapoindalono kamanusiano dosobuemo.

²⁵ Rohino Lahataꞌala padamo nowaꞌa kaita dadi buꞌou, dadiꞌanomo tabeano nahumelasi dua lalonto nafokuasai Rohino Lahataꞌala.

²⁶ Koise nelangke diuntoomu, koise dopofekaleaꞌi lalo, koise dua dopokondu-konduaꞌao lalo.