Galatia 2 - Muna Southern Dialect

Paulus doꞌakuiꞌe rasuluꞌi sigaoꞌano 2:1-10

¹ Nopalusi ompulu fato taꞌu, asuli toha we Yerusalem apoowa bhe Barnabas, awowoꞌo dua bhe Titus.

² Kakalaꞌaku we naꞌa hampano notudu kanau Lahataꞌala weo powoha. We naꞌa dohompumo sanea kaowu neangkando umati maka atalesaanda Bhihita Metaa nefoleleku ne bansano liwu suano Yahudi. Nemosabhaꞌaoku bhahasaa nekahadhaaku endefiꞌini bhe nekahadhaaku ampa aitu nasumia-sia.

³ Tamaka mahinggamo Titus poowaꞌaku maitu miendo Yunani, anoa miina damosuhuea naesuna.

⁴ Daanumo nandoo mesalono peda naꞌa, tamaka andoa maitu o mie mekalisuno, dompahabhahi-bhahitie ne intaodiomu. Andoa dopesua miina daediu-diua so damata-mataiꞌao kaowu kabebasintoomu mie marasaeano ne Kristus ⸤ maiꞌao ne pahintano Musa⸥ . Patudhundo dasumuli damobhatua kaita ⸤ ne sabhaha tubhono agama Yahudi⸥ .

⁵ Tamaka bhe naseendai miina tasumowoandaa, neanomo Bhihita Metaa netahimamiu itu sadaa-daaꞌe nobanara, pae nakosalo-saloa.

⁶ Mahingga tanada amaimo, mie nefokamungkula weo umati maitu miina damosuhu kanau aetubhahi atora buꞌou weo kafoinaꞌuku. Andoa naꞌa akonada mie nefokamungkula weo umati, tamaka weo namisiku mie nefokamungkula bhe suano tanopototomo, kapaꞌamo Lahataꞌala miina naepoꞌala-alaꞌao mie.

⁷ Bhahamoa neangkaꞌindo umati maitu dopandeꞌaomo lalondo ingka idi ini noposahunaꞌa kanaumo Lahataꞌala aefolele Bhihita Metaa ne mie suano Yahudi, pedamo dua posahunaꞌaono Lahataꞌala ne Petrus naefolele Bhihita Metaa ne miendo Yahudi.

⁸ Kapaꞌamo Lahataꞌala maꞌaono kapooli ne Petrus mbali rasulu so miendo Yahudi, Anoamo dua maꞌa kanau kapooli aembali rasulu so mie suano Yahudi.

⁹ Dowoha kaowu rahamati netahimaku so aembaliꞌao rasulu, maka Yakobus, Petrus bhe Yohanes dopointaha lima kanaumo bhe Barnabas dua, peda tandano pobhahitie. Andoa ini ingka kapasandeꞌandomo mie marasaeano. Tapoꞌunda-undapianemo insaodi taefolele Bhihita Metaa ne mie suano Yahudi, andoa daefolele Bhihita Metaa ne miendo Yahudi.

¹⁰ Ampamo sehonda kamesalondo, taꞌumondofao mie mokae, maka daanumo aitumo nempuu-mpuuniku kaomponae ini.

Paulus nofoꞌala Petrus te Antiokia 2:11-14

¹¹ Tamaka wakutuuno Petrus nomai we Antiokia, mentalea-mentalea afoꞌalae, kapaꞌamo daanumo noꞌala.

¹² Kapaꞌamo kabhao-bhaono tanohumaamo nopombali bhe bhahitieꞌi marasaeano suano Yahudi, tamaka dohato kaowu katuduno Yakobus, negampi-gampimo, nokiidomo naomaa bhe mie suano Yahudi. Kakiidoꞌano hampano noteꞌi miendo Yahudi ⸤ kaneꞌo humatono naꞌa, bhahasaa dofoꞌalae⸥ .

¹³ Gahaꞌa bhahitie miendo Yahudi sigaoꞌano doangkafi dua kafehaaꞌulano naꞌa, sampe mahingga Barnabas nokaangka-angkamo dua.

¹⁴ Awoha kaowu podiundo maitu miina napoangkafi bhe kabanarano Bhihita Metaa, apugaumo ne Petrus ne wisendo kosasawindo naꞌa ambaku, “Hintu itu mieno Yahudi, gahaꞌa dadi peda seemie suano Yahudi ⸤ ingka miinamo mangkafi tubhono agama Yahudi⸥ . Nada amai dua mosuhu bhahitieꞌi suano Yahudi damangkafi atorano agama Yahudi?”

Kasalamatiꞌando manusia mbaꞌinomo doparasaea ne Kristus 2:15-21

¹⁵ Insaodi ini miendo Yahudi, kapaꞌamo talente tamaiꞌao ne miendo Yahudi. Insaodi ini suano mie kodhosa maiꞌaono ne bansano liwu suano Yahudi.

¹⁶ Mahinggamo peda anaꞌa, tapandeꞌaanemo o manusia notahimae Lahataꞌala peda mie banara mpahinomo hampano noparasaea ne Yesus Kristus, suano mbaꞌinomo nodhalangi tubhono agama Yahudi. Dadiꞌanomo insaodi dua taparasaeamo ne Yesus Kristus, neanomo weo kaparasaea mani maitu naembali natumahima kainsami Lahataꞌala peda mie banara, suano mbaꞌinomo taangkafi tubhono agama. Kapaꞌamo bhe naseemie miina bhe netahimano Lahataꞌala peda mie banara mbaꞌinomo nodhalangi tubhono agama Yahudi.

¹⁷ Gao mani natumahima kainsami Lahataꞌala peda mie banara weo kaparasaea mani ne Kristus. Gahaꞌa pada peda amaitu insaodi ini sadaa-daa mie kodhosa. Bhahaa nokomaꞌanaꞌao Kristus maitu mekakodhosa kainsami? Tantumo suano.

¹⁸ Ane asumuli amowanu atorano agama toka nehunggaku, ingka afotiwohamo wutoku seemie melempagino atorano agama.

¹⁹ Miinamo bhe potaiꞌakua bhe tubhono agama Yahudi, kanggetu amatemo. Nofekamate kanaumo tubhono agama maitu. Dadiꞌanomo amatemo so tubhono agama Yahudi, neanomo adumadi so Lahataꞌala. Wakutuuno Kristus dokantaiꞌe te sau salipu, kao-kaomo o idi dokantai kanau dua.

²⁰ Tamaka ampa aitu adadimo. Ampamo kaowu suanomo dadiku wutokua, tamaka Kristus dumadino we laloku ini. Dadi nedambaꞌaoku ini, ingka o dadi weo kaparasaea ne Anano Lahataꞌala. Anoa noasi kanaumo sampe nofotawakala wutono dopongkoe so idi.

²¹ Rahamatino Lahataꞌala miina aongaheꞌiea, kapaꞌamo ane o mie natumahimae Lahataꞌala peda mie banara mbaꞌinomo nodhalangi tubhono agama, ingka nosia-siamo mateno Kristus.