Galatia 4 - Muna Southern Dialect

Intaodiomu suanomo bhatua 4:1-7

¹ Patudhuku peda aini: ane ibahano nandoo seemie kafeompuꞌa bhe anano kohakuꞌaono kahunsaꞌaono nandoo noanaꞌi, kaomponano kaanaꞌino maitu miina napoꞌala bhe bhatua. Gahaꞌaitumo sakotuꞌuno anoamo so kafeompuꞌa bhahi-bhahiꞌae.

² Anoa sadhia bhe mie umondofaono kafaraluuno bhe umurusuno sabhaha fehebuaꞌano, ampa nohato tempono peda netubhono amano.

³ Pedamo dua intaodiomu, nandoo kaanaꞌintoomu ⸤ maꞌanano miinaꞌo damarasaeaꞌomu ne Kristus⸥ nofobhatua kaita sabhaha rohi modai ne dhunia ini.

⁴ Tamaka nokapo kaowu tempo nefotantuno, Lahataꞌala notudumo Anano nomai we dhunia ini. Anano Lahataꞌala ini nofolentee seemie hobhine, nodadi noangkafi tubhono agama Yahudi.

⁵ Katituduꞌano natumolosi mie dumadino weo kuhumano tubhono agama Yahudi, neanomo nasumangke kaita Lahataꞌala so anaꞌino.

⁶ Hampano ingka dembalimoomu anaꞌino, Lahataꞌala notudumo Rohino Anano naeate weo totono lalontoomu. Rohi ainimo mekatondalano bhe mokoamano ne Lahataꞌala.

⁷ Dadiꞌanomo hintimiu suanomo bhatua tamaka anaꞌinomo Lahataꞌala. Ane kotu-kotuꞌu membalimoomu anaꞌino, ingka kohakuꞌaoꞌomu dua sabhaha nedhandiꞌaono Lahataꞌala so anaꞌino.

Kamihino lalono Paulus ne miendo Galatia 4:8-11

⁸ Endefiꞌini miinaꞌo mandeꞌaoꞌomu Lahataꞌala, hintimiu nofobhatuakoomu sabhaha kuasa nefeompuniꞌimiu peda ompu, gahaꞌaitu suano Ompu sakotuꞌuno.

⁹ Ampa aitu ingka pandeꞌaanemoomu Lahataꞌala, tawa labhiꞌaku dakumonae nopandeꞌaangkomoomu Lahataꞌala. Dadiꞌanomo noafa gahaꞌa suliꞌaoꞌomu ne rohi modai ne dhunia ini? Ingka andoa ini miina dakokuasa bhe miina dakoafa-afaa! Dadi noafa gahaꞌa gaomiu sumuli mobhatuaꞌao wutomiu ne andoa maitu?

¹⁰ Hintimiu dambaꞌaaneomu kansuhu oleo, o wula, o wakutuu bhe taꞌuno hohaeaꞌa ⸤ toka nefotantuno weo tubhono agama Yahudi⸥ .

¹¹ Nomihiangkoomu laloku, kunanomo kawuleku ⸤ aowaangkoomu Bhihita Metaa⸥ nasumia-sia.

Feꞌulai kaitaomu pakatandano dopopande-pandeꞌao 4:12-20

¹² Bhahitieꞌiku, aesalo mpuu membaliomu nada idi ini, kapaꞌamo idi padamo dua aembali peda hintimiu itu ⸤ wakutuu aeate bhe hintimiu⸥ . Ampa aini miinaꞌo bhe kaꞌalamiu ne idi.

¹³ Ingka pandeꞌaaneomu, pakatandano afohatoangkoomu Bhihita Metaa, hampano aosaki.

¹⁴ Wakutuu anaꞌa hintimiu miina molampi tawa bansi kanauꞌomu, mahinggamo sakotuꞌuno sakino uluku naꞌa mbalimo kasabha bhalano so hintimiu. Tamaka ingka tahima kanauꞌomu tapedamo seemie malaꞌekatino Lahataꞌala tawa wutono Kristus Yesus.

¹⁵ Wakutuu anaꞌa namisieꞌomu kodawuaꞌomu sepaliꞌa. Tamaka ampa aitu ne amaiꞌemo bhahaa kakodawuamiu naꞌa? Apandeꞌaane, wakutuu anaꞌa hintimiu mohelasiomu, ane naembali mahingga matamiu sumungkieꞌomu maka maꞌa kanaꞌeomu idi.

¹⁶ Bhahaa mbaꞌinomo pada atalesaangkoomu kumotuꞌuꞌano, sampe kona kanaumoomu kaewamiu?

¹⁷ Andoa ⸤ mpahaguru-guruno itu⸥ doꞌuleiꞌe mpuu doꞌondofi lalomiu, tamaka patudhundo miina naetaaꞌa. Andoa deꞌondofi kaowu dhala dapogaatiꞌao hintimiu bhe insaodi, neanomo nakamai-mai lalomiu mangkafiomu andoa.

¹⁸ Daanumo netaa nokamai-mai lalondo, ampamo kaowu ne metaaꞌano, tamaka sumanomo sadhia peda naꞌa, koe kaowu ane apobhaiangkoomu.

¹⁹ Anaꞌiku kamoasiꞌaoku, ampa aitu akadee-dee toha mbaꞌinomo hintimiu, tapedamo kaleano seemie ina so koanano. Kakadee-deeku ini nalumagi, sampe feꞌilino Kristus kotu-kotuꞌu natiwoha weo dadimiu.

²⁰ Nokamba mpuu laloku aitu apohompu-hompu toha bhe hintimiu, neanomo naembali dapuga-pugau metaaꞌomu, napoꞌala bhe wambaku weo suha aini. Kapaꞌamo nomatemo akalaku amafaꞌiangkoomu bhahaa.

Tula-tulano Hagar bhe Sara mbalimo kaepalendaꞌa 4:21-31

²¹ Bhahitieꞌiku moindalono dumadino weo tubhono agama Yahudi, miina metingkeeꞌomua gahaꞌa wambano Kitabi anaꞌa?

²² Ingka weo Kitabi notibuhi putae anano Abraham dohodua, seemie seina. Seemie o hobhine bhatua, seemieno o hobhine bebasi.

²³ Anano bhatua naꞌa nolente peda dua kolentendo anaꞌi sigaoꞌano, ⸤ nomaiꞌao ne kapoindalondo manusia⸥ . Tamaka anano hobhine bebasi nolente hampano dhandino Lahataꞌala.

²⁴ Kadhadhia aini nembalimo kaepalendaꞌa. Kapaꞌamo hobhine hoduano ini kaꞌibahatino haa honda podhandiꞌano Lahataꞌala bhe manusia. Hagar ⸤ neano hobhine bhatua naꞌa⸥ , kaꞌibahatino podhandiꞌa nehabu te gununo Sinai. Anaꞌi nefolenteno sanea bhatua.

²⁵ Dadiꞌanomo Hagar ini gununo Sinai we witeno Arabu. Anoa ini nembali dua dopototoane bhe kotano Yerusalem, kapaꞌamo ampa aini miendo Yerusalem saneamo bhatua ⸤ nofobhatuada tubhono agama Yahudi⸥ .

²⁶ Tamaka hobhine bebasi ⸤ neano Sara⸥ , kaꞌibahatino Yerusalem te surugaa. Anoa ini inantoomu ⸤ hampano miinamo namobhatuaꞌe tubhono agama Yahudi⸥ .

²⁷ Ingka notibuhi weo Kitabi peda aini, “Fowula lalomu hintu hobhine moꞌafa tapa fofolenteno! Moꞌia bhe pokakei-kei, hintu tapa menamisino kaleano dokoana. Kapaꞌamo nabhahi anano hobhine nehunsano moꞌaneno, bhe anano hobhine pomeatefino bhe moꞌaneno.”

²⁸ Bhahitieꞌiku, hintimiu itu nopototo bhe Ishak ⸤ anano hobhine bebasi naꞌa⸥ , saneamo anaꞌi lumenteno hampano dhandino Lahataꞌala.

²⁹ Endefiꞌini anaꞌi lumenteno hampano kapoindalono manusia nofodee-dee Ishak maitu, anaꞌi lumenteno hampano Rohino Lahataꞌala. Ingka pedamo dua kumadhadhiaꞌano ampa aini.

³⁰ Tamaka peda ae bhahaa wambano Kitabi? Ingka weo Kitabi notibuhi peda aini, ⸤ Ambano Lahataꞌala ne Abraham,⸥ “Gihasie hobhine bhatua itu bhe anano, kapaꞌamo anano pae naembalia naetahima kahunsaꞌao napoowa-owa bhe anano hobhine bebasi.”

³¹ Bhahitieꞌiku, ingka nentaleamo intaodiomu ini suano anaꞌino bhatua tamaka anaꞌino hobhine bebasi.