Efesus 6 - Muna Southern Dialect

Anaꞌi bhe kamungkulando 6:1-4

¹ Hintimiu anaꞌi, meangkaomu ne kamungkulamiu, kapaꞌamo aituꞌaemo mantasiꞌano so mie marasaeano ne Kristus.

² “Fosibhalae inamu bhe amamu,” aini o pahintano Lahataꞌala kabhao-bhaono nepoangkafiꞌaono bhe dhandino peda aini,

³ “So naetaaꞌao namisimu bhe naewantaꞌao dadimu te dhunia.”

⁴ Bhahitieꞌi membalino ama, koise foꞌamahadaomu anaꞌimiu, tamaka fekabhalada, tangahida bhe waꞌanda kafoinaꞌuno Ompu.

Bhatua bhe kafeompuꞌa 6:5-9

⁵ Hintimiu bhatua, meangkaomu ne kafeompuꞌamiu te dhunia ini. Fosibhaladaomu bhe meangkaomu mpuu maiꞌao weo totono lalomiu mohelasiꞌano, peda meangkaomu ne wutono Kristus.

⁶ Koise meangkaomu ane doꞌondo-ondokoomu kaowu, so tipudhiꞌaoꞌomu; tamaka kotu-kotuꞌu habueꞌomu peda bhatuano Kristus dhumalangino kapoindalono Lahataꞌala sampuu-mpuuno lalono.

⁷ Fekaꞌiaꞌeomu lalomiu kahadhaaꞌomu peda seemie bhatua, kao-kaomo feompuniꞌiomu wutono Ompu, suano manusiaꞌa.

⁸ Ingka pandeꞌaanemoomu, ane dohabu metaaꞌano, tetewei daeꞌawa kabhoosino maiꞌao ne Ompu, naetaa bhatua naetaa mie bebasi.

⁹ Hintimiu membalino kafeompuꞌa, habuomu dua nada naꞌa ne bhatuamiu. Koise sadhia kateꞌifidaomu. Tandaiꞌeomu hintimiu bhe bhatuamiu nopototo kafeompuꞌamiu, seemie kaowu te surugaa. Anoa maitu miina naepoꞌala-alaꞌao manusia.

Ewangano Lahataꞌala 6:10-20

¹⁰ Panda-pandano, fekamatangkaomu wutomiu weo Ompu, mealaomu kaꞌosa ne kuasano Lahataꞌala.

¹¹ Fokanaomu sabhaha katokano ewanga newaꞌaono Lahataꞌala, so naotangkaꞌao ehemiu poewangiꞌaoꞌomu bhe akala ngkowawe maiꞌao ne Kafeompuꞌando seetani.

¹² Kapaꞌamo intaodiomu miina dapoewangi bhe mbadha tiwohaꞌano, tamaka doewangi sabhaha rohi modai kokuasano te antara. Doewangiomu dua mintahano kuasa, neangkando seetani bhe kuasa mohohondo te dhunia ini; andoa ini saneamo kumuasaino dhamani modai ini.

¹³ Dadiꞌanomo fokanaeꞌomu sabhaha katokano ewanga newaꞌaono Lahataꞌala, neanomo nahumato oleo modai naꞌa mooli poewangiomu. Neanomo dua sampe namalusi popahisaꞌa, hintimiu sadaa-daa naotangka koehemiu.

¹⁴ Fekatangkae kofindamiu, sadhia habuomu banaraꞌano, somo mekamatangkakoomu kanggetu kawawe ne aamiu. Pakeomu podiu kaꞌadhili, somo bentengino mbadhamiu, kanggetu bhadhu uti.

¹⁵ Naohelasi totono lalomiu mefolele Bhihita Metaa meowano katohopo, sadhia pakeeꞌomu kanggetu kausu motangka ne aꞌemiu.

¹⁶ Weo ehe mengkohamiu sadhia pakeomu kaparasaeamiu ne Ompu so bentengikoomu, kanggetu ani bentengino mbadhamiu. Kapaꞌamo kaparasaeamiu namondoiꞌe nameoni sabhaha pana koefi maiꞌaono ne Kafeompuꞌando seetani.

¹⁷ Tahimaeꞌomu kasalamati neꞌawamiu ne Lahataꞌala, maka fokanaeꞌomu kanggetumo songkono tantara bentengino fotumiu. Tahimaeꞌomu dua Bhoasaono Lahataꞌala, kanggetumo kampuemiu maiꞌaono ne Rohino Lahataꞌala.

¹⁸ Habue bhahi-bhahiꞌae naꞌa poowa sambaheaꞌomu mesaloomu katulumino Lahataꞌala. Sadhia sambaheaꞌomu angkafiomu kaatono Rohino Lahataꞌala, o ae maka dua nehabumiu. Kodhagaomu weo sambaheamiu, koe fenga-fengaasia mesaloomu so kosasawindo umati mongkilono.

¹⁹ Sambaheaꞌomu dua so idi, neanomo ane amugau, Lahataꞌala namaꞌa kanau pugau kumantibha bhe aokado aefolele rahasiano Bhihita Metaa.

²⁰ Ingka hampanomo Bhihita Metaa aini, katituduꞌakumo sampe dotohongku kanau. Sambaheaꞌomu neanomo aokado amugauꞌao Bhihita Metaa ini, pedamo mantasiꞌano so idi.

Kafohato bhe kasongkono suha 6:21-24

²¹ Tikikus namai namohatoangkoomu bhahi-bhahiꞌae netompaloiku we ini. Tikikus ini bhahitientoomu timoasiꞌaono bhe kumampuu-mpuuno weo kaꞌondofao ne Ompu. Patudhuku neanomo mandeꞌaaneomu dua ngkoha-ngkohaku bhe kahadhaaku we ini.

²² Ingka ainiꞌaemo patudhuno katituduꞌano te hintimiu, so mandeꞌaoꞌomu ngkoha-ngkoha mani we ini bhahi kaowu natilawesi dua lalomiu.

²³ Sio-siomo katohopono dadi, kanini kaasi bhe kaparasaea maiꞌao ne Lahataꞌala Amantoomu bhe maiꞌao ne Ompu Yesus Kristus sadhia napobhaiꞌao kosasawindo bhahitie marasaeano.

²⁴ Sio-siomo Lahataꞌala nabarakatikoomu kosasawimiu moasiꞌaono Ompuntoomu Yesus Kristus weo kanini kaasi tapa mowoowolono.