Filipi 1 - Muna Southern Dialect

Kalengkano suha 1:1-2

¹ Suha aini nomaiꞌao ne insaodi Paulus bhe Timotius, palima-limano Kristus Yesus. Tapakatue so kosasawimiu umati mongkilono Lahataꞌala seꞌiseno bhe Yesus Kristus meateno we Filipi, poowa-owaomu dua bhe neangkaꞌindo bhe umondofaono umati.

² Sio-siomo napobhaiangkoomu kabarakati bhe katohopono dadi maiꞌao ne Lahataꞌala Amantoomu bhe Ompu Yesus Kristus.

Katumpuno lalo bhe sambaheano Paulus 1:3-11

³ Taenomo afeꞌulaikoomu, sadhia aefoampe katumpuno lalo ne Lahataꞌala nesombaiku.

⁴ Taenomo dua asambahea so kosasawimiu sadhia nowula sepaliꞌa laloku.

⁵ Notumpu laloku ne Lahataꞌala mbaꞌinomo hintimiu mealaomu dawu tulumi kanauꞌomu weo foleleꞌano Bhihita Metaa, notanda oleo kabhao-bhaono ⸤ parasaeaꞌomu⸥ taꞌampamo aitu.

⁶ Aparasaea mpuu Lahataꞌala tumandakino kahadhaa metaa weo totono lalomiu ini, namokansuhue dua ampa natumoka ne oleo so kahatoꞌano Kristus Yesus.

⁷ Daanumo nopantasimo akoponamisi peda aini ne kosasawimiu, kapaꞌamo meateomu weo totono laloku. Hintimiu mealaomu dua dawu ne taka kawaꞌaoku ne Lahataꞌala, naetaa atitohongkumo ini, naetaa nandoo abebasi apotunduꞌao bhe afotipandeꞌao kantoono Bhihita Metaa.

⁸ Wutono Lahataꞌala sakusiino pugauku ini: nokamba mpuu laloku apoꞌawa bhe hintimiu, kapaꞌamo aoasiangkoomu tapedamo kanini kaasino wutono Yesus Kristus.

⁹ Sambaheaku sio-siomo kanini kaasimiu sadhulu-dhulu kabhahi ampa napontalabhi-labhi, nasedhuluꞌa dua mandeꞌaoꞌomu kabanara bhe meꞌawaomu fekihi kotimbangi.

¹⁰ Ane nada anaꞌa, mandemoomu mepiliomu foliuno kataa. Dadimiu naongkilo, pae nakodengo-dengoa ne oleo kahatoꞌano Kristus.

¹¹ Maꞌanano dadimiu naoponoꞌao podiu metaa nehabuno Yesus Kristus, nada sau kobhake metaano. Kosasawiꞌae ini somo damekakalabhiaꞌao bhe damudhiꞌao Lahataꞌala.

Dodadi so Kristus 1:12-30

¹² Bhahitieꞌiku, gaoku mandeꞌaaneomu putae kumadhadhiaꞌano ne idi ini ⸤ maꞌanano dotohongku kanau ini⸥ , mbali kaowu nofodhuluꞌao kaꞌewano leleno Bhihita Metaa.

¹³ Mbaꞌinomo kadhadhia aitu, nentaleamo ne kosasawindo dhagano kamali bhe mie sigaoꞌano weo kota ini putae idi ini dotohongku kanau hampano afeompu ne Kristus.

¹⁴ Mbaꞌinomo dotohongku kanau, dobhahi dua bhahitie marasaeano ne kota ini sedhuluꞌa kamatangkano kaparasaeando ne Ompu, sampe sedhuluꞌa dua kakadondo, miinamo dakateꞌi-teꞌia defolele bhoasaono Lahataꞌala.

¹⁵ Daanumo nandoo mie mefoleleno bhihitano Kristus dhohono kakonduano lalo ne idi bhe sadhia dopoindalo dopotagali, tamaka sigaoꞌano defolele bhihitano Kristus maiꞌao ne totono lalo mohelasi.

¹⁶ Andoa melaano lalo ini dohabu peda aini mbaꞌinomo kanini kaasindo ne Lahataꞌala bhe ne idi, kapaꞌamo dopandeꞌaane kahatoꞌaku ne ini so apotunduꞌao Bhihita Metaa.

¹⁷ Tamaka sigaoꞌano saꞌituini defolele bhihitano Kristus nomaiꞌao ne totono lalo modai, doꞌondofi kaowu faraluuno wutondo. Kunaꞌendomo habundo naꞌa natumubhahi kasabhaku weo katohongku ini.

¹⁸ Ampamo kaowu pae naoafaa; tanaꞌumala tanaongkilo patudhuno, ingka bhihitano Kristus dofolelee, nada amai maka dua dhalano, kaoꞌiaꞌakumo. Kaꞌiano laloku sadaa-daa,

¹⁹ kapaꞌamo apandeꞌaane mbaꞌinomo sambaheamiu bhe katulumino Rohino Yesus Kristus damolapa kanau.

²⁰ Nemokambaꞌaono laloku bhe neposahunaꞌaoku, putae nehabuku ini pae aoambanoanea, tamaka sadaa-daa aokado apugau, mangke-mangke ne wakutuu aini. Neanomo mbadhaku ini somo mekakalabhiano Kristus, naetaa weo dadiku, naetaa weo mateku.

²¹ Dadiku ini so Kristus; mateku aabhiemo dua labaku.

²² Tamaka ane sadaa-daa adumadi ne dhunia ini, nokomaꞌana kahadhaaku nasedhuluꞌa hasilino. Dadiꞌanomo miina amandeꞌaane medano ae so nepiliku.

²³ Kohaahondaꞌae ini dopohela kanau: gaoku ahumunsa dhunia ini maka aeate bhe Kristus, kapaꞌamo anaꞌa foliuno kataa.

²⁴ Tamaka nandoo nofaraluu so hintimiu adumadi ne dhunia ini.

²⁵ Aparasaea mpuu bhe apandeꞌaanemo putae nandoo sumadaa-daa aeate bhe hintimiu, neanomo sadhulu-dhulu katangkano kaparasaeamiu bhe kawulano lalomiu.

²⁶ Ane asumuli kaowu we itu, hintimiu nasedhuluꞌa dua kawoseno bhakemiu ne Yesus Kristus mbaꞌinomo idi.

²⁷ Ampamo kaowu, kodadimiu tabeano naposahataa bhe wambano Bhihita Metaano Kristus. Ane nada anaꞌa, naetaa amai amohakoomu toha, naetaa pae amai ametingke kaowu bhihitamiu, tetewei amandeꞌaane putae notangkamo kofindamiu, sepatudhuomu, sekakolaloomu poewangiomu so kaparasaea ne Bhihita Metaa.

²⁸ Koe tihandaomu ne mie mewangikoomu, sadhia fekatangka lalomiu. Poewangiꞌamiu naꞌa somo katandaino andoa dabinasamo, hintimiu sumalamatiomu. Kosasawiꞌae naꞌa nomaiꞌao ne Lahataꞌala.

²⁹ Kapaꞌamo Lahataꞌala padamo nowaꞌangkoomu rahamati suano kaowu marasaeaꞌomu, tamaka dua menamisiomu kakadee-dee so Kristus.

³⁰ Aitu hintimiu mealaomu dua dawu weo poewangiꞌa pototoꞌano bhe idi. Poewangiꞌa naꞌa ingka wohaeꞌomu adhalangie endefiꞌini sampe taꞌampamo aitu, pedamo nefetingkemiu itu.