Filemon 1 - Muna Southern Dialect

Kalengkano suha 1-3

¹ Filemon, bhahitie timoasiꞌaono bhe sabhangka mani weo kahadhaano Ompu! Suha aini nomaiꞌao ne idi, Paulus bhe bhahitientoomu Timotius. Idi ini seemie katohongku hampano kaparasaea ne Kristus Yesus.

² Suha mani ini so dua Apfia bhahitientoomu hobhine, bhe Arkipus posabhangkaꞌantoomu dopotunduꞌao Bhihita Metaa, bhe kosasawindo umati humompuno we lambumu itu.

³ Sio-siomo kabarakati bhe katohopono dadi maiꞌao ne Lahataꞌala Amantoomu bhe Ompu Yesus Kristus sadhia napobhaiangkoomu.

Katumpuno lalono Paulus ne Filemon 4-7

⁴ Taenomo asambahea sadhia asambiliko bhe notumpu laloku ne Lahataꞌala,

⁵ kapaꞌamo afetingkeemo kanini kaasimu ne umati mongkilono bhe kaparasaeamu ne Ompu Yesus.

⁶ Asambahea sio-siomo dadi pobhahitie weo kaparasaeantoomu nakohasili metaa, maꞌanano nasedhuluꞌa dua dalumosangie sabhaha kabarakati netahimantoomu hampano doseꞌisemo bhe Kristus.

⁷ Filemon, bhahitieku, kaasimu ne umati marasaeano itu nofekaꞌia bhe nofekatangka mpuu totono laloku, bhahamoa fodadiemo dua lalondo kosasawindo umatino Lahataꞌala.

Kamesalono Paulus so Onesimus 8-22

⁸ Dadiꞌanomo, peda seemie bhahitiemu weo Kristus, o idi sakotuꞌuno akohaku amahintangiko mehabu maraluuꞌano so nehabu.

⁹ Tamaka hampano kanini kaasi, koemo amahintangiko, naetaamo aesaloiko. Idi ini Paulus, akamungkulamo kaꞌasi, pakade atitohongku mbaꞌinomo kaparasaeaku ne Kristus.

¹⁰ Aitu aesalo mpuu ne hintu so anaku Onesimus. Anoa ini akonaemo dua anaku hampano apoolie afoparasaeaꞌe ne Kristus tangasano aeate weo katohongku ini.

¹¹ Daanumo endefiꞌini anoa ini miina nakofahalaaꞌa so hintu, tamaka ampa aitu nokofahalaamo sepaliꞌa naetaa so idi, naetaa so hintu.

¹² Aitu anaꞌi kamoasiꞌaoku sepaliꞌa ini, atuduemo nasumuli we hintu.

¹³ Sakotuꞌuno gaoku aꞌumeleꞌaane we ini so umondofa kanau, kanggetumo dua wutomu, tangasano aeate weo katohongku ini hampano Bhihita Metaa.

¹⁴ Ampamo kaowu akiido akonihabu ane paeꞌo dapoꞌuumbeti bhe hintu. Patudhuku, habu metaamu naꞌa koemo mbaꞌinomo dofosuhuko, tamaka namaiꞌao weo kahelasino totono lalomu.

¹⁵ Bheanea patudhunomo Lahataꞌala nopogaatiangkoomu sebantaha kaowu, neanomo sumuli tumahimae ampa suhue dhamani.

¹⁶ Aitu anoa suanomo seemie bhatua, tamaka nolaloiꞌemo, ingka nembalimo seemie bhahitiemu timoasiꞌaono. Sanginomo o idi aoasianemo, bhemo toha hintu. Tantumo moasiane, naetaa mbaꞌinomo mie bhaimu, naetaa mbaꞌinomo bhahitiemu weo Ompu.

¹⁷ Dadiꞌanomo ane kona kanau pobhaiꞌamu weo kahadhaano Ompu, suli tahimae kanggetumo tahima idi.

¹⁸ Ane padamo nofekahugiko tawa nokodosa ne hintu, fewowoꞌoni kanaꞌe idi bhahi-bhahiꞌae.

¹⁹ Naetaa dua abuhiangkoe amake limaku wutoku: Idi, Paulus, so dumudue. (Tantumo miina namaraluua ameꞌulaiangkoe, ingka hintu itu bhe dosamu dua ne idi. Nepulaoꞌaoku naꞌa dadi buꞌou netahimamu pakaparasaeamu).

²⁰ Dadiꞌanomo bhahitieku, aefetulumi mpuu ne hintu hampano dopobhahitie weo Ompu; lawesi kanau, ingka intaodi doseꞌisemo bhe Kristus.

²¹ Kaebuhiꞌaku suha aini, hampano aparasaea mpuu mangkafie kamesaloku ini. Bhahamoa apandeꞌaane dua so nehabumu itu nalumiuꞌe kamesaloku ini.

²² Tadua sehonda kamesaloku: mefontaa-ntaa kanau so kabutuꞌaku, kapaꞌamo aposahunaꞌao hampano sambaheamu, dapikifosuli kanau we hintimiu.

Kasongkono suha 23-25

²³ Epafras nofosampeangko salam. Anoa ini sabhangkaku weo katohongku ini hampano kaparasaea ne Kristus Yesus.

²⁴ Salam nomaiꞌao dua ne Markus, Aristarkus, Demas bhe Lukas, andoa sanea sabhangkaꞌiku weo kahadhaano Ompu we ini.

²⁵ Sio-siomo kabarakatino Ompu Yesus Kristus sadhia napobhaiꞌao totono lalomiu!