Galatia 1 - Muna Southern Dialect

Kalengkano suha 1:1-5

¹ Suha aini nomaiꞌao ne idi, Paulus, seemie rasulu. Kaembaliꞌaku rasulu ini miina hampano dotudu tawa dosangke kanau manusia, tamaka nosangke kanau Yesus Kristus bhe Lahataꞌala Amantoomu madano mowanue maiꞌao ne mate.

² Suha aini nomaiꞌao dua ne kosasawindo bhahitie marasaeano pobhai kanau we ini, so umati setobu-setobu we kadieno Galatia itu.

³ Sio-siomo kabarakati bhe katohopono dadi maiꞌao ne Lahataꞌala Amantoomu bhe Ompu Yesus Kristus sadhia napobhaiangkoomu.

⁴ Yesus Kristus nofotawakala wutono sampe dopongkoe mbali katolosino dhosantoomu, so namolapaꞌao intaodiomu maiꞌao ne dhamani modai ini. Habuno Kristus ini noangkafi kapoindalono Lahataꞌala Amantoomu.

⁵ Notipudhi mpuu Lahataꞌala ampa suhue dhamani! Amin.

Bhihita Metaa seꞌise kaowu, miina bhe sigaoꞌano 1:6-10

⁶ Ingka amenteangkoomu dua. Hintimiu padamo nobhasikoomu Lahataꞌala hampano rahamatino Kristus, tamaka kahimbano dua kukundoeꞌomu, maka meangkafiomu bhihita metaa sigaoꞌano tapa maiꞌaono ne Lahataꞌala.

⁷ Sakotuꞌuꞌano bhihita aitu suano Bhihita Metaaꞌa, ampamo kaowu nandoo mebhansu-bhansuleno Bhihita Metaa neowano Kristus, patudhuno dahumungga totono lalomiu.

⁸ Tamaka mahinggamo insaodi tawa seemie malaꞌekati maiꞌaono te surugaa naeowa bhihita poꞌalaꞌano bhe Bhihita Metaa toka neowa mani, mie aitu nakumangkanaiꞌe balaano narakaa!

⁹ Pedamo nepulaoꞌao mani endefiꞌini, naetaa amenduaꞌangkoeꞌomu: ane bhe meowano bhihita metaa poꞌalaꞌano bhe Bhihita Metaa toka netahimamiu, mie aitu nakumangkanaiꞌe balaano narakaa!

¹⁰ Dadiꞌanomo peda ae bhahaa itua? Aeꞌondofi kapudhindo mie bhahaa? Miina kaꞌasi, ingka aeꞌondofi kaowu kapudhino Lahataꞌala. Kunaꞌemiu aeala-ala lalondo manusia bhahaa? Ane ibahano aeala-ala lalondo manusia, ingka idi ini suanomo palima-limano Kristus.

Kaengkohaꞌano Paulus nembali rasulu 1:11-24

¹¹ Bhahitieꞌiku, gaoku mandeꞌaaneomu mpuu, Bhihita Metaa nefoleleku ini suano bhihita maiꞌaono ne fekihindo manusia.

¹² Kapaꞌamo Bhihita aini miina atumahimae ne manusia, suano dua manusia moguhu kanaꞌe, tamaka iꞌino Bhihita Metaa ini atahimae ne wutono Yesus Kristus. Anoamo motiumba kanaꞌe.

¹³ Ingka fetingkeemoomu, peda amai dadiku endefiꞌini weo agama Yahudi; miina aegana-ganaa afodee-dee umatino Lahataꞌala, patudhuku amobinasada.

¹⁴ Weo dhalangiꞌano agama Yahudi, dobhahi tapiꞌaku aliuda. Nokampuu-mpuu laloku bhe akokoso sepaliꞌa adambaꞌao adhati kahunsaꞌaondo awuaꞌiku.

¹⁵ Tamaka hampano kataano lalono, Lahataꞌala nopili kanau mpini weo haebu bhe nobhasi kanau ameompu ne Anoa.

¹⁶ Hampano dua rahamatino nofotipandeꞌao kanau Anano, neanomo amolelee bhihitano ne sabhaha bansano liwu suano Yahudi. Wakutuu anaꞌa bhe naseemie miina bhe nekalaꞌiku aesalo fekihi.

¹⁷ Idi miina dua lasao akumala we Yerusalem so apoꞌawaꞌao mie toka membalino rasulu, tamaka taꞌakala we witeno Arabu, maka asuli toha we kotano Damsyik.

¹⁸ Nopalusi tolu taꞌu, makaneꞌomo akala we Yerusalem so apoꞌawaꞌao Petrus, maka abutu we lambuno ompuluꞌa lima oleo.

¹⁹ Tamaka miina akonipoꞌawaꞌao rasulu sigaoꞌano, mpahinomo Yakobus bhahitieno Ompu Yesus.

²⁰ Aitu bhe Lahataꞌala mandeꞌaane; nebuhiku ini nokotuꞌu, miina akopahaa.

²¹ Pada aitu akalamo we kadieno Siria bhe Kilikia.

²² Ampa wakutuu anaꞌa umati marasaeano ne Kristus we kadieno Yudea miinaꞌo bhe mohano ulaku.

²³ Andoa tadofetingkemo kaowu, putae mie modee-deeno mie marasaeano endefiꞌini, ampa aitu nefolelemo Bhihita Metaa. Gahaꞌaitumo Bhihita Metaa anaꞌa endefiꞌini namobinasae.

²⁴ Dadiꞌanomo andoa dofekakalabhia Lahataꞌala mbaꞌinomo kumadhadhiaꞌano ne idi ini.