Filipi 4 - Muna Southern Dialect

Katangahi kapuliaono 4:1-9

¹ Dadiꞌanomo bhahitieꞌi nemoasiꞌaoku, fekatangka kofindamiu weo kaparasaea ne Ompu nada nepulaoꞌaoku naꞌa. Nokambaangkoomu laloku, hintimiumo mekawulano laloku, mekawosenomo bhakeku.

² Euodia bhe Sintike, aesalo mpuu ne hintimiu hoduano: pometaaꞌomu, sekakolaloomu peda bhahitie weo Ompu.

³ Hintu dua, posabhangkaꞌaku mpuu, aesaloiko tulumida hobhine hoduano maitua. Kapaꞌamo andoa ini dokahadhaa mobhie bhe idi weo foleleꞌano Bhihita Metaa, pedamo dua Klemens bhe sabhangkaꞌiku sigaoꞌano kumahadhaano bhe idi. Neando andoa ini notibuhi weo Kitabindo Mie Dumadi.

⁴ Sadhia fowula lalomiu mbaꞌinomo seꞌiseomu bhe Ompu! Amenduaꞌe toha: fowula lalomiu!

⁵ Naetaa kamaluno lalomiu damandeꞌaane sabhaha mie, kapaꞌamo Ompu nomaꞌomo nahumatoa.

⁶ Koe nokamihi-mihi lalomiu ne ae maka dua. Tamaka sadhia foampeomu kamesalomiu ne Lahataꞌala weo sambahea bhe neatimiu. Kafaraluumiu naꞌa fohatoaneomu Lahataꞌala weo katumpuno lalomiu.

⁷ Ane nada anaꞌa, katohopono lalo maiꞌao ne Lahataꞌala tapa nelosangindo manusia, nadhumagani totono lalo bhe fekihimiu toka seꞌiseno bhe Kristus Yesus.

⁸ Panda-pandano bhahitieꞌiku, fekihimiu fosingiꞌianeomu sabhaha giu metaa tipudhiꞌano, maꞌanano kumotuꞌuꞌano, mantasiꞌano, banaraꞌano, mongkiloꞌano, mokesaꞌano bhe metaaꞌano fetingkeꞌa.

⁹ Dhalangiomu sabhaha nepoguhuꞌaomiu bhe netahimamiu maiꞌao ne idi, naetaa nefetingkemiu weo pugauku, naetaa newohamiu weo diuku. Maka Lahataꞌala fowaꞌaono katohopono dadi napobhaiangkoomu.

Katumpuno lalono Paulus mbaꞌinomo neꞌawa dhoi kapakatundo umati 4:10-20

¹⁰ Weo dadiku seꞌiseno bhe Ompu, nowula sepaliꞌa laloku, mbaꞌinomo kaomponano ini kaneꞌomo dua aitu salawaomu toha fekihi bhe ondofa kanauꞌomu. Daanumo sadhia fekihi kanauꞌomu, tamaka kaomponae ini miina sumalawaomu motiwohaeꞌomua.

¹¹ Apugau peda aini suano mbaꞌinomo aokae, kapaꞌamo idi ini padamo apoguhu notumpumo laloku adadiꞌao ampa ndumandooꞌano.

¹² Padamo aenamisi dadi weo kakae, padamo dua aenamisi dadi pontalabhi-labhino. Padamo apoguhuane rahasiano dodadi dewiseki sabhaha waweno dadi ne dhunia ini: koeateno doweꞌi padamo, koeateno doꞌaho padamo, naetaa dadi pontalabhi-labhino, naetaa dadi weo kakae.

¹³ Bhe katulumino Kristus maꞌa kanau kaꞌosa, amondoiꞌe awiseki sabhaha waweno dadi.

¹⁴ Mahinggamo peda anaꞌa, netaa dua habumiu tulumi kanauꞌomu mealaomu dawu weo kasabhaku.

¹⁵ Hintimiu miendo Filipi, ingka pandeꞌaaneomu mpuu, pakaefoleleku Bhihita Metaa, wakutuuno ahunsa kadieno Makedonia endefiꞌini, ampamo hintimiu umati marasaeano tumulumi kanaua. Ampamo hintimiu mealano dawu weo kakaeku naꞌa.

¹⁶ Hampano nandoo kanau we Tesalonika, miina kaowu nasepakua mepakatu kanauꞌomu nefaraluuku.

¹⁷ Ampamo kaowu suano kawaꞌaomiu naꞌa neꞌondofikua, tamaka hasilino habu metaamiu, kanggetu so katubhahino ponambomiu mada kaowu.

¹⁸ Kosasawiꞌae atahimaemo, nokapotiemo kafaraluuku, tanokolabhimo dua. Pada atahima kapakatumiu ne Epafroditus, miinamo akonikaea. Kawaꞌaomiu ini tapedamo kapopanga mowondu, mekaꞌiano lalono Lahataꞌala bhe nemoasiꞌaono.

¹⁹ Lahataꞌala nesombaiku namokapoangkoomu sabhaha kafaraluumiu namaiꞌao ne kahangkaeano Kristus Yesus pontalabhi-labhino.

²⁰ Notifekalabhia mpuu Lahataꞌala Amantoomu ampa suhue dhamani. Amin.

Kasongkono suha 4:21-23

²¹ Fosampe kanauꞌomu salam ne kosasawindo umati mongkilono seꞌiseno bhe Kristus Yesus. Tahimaomu dua salam maiꞌao ne bhahitieꞌi pobhai kanau ne ini.

²² Kosasawindo umati mongkilono ne kota aini defosampeangkoomu dua salam, mangke-mangke kumahadhaano weo kamalino Omputo Kaisar.

²³ Sio-siomo kabarakatino Ompu Yesus Kristus napobhaiꞌao totono lalomiu.