Filipi 2 - Muna Southern Dialect

Daseꞌise bhe damekapanda wuto peda Kristus 2:1-11

¹ Ingka notangkamo lalomiu mbaꞌinomo seꞌisemoomu bhe Kristus. Ingka notilawesi dua lalomiu mbaꞌinomo noniniangkoomu Kristus. Ingka pobhahi-bhahitieꞌomu weo kaseꞌise bhe Rohino Lahataꞌala. Ingka pomoa-moasiꞌaoꞌomu, pomoni-moniniꞌaoꞌomu.

² Dadiꞌanomo, hampano kosasawiꞌae naꞌa, fosangka kanaꞌeomu kawulano laloku: dadiomu sefekihi sekakolalo bhe sepatudhu, sekanini kaasi ne mie bhaimiu.

³ Koise konihabuomu mbaꞌinomo fekihi kaowu faraluuno wutomiu, tawa fekalangke diumiu. Tamaka fekapanda wutomiu, abhidaomu mie bhaimiu detaa dua andoa bhe wutomiua.

⁴ Ondofaoꞌomu faraluundo mie bhaimiu, koise taꞌo kaowu faraluuno wutomiu seemie-seemie.

⁵ Lalomiu tabeano napototo bhe lalono Kristus Yesus.

⁶ Mahingga Anoa sakotuꞌuno Lahataꞌala, miina nakopatudhu kanandoono pasae Lahataꞌala maitu namintahakie kansuhu.

⁷ Tamaka kosasawiꞌae naꞌa nofosipulie, maka nofokatu Wutono peda bhatua. Anoa nokatu mie, nodadi peda seemie manusia.

⁸ Anoa nofekapanda Wutono, neangka mpuu ne Lahataꞌala, sampe mate, nomate te sau salipu.

⁹ Kanandooꞌanomo Lahataꞌala nosangkee te wawono wawo, maka nowaꞌane nea te wawono sabhaha nea.

¹⁰ Neanomo weo neano Yesus sabhaha ndumandoono te surugaa, ne dhunia ini bhe we pandano dhunia, datumaohao sombado ne Anoa.

¹¹ Kosasawindo naꞌa daꞌumakui putae Yesus Kristus maitu o Ompu, somo kakalabhiano Lahataꞌala Amantoomu.

Tabeano dakotilanga peda kulipopo te lani 2:12-18

¹² Dadiꞌanomo bhahitieꞌi nemoasiꞌaoku, pedamo endefiꞌini nandoo kanau bhe hintimiu sadhia angkafiomu katangahiku, mangke-mangke aitu dopokodoꞌotiomu, gaoku mpuu sadaa-daa mangka kanauꞌomu. Uleiꞌe lalomiu so nasumangkaꞌao kasalamatimiu; dhalangieꞌomu weo kamihi bhe kafosibhala ne Lahataꞌala.

¹³ Kapaꞌamo wutono Lahataꞌala kumahadhaano weo totono lalomiu, sampe undaomu bhe poolieꞌomu dhalangiomu patudhu metaano Lahataꞌala.

¹⁴ O ae maka dua habumiu ⸤ metaaꞌano⸥ , tahabumoomu, koise kamuntu-muntuomua, koise potaga-tagaliomua.

¹⁵ Ane nada anaꞌa motiwohaemoomu ingka hintimiu anaꞌino Lahataꞌala tapa kodengo-dengono, metaano diu bhe melaano lalo, dumadino ne wunta-wuntando mie dhamani aini, kosikadhi modaino bhe kolilinono totono lalo. Hintimiu membaliomu tapedamo kulipopo te lani kotilangano ne wunta-wuntando andoa maitu,

¹⁶ poowa fintahakiomu bhe fosampeomu bhihita meowano dadi. Ane dadimiu nada naꞌa, ne oleo kahatoꞌano Kristus, naowoseangkoomu bhakeku. Kapaꞌamo anaꞌa katandainomo miina nasumia-siaꞌa apogolo, miina dua nasumia-siaꞌa aowuleangkoomu, ⸤ kahadhaaku nokohasili⸥ .

¹⁷ Bheanea damongko kanau, heaku kanggetumo kabubusino kapopanga nefoampemiu ne Lahataꞌala. Kapopangamiu anaꞌa maꞌanano o kaparasaea weo feompumiu ne Lahataꞌala. Ane nokotuꞌu nada anaꞌa, naowula laloku, aoꞌia bhe kosasawimiu itu.

¹⁸ Peda dua hintimiu, tabeano naowula lalomiu, moꞌiaꞌomu bhe idi.

Timotius bhe Epafroditus 2:19-30

¹⁹ Ane Ompu Yesus nofowaꞌao kalalesa, aposahunaꞌao paemo naomponaa atumudu Timotius namaiꞌikoomu, neanomo natilawesimo dua laloku ametingke bhihitamiu.

²⁰ Kapaꞌamo ampamo kaowu Timotius ini sefekihi sekakolalono bhe idi; pakade anoa nokotu-kotuꞌu noꞌondofao so kaetaaꞌamiu.

²¹ Kapaꞌamo sigaoꞌano sanea doꞌondofao kaowu faraluuno wutondo, suano faraluuno Yesus Kristus.

²² Ingka wohaemoomu bukutiino Timotius ini nokofahalaamo, anoa sadhia notulumi kanau weo foleleꞌano Bhihita Metaa, kabeanga anano bhe amano.

²³ Satipandeꞌaono losano parakaraku ini, patudhuku lasao atumudue namaiꞌikoomu.

²⁴ Tamaka aparasaea mpuu, ane Ompu namaꞌa kanau kalalesa, paemo dua naomponaa ahumatokomoomu wutoku.

²⁵ Ampa aitu ponamisiku nofaraluu amosuliangkoomu bhahitientoomu Epafroditus. Anoa ini tudueꞌomu nomai noꞌondofao faraluuku. Padamo nopobhai kanau weo kahadhaaku, nembali dua tantara peda idi ini ⸤ so Bhihita Metaa⸥ .

²⁶ So katifosuliꞌano, mbaꞌinomo nokambamo sepaliꞌa lalono ne kosasawimiu, nosabhamo bhe handano kapaꞌamo fetingkeomu nosaki.

²⁷ Nokotuꞌu daanumo nosaki, nomaꞌo namate. Tamaka Lahataꞌala nobhelaane lalo. Suano kaowu ne anoa, tamaka ne idi dua, keana sadhulu-dhulu kakompeahano laloku.

²⁸ Dadiꞌanomo sedhuluꞌamo dua kabhalano laloku amosuliangkoeꞌomu, neanomo poꞌawaaneomu kaowu moꞌiaꞌomu, totono laloku nahumempomo dua.

²⁹ Tahima metaaꞌeomu weo kawulano lalomiu peda seemie dua bhahitie weo Ompu. Fosibhaladaomu mie medano anoa ini.

³⁰ Kapaꞌamo mbaꞌinomo kahadhaano Kristus nomaꞌo namate; anoa nopotahoꞌao inawano nofokapo nekaemimiu weo kaꞌondofaomiu ne idi.