Filipi 3 - Muna Southern Dialect

¹ Panda-pandano, bhahitieꞌiku, fowula lalomiu mbaꞌinomo seꞌiseomu bhe Ompu. Miina naobhie laloku amenduaꞌangkoomu nebuhiku endefiꞌini, hampano aitu netaa so katohopono kaparasaea ⸤ keana nepingka-pingka⸥ .

Kapometaa sakotuꞌuno bhe Lahataꞌala 3:2-11

² Kodhagaomu ne mie mehabuno modaino, kodhagaomu ne daꞌu andoa maitu, patudhundo dafofosuhu daesuna, gahaꞌa detoto kaowu ulundo mie.

³ Gahaꞌaitumo sakotuꞌuno intaodiomu ini metahimano kasuna mpuu. Maꞌanano intaodiomu ini nofoato Rohino Lahataꞌala dosombaomu ne Anoa, nowose bhakentoomu hampano nehabuno Kristus Yesus. Pakade miina daposahunaꞌaoꞌomu ne kaengkohaꞌano kamanusia bhe habu metaantoomu.

⁴ Sakotuꞌuno idi ini bhe tingkuno dua aposahunaꞌao ne kaengkohaꞌano kamanusia bhe habu metaaku. Ane nandoo mie sigaoꞌano numamisino wutono noposahunaꞌao ne medano anaꞌa, mangke-mangkemo idi ini.

⁵ Akoꞌumuhu alu oleo dosuna kanaumo, kamungkulaku miendo Israel maiꞌaono ne sampuꞌano Benyamin, aembali miendo Ibrani mpuu. Weo fintahakiꞌano tubhono agama Yahudi, idi ini miendo Farisi.

⁶ Afoma-fomai laloku afodee-dee umati marasaeano ne Yesus. Ane doꞌondo dadiku weo angkafiꞌano tubhono agama Yahudi, idi ini miina akodengo-dengoa.

⁷ Kosasawiꞌae naꞌa endefiꞌini kunaꞌekumo kanggetu laba ⸤ so meowa kanau kasalamati⸥ , tamaka aitu akonaemo kahugi hampano Kristus.

⁸ Suano kaowu taꞌo anaꞌa, tamaka kosasawiꞌae maitu akonaemo kahugi mpuu ane apototoane bhe neꞌawaku ampa aini: apopandeꞌao bhe Kristus Yesus Ompuku. Hampano Anoa kaengkohaꞌano kamanusiaku bhe habu metaaku madaꞌano ini ahunsaemo, akonaꞌidamo dua hewu, neanomo aꞌumawa Kristus,

⁹ bhe kotu-kotuꞌu aseꞌise bhe Anoa. Katitahimaꞌaku ne Lahataꞌala peda mie banara suanomo kaowuleꞌano wutoku adhalangi tubhono agama, tamaka katitahimaꞌaku ne Lahataꞌala mbaꞌinomo aparasaea ne Kristus. Dadiꞌanomo katitahimaꞌa peda mie banara naꞌa nomaiꞌao ne Lahataꞌala, nengkoha ne kaparasaea ne Kristus.

¹⁰ Ampamo sehonda kapoindaloku: amandeꞌao Kristus, amandeꞌao dua kuasa kawanuꞌano maiꞌao ne mate, bhe aeala dawu weo kakadee-deeno, neanomo asekatu bhe Anoa weo mateno.

¹¹ Ane nada naꞌa, aposahunaꞌao nada amai maka Lahataꞌala tetewei namowanu kanau dua maiꞌao ne mate.

Datumende ampa we tompano kaangkaꞌa 3:12-21

¹² Miina amugau putae bhahi-bhahiꞌae naꞌa apoꞌawaanemo, maꞌanano aembalimo mie sumangkano totono lalo. Ampamo kaowu aꞌule-ulei laloku bhahaꞌi kaowu aꞌumawaꞌao kawaꞌao nefontaa-ntaano Kristus, tapedamo mie pogolono tumendeno. Anaꞌaemo patudhuno Kristus nopundu kanau mbali fehebuaꞌano.

¹³ Bhahitieꞌiku, miina akofekihi putae kawaꞌao naꞌa apooliemo. Tamaka nehabuku ampamo sehondano ini: miina aoheruane nekundokua, aꞌule-ulei laloku so amooliꞌao kawaꞌao te wiseku.

¹⁴ Dadiꞌanomo atende kansuhu ahope we tompano kaangkaꞌa, so aeꞌawaꞌao kawaꞌaondo fotalono naꞌa, maꞌanano dadi te surugaa. Anaꞌaemo patudhuno Lahataꞌala nofosaliꞌi noangka ne Kristus Yesus.

¹⁵ Dadiꞌanomo intaodiomu ini motangkano kaparasaea tabeano dakofekihiomu nada kafoinaꞌuku saꞌituini. Tamaka ane nandoo poꞌalatiꞌano fekihimiu bhe anaꞌa, Lahataꞌala namekantaleaꞌiangkoeꞌomu dua.

¹⁶ Ampamo kaowu, kafoinaꞌu banara toka netahimantoomu, naetaa damangkafieꞌomu kansuhu.

¹⁷ Bhahitieꞌiku, mesandahaomu ne idi. Padamo tafotiwohaangkoomu sandaha metaa, dadiꞌanomo fotinda-tindaeꞌomu mie mesandahano ne insaodi ini.

¹⁸ Kapaꞌamo nentelamo afohatokoomu, aitu afenduaꞌemo dua nopotuhu bhe luuku, putae dobhahi mie kodadindo nopoewangi bhe patudhundo mateno Kristus te sau salipu.

¹⁹ Dadindo nakopandaꞌao kabinasa; nesombaindo iꞌino handado. Nowose bhakendo dehabu timoambanoꞌaono; fekihindo ampamo kaowu kafaraluuno dhunia.

²⁰ Tamaka intaodiomu ini, o liwuntoomu ingka te surugaa. Surugaamo dua anaꞌa so kamaiꞌaoꞌano Omputo Fosalamatino Yesus Kristus nentaa-ntaantoomu.

²¹ Nahumato kaowu Kristus nabhalii mbadha kasarantoomu monaleno ini naembali nasekatu bhe mbadhano wutono kumalabhiano. Kanandooꞌano peda anaꞌa mbaꞌinomo Kristus nokokuasa namotuhu sabhaha ndumandoono ne wiseno.