Galatia 3 - Muna Southern Dialect

Dopometaa bhe Lahataꞌala hampano kaparasaea ne Kristus 3:1-9

¹ Hintimiu miendo Galatia, kabhohemiu gahaꞌa! Nofobhohe-bhoheꞌikoomu laꞌae bhahaa ⸤ sampe hunsaomu kafoinaꞌu banara⸥ ? Ingka padamo afekantale-ntaleaꞌangkoeꞌomu mateno Yesus Kristus te sau salipu.

² Soba fohato kanauꞌomu sehondano ini: bhahaa metahimaomu Rohino Lahataꞌala mbaꞌinomo dhalangiomu tubhono agama Yahudi, bhahaa mbaꞌinomo fetingkeomu Bhihita Metaa bhe parasaeaꞌomu ne Kristus?

³ Notolaumo bhahaa kabhohemiu? Ingka tandakiemoomu dadi buꞌoumiu weo kuasano Rohino Lahataꞌala, bhahaa mopansuhueꞌomu weo kuasano wutomiu ⸤ somo naosangkaꞌao dadimiu⸥ ?

⁴ Nosia-sia bhahaa sabhaha kadhadhia madano netompaloimiu? Koasimo dua nosia-sia!

⁵ Kaowu nadamo amai itua? Ingka Lahataꞌala miina naegana-ganaa nowaꞌangkoomu Rohino bhe nehabuangkoomu sabhaha tanda tapa mentela. Bhahaa nowaꞌangkoomu peda naꞌa mbaꞌinomo dhalangiomu tubhono agama Yahudi kaa bhahaꞌi mbaꞌinomo fetingkeomu Bhihita Metaa bhe parasaeaꞌomu ne Kristus?

⁶ Ingka pedamo tibuhino weo Kitabi nopulaoꞌao Abraham peda aini, “Abraham noparasaea ne Lahataꞌala, maka hampano kaparasaeano naꞌa Lahataꞌala notahimae peda mie banara.”

⁷ Dadiꞌanomo nofaraluu mandeꞌaaneomu mpuu putae mie marasaeano ne Lahataꞌala, andoamo itu membalino sampuꞌano Abraham.

⁸ Weo Kitabi mpini endefiꞌini notipandeꞌaomo, putae Lahataꞌala notahima dua mie suano Yahudi peda mie banara hampano kaparasaeando ne Anoa. Kapaꞌamo nandoo Bhihita Metaa nefosampeno wawo ne Abraham, ambano, “Namangka ne hintu, sabhaha bansano liwu daeꞌawa kabarakati.”

⁹ Abraham noparasaea ne Ompu, maka neꞌawa kabarakati. Dadiꞌanomo kosasawindo marasaeano daeꞌawa dua kabarakati peda neꞌawano Abraham.

Pae daeꞌawa kabarakati nedhandiꞌaono Lahataꞌala ne Abraham ane damosibhala tubhono agama Yahudi 3:10-14

¹⁰ Notibuhi weo Kitabi peda aini, “Mie tapa dhumalangino kosasawiꞌae tubhono agama tibuhino weo Kitabi nakumangkanaiꞌemo balaa.” Dadiꞌanomo kosasawindo tumangkaꞌaono tubhono agama Yahudi ⸤ so kaangkaꞌando dapometaa bhe Lahataꞌala⸥ , ingka sanea so nekangkanaino balaa ⸤ kapaꞌamo pae bhe so mondoiꞌea⸥ .

¹¹ Dadiꞌanomo nentaleamo sepaliꞌa miina bhe netahimano Lahataꞌala peda mie banara mbaꞌinomo dodhalangi tubhono agama Yahudi. Ingka notibuhi dua weo Kitabi peda aini, “Mie netahimano Lahataꞌala peda mie banara hampano kaparasaeano, anoamo itu so meꞌawano dadi.”

¹² Tubhono agama Yahudi miina naengkoha ne kaparasaea, ⸤ tamaka nengkoha ne habu metaa⸥ , kapaꞌamo notibuhi weo Kitabino Musa, “Laꞌae kotu-kotuꞌu dhumalangino tubhono agama maitu, anoamo itu so meꞌawano dadi.”

¹³ Tamaka Kristus padamo nofobebasi kaitaomu maiꞌao ne balaano tubhono agama Yahudi, kapaꞌamo notibuhi weo Kitabi, “Nobalaamo mie nekantai te sau salipu.” Dadiꞌanomo Anoamo tumanggoino balaa so intaodiomu.

¹⁴ Yesus Kristus nofobebasi kaitaomu neanomo namangka ne Anoa sabhaha bansano liwu datumahima dua kabarakati nedhandiꞌaono Lahataꞌala ne Abraham. Ane nada anaꞌa intaodiomu marasaeano datumahimamoomu dua Rohino Lahataꞌala toka nedhandiꞌaono.

Tubhono agama Yahudi bhahaꞌi dhandino Lahataꞌala so netangkaꞌao 3:15-20

¹⁵ Bhahitieꞌiku, naetaa aesandahaangkoomu weo dadinto maꞌoleo hangkowine. Ane nandoo mie podhandino maka suhano padamo dotekee bhe dofosahae, ingka bhe naseemie miinamo bhe kohakuno damosowo tawa datumubhahi iꞌino podhandi aitu.

¹⁶ ⸤ Pedamo dua podhandino Lahataꞌala.⸥ Lahataꞌala padamo nokobhoasaꞌao dhandino ne Abraham bhe sampuꞌano. Weo Kitabi miina natibuhi “so sampuꞌaꞌimu”, maꞌanano dobhahi, tamaka “so sampuꞌamu” maꞌanano seemie kaowu, nopulaoꞌaomo Kristus.

¹⁷ Patudhuno sandahaku saꞌituini peda aini: dhandino Lahataꞌala toka nehabuno maitu pae bhe kapoolia namosowoe tawa namekatembee tubhono agama Yahudi. Kapaꞌamo atorano agama Yahudi naꞌa ⸤ netubhono anabii Musa⸥ kaneꞌo nonandoo nopalusi fato moꞌono tolu fulu taꞌu nokundo Abraham.

¹⁸ Ane kabarakati newaꞌaono Lahataꞌala nengkoha ne dhalangiꞌano tubhono agama Yahudi, ingka suanomo kawaꞌao nedhandiꞌaono. Tamaka weo rahamatino Lahataꞌala, Abraham nowaꞌane kabarakati hampano padamo nopodhandiane.

¹⁹ Ane peda naꞌa so ae bhahaa katifokonandooꞌano tubhono agama Yahudi maitu? Kanandooꞌano tubhono agama Yahudi maitu ingka somo kaowu katubhahino so notipandeꞌaoꞌao kaꞌalando manusia. Tamaka tubho amaitu notipake kaowu ampa kahatoꞌano sampuꞌano Abraham nesambili weo podhandino Lahataꞌala saꞌituini. Tubhono agama Yahudi naꞌa dofosampee malaꞌekati ne seemie manusia ⸤ patudhuno, anabii Musa⸥ , so poatoꞌaono wamba ne manusia bhaino

²⁰ Tabeano bhe powalano maka nandoo mie poatoꞌaono wamba. Tamaka Lahataꞌala Kaseemie-mieꞌano, nobhoasaꞌao Wutono ⸤ dhandino ne Abraham⸥ .

Fahalaano tubhono agama Yahudi 3:21-29

²¹ Ane peda naꞌa nopotagali bhahaa tubhono agama Yahudi bhe dhandino Lahataꞌala? Ingka miina sepaliꞌa. Kapaꞌamo ane ibahano tubhono agama Yahudi dowaꞌandae manusia so daeꞌawaꞌao dadi, tantumo manusia naembali natumahimada Lahataꞌala peda mie banara namangka ne tubhono agama maitu.

²² Ampamo kaowu weo Kitabi notibuhi putae kosasawindo manusia deate weo kuhumano dhosa. Dadiꞌanomo dhandino Lahataꞌala maitu namaꞌandae kaowu mie marasaeano, maꞌanano nengkoha ne kaparasaeando ne Yesus Kristus.

²³ Miinaꞌo damarasaeaꞌomu endefiꞌini, deateomu weo kuhumano tubhono agama Yahudi tapedamo mie netohongku, ampa dotahimaomu kaparasaea ne Kristus.

²⁴ Dadiꞌanomo tubhono agama Yahudi naembali dapototoane bhe seemie dhaga tumonda kaita ampa kahatoꞌano Kristus, neanomo Lahataꞌala nafotahima peda mie banara hampano doparasaeamoomu ne Kristus.

²⁵ Aitu o temponomo manusia damarasaea ne Kristus, dadiꞌanomo miinamo namaraluua nadhumagani bhe namoinaꞌu kaita tubhono agama Yahudi.

²⁶ Hintimiu membalimoomu anaꞌino Lahataꞌala, hampano kaparasaeamiu ne Kristus Yesus.

²⁷ Ingka kosasawimiu padamo dokadiu saranikoomu weo neano Kristus, dadiꞌanomo fokanamoomu Kristus ne ulumiu tapedamo pakea buꞌou ⸤ maꞌanano membaliomu peda wutono Kristus⸥ .

²⁸ Kanandooꞌanomo miinamo bhe miendo Yahudi tawa miendo Yunani, miinamo bhe bhatua tawa mie bebasi, miinamo bhe moꞌane tawa hobhine, kapaꞌamo kosasawimiu itu seꞌisemoomu bhe Kristus Yesus.

²⁹ Ane hintimiu membalimoomu fehebuaꞌano Kristus, maka membalimoomu dua sampuꞌano Abraham, dadiꞌanomo kohakumoomu dua tumahimaomu dhandino Lahataꞌala.