Efesus 5 - Muna Southern Dialect

Dodadi ne mentaleaꞌano 5:1-20

¹ Hintimiu anaꞌino Lahataꞌala nemoasiꞌaono. Dadiꞌanomo weo dadimiu angkafiomu sandaha nefotiwohano Lahataꞌala.

² Dadimiu tabeano nakumabhintie kanini kaasi, peda wutono Kristus nofomoasiꞌao. Nofotawakalamo Wutono so intaodiomu sampe dopongkoe. Anoa nembali kapopanga mowondu nefoampe ne Lahataꞌala, mekaꞌianomo lalono Lahataꞌala.

³ Hintimiu umati mongkilono Lahataꞌala, dadiꞌanomo miina namantasia mepakeomu podiu pokawite-wite bhe pokahaku tawa kakadau-dau. Podiu medando aini mahingga sumambilieꞌomu koise.

⁴ Pedamo dua wamba hamesa, wamba ngkabhohe-bhohe, tawa wamba pokahaku, miina namantasia pugauaneomu, tamaka mefoampeomu katumpuno lalo ne Lahataꞌala.

⁵ Tandaiꞌeomu kotu-kotuꞌu: mie pokawite-witeno, mie pokahaku bhe mie kumadau-dauno pae namantasia daeala dawu weo kafopahintaꞌano Kristus bhe Lahataꞌala. O kakadau-dau ini ingka nopototo bhe desombai barahala.

⁶ Koise dobhohe-bhoheꞌiangkoomu sabhaha pugau tapa kofahalaa, kapaꞌamo podiu medando naꞌa neowa amahano Lahataꞌala ne mie tapa meangkano.

⁷ Koise posabhangkaomu bhe mie pedando naꞌa.

⁸ Daanumo endefiꞌini hintimiu meateomu weo kahohondo, tamaka ampa aitu pesuamoomu we mentaleaꞌano, seꞌisemoomu bhe Ompu. Dadiꞌanomo dadiomu peda mie meateno ne mentaleaꞌano.

⁹ Kapaꞌamo maiꞌao we mentaleaꞌano notiumba sabhaha podiu metaa, kaꞌadhili, bhe kabanara.

¹⁰ Ulei lalomiu so mandeꞌaoꞌomu o ae mekaꞌiano lalono Lahataꞌala.

¹¹ Koise kaangka-angkaomu ne habundo mie meateno weo kahohondo, kapaꞌamo habundo miina nakofahalaaꞌa. Tamaka podiu modaindo itu fekantaleaꞌieꞌomu te wisendo mie bhahi.

¹² Kapaꞌamo habundo tifebunino maitu tadosambili kaowu ingka notimoambanoꞌaomo.

¹³ Sabhaha habu pedano naꞌa, ane noꞌulawie kantalea te wisendo mie bhahi, ingka notiwohamo sifatino sakotuꞌuno.

¹⁴ Kapaꞌamo bhahi-bhahiꞌae tiwohaꞌano, tantumo nentalea. Kanandooꞌanomo dokowambaane peda aini, “Wanumo hintu moodono, wanumo maiꞌao ne mate, maka naꞌumulawiko tilangano Kristus.”

¹⁵ Dadiꞌanomo ondofaane fekataa-taaꞌe dadimiu. Koe dadi ngkabhohe-bhoheomu, tamaka dadiomu peda mie mande.

¹⁶ Kotika bhe kasalawa, pake metaaꞌeomu, kapaꞌamo dhamani aini dhamani modai.

¹⁷ Kanandooꞌanomo koise kabhohe-bhoheomu, tamaka uleiꞌeomu lalomiu ondofiomu kapoindalono Ompu.

¹⁸ Koise mololanuomu, kapaꞌamo kalolanu neowa nafusuu fodai-daino, tamaka naetaa umulei lalomiu sadhia nakumabhintikoomu Rohino Lahataꞌala.

¹⁹ Ane potula-tulaomu, pakeomu lagu mazmur ne Kitabino Daud, lagu-laguno kapudhi bhe lagu-lagu lumebeno. Melagu bhe moꞌiaꞌomu so Ompu sampuu-mpuuno lalomiu.

²⁰ Sadhia mefoampeomu katumpuno lalo ne Lahataꞌala Amantoomu weo neano Omputo Yesus Kristus, o ae maka dua neꞌawamiu.

Kanini kaasino Kristus kaengkohaꞌanomo polambu 5:21-33

²¹ Potuhu-tuhupiomu hampano kafosibhalamiu ne Kristus.

²² Hintimiu hobhine, tuhupieꞌomu moꞌanemiu peda katuhumiu ne Ompu.

²³ Kapaꞌamo o moꞌane nofefotuꞌao hobhine, nopototo bhe Kristus nofefotuꞌao umatino. Wutonomo Kristus mosalamatino mbadhano, maꞌanano umatino.

²⁴ Pedamo umati marasaeano dotuhu ne Kristus, pedamo dua aitu o hobhine sadhia natumuhu ne moꞌaneno.

²⁵ Hintimiu moꞌane, moasianeomu hobhinemiu pedamo Kristus noasiꞌao umatino, nofotawakalaanda Wutono sampe nomateanda.

²⁶ Kristus nohabu peda naꞌa so namekangkiloꞌao umatino. Dhosando padamo nofekanggelaanda kakadiu sarani bhe bhoasaono.

²⁷ Kahabuꞌano peda amaitu, neanomo namowa umatino te wiseno Wutono ⸤ peda loꞌia buꞌou hobhine⸥ , naombena ulano, pae nakotindu-tindua, pae nakongkuhu-ngkuhua tawa kadengo sigaoꞌano, tamaka umati daongkilo bhe pae dakodengo-dengoa.

²⁸ Pedamo dua aitu o moꞌane tabeano naoasiꞌao hobhineno nameda kaasino ne mbadhano wutono. Mie moasiꞌaono hobhineno ingka noasiꞌaomo dua wutono.

²⁹ Kapaꞌamo miina bhe mie bansino mbadhano wutono, tamaka tetewei nodambaꞌaane bhe nopiarae, pedamo dua Kristus nodambaꞌaanda umatino.

³⁰ Katipandeꞌaoꞌano ingka intaodiomu ini saneamo katokano mbadhano Kristus.

³¹ ⸤ Notibuhi weo Kitabi,⸥ “Dadiꞌanomo o moꞌane tetewei nahumunsa inano bhe amano maka naseꞌise bhe hobhineno, sampe kohoduando daembalimo seemie.”

³² Wamba aini nendalo maꞌanano tamaka ampa aitu nentaleamo, maka nepulaoꞌaoku ini o pokaiꞌano Kristus bhe umatino.

³³ Mahinggamo nada amai, hintimiu moꞌane seemie-seemie tetewei moasiane hobhinemu nameda kaasimu ne wutomu; hintimiu hobhine fosibhalaeꞌomu moꞌanemiu.