Efesus 3 - Muna Southern Dialect

Kahadhaano Paulus so mie suano Yahudi 3:1-13

¹ Kanandooꞌanomo idi, Paulus asambaheaꞌangkoomu. Idi ini atitohongku hampano afeompu ne Kristus Yesus bhe aꞌondofao hintimiu mie suano Yahudi.

² Teteweimo fetingkemoomu putae weo rahamatino, Lahataꞌala nowaꞌa kanau taka kaꞌondofao aembali rasulu so hintimiu.

³ Lahataꞌala nofekantaleaꞌi kanaꞌe rahasiano patudhuno, ingka padamo abuhiangkoeꞌomu, mahinggamo seendai kaowu.

⁴ Ane basaeꞌomu, naembalimo dua mandeꞌaaneomu rahasiano Kristus peda nelosangiku.

⁵ Ne dhamani wawono rahasia aini miina sepaliꞌa damotiwohae ne manusia, tamaka ampa aini nofekantaleaꞌiemo Rohino Lahataꞌala ne rasuluꞌi bhe ana-anabii mongkilono.

⁶ Rahasia anaꞌa peda aini: noangka ne foleleꞌano Bhihita Metaa mie suano Yahudi deꞌawamo dua dawu ne kabarakati nefontaa-ntaano Lahataꞌala so miendo Yahudi. Mie suano Yahudi dembalimo dua katokano mbadha dosembadhamo bhe miendo Yahudi. Andoa dotahimamo dua dhandino Lahataꞌala weo kaseꞌisendo bhe Kristus Yesus.

⁷ Lahataꞌala nowaꞌa kanau taka amolele Bhihita Metaa anaꞌa. Taka kaꞌondofao aini atahimae nopobutu bhe rahamatino Lahataꞌala, amondoiꞌe hampano kuasano Wutono kumahadhaano ne idi.

⁸ Idi ini mie we pandano panda ne olotando umati mongkilono Lahataꞌala. Mahinggamo pedamo aini, Lahataꞌala nofotiwoha kanau rahamatino nowaꞌa kanau takaku ini: aefolele Bhihita Metaa ne mie suano Yahudi, aefebhihitaianda kabhalano kabarakatino Kristus pata tikiha-kihano so intaodiomu.

⁹ Nowaꞌa kanau dua taka amekantaleaꞌie ne kosasawindo manusia nada amai so nakoꞌulaꞌao patudhuno Lahataꞌala maitu. Patudhuno Lahataꞌala mokonandoono bhahi-bhahiꞌae ini, notifebuni mpini dhamani wawono.

¹⁰ Patudhuno Lahataꞌala, ampa aitu sabhaha mintahano kuasa bhe rohi neangka te antara, damandeꞌaane dua kandalono fehikino Lahataꞌala mangkaꞌano ne umatino.

¹¹ Nehabuno Lahataꞌala ini noposahataa bhe patudhuno mpini kabhao-bhaono, nefekakoꞌulano ne Kristus Yesus Ompuntoomu.

¹² Weo kaseꞌisentoomu bhe Anoa, dokadomoomu domaꞌoti wiseno Lahataꞌala hampano kaparasaeanto, lalonto miinamo napoibhahaa.

¹³ Dadiꞌanomo aesalo ne hintimiu, koise nondidiki lalomiu fetingke kanauꞌomu akadee-dee so hintimiu, kapaꞌamo kakadee-deeku ini so kaetaaꞌamiu.

Sambaheano Paulus 3:14-21

¹⁴ Hampanomo kosasawiꞌae ini, afongkoha tuuku asambahea ne wiseno Amantoomu.

¹⁵ Kosasawindo lee walakando manusia, naetaa te surugaa naetaa we dhunia ini saneamo siwuluno metahimano dadi ne Anoa.

¹⁶ Asambahea sio-siomo Lahataꞌala kumalabhiano kuasa, namekatangka totono lalomiu, namekaꞌosaane Rohino.

¹⁷ Sio-siomo hampano kaparasaeamiu, Kristus naeate kansuhu weo totono lalomiu, maka dadimiu naengkoha bhe nakopahaka weo kanini kaasi.

¹⁸ Asambahea dua, sio-siomo poowa-owaomu bhe kosasawindo umati mongkilono, mondoiꞌeomu lumosangieꞌomu kaꞌewano, kawantano, kalangkeno bhe kandalono kanini kaasino Kristus pata tikiha-kihano.

¹⁹ Sio-siomo kanini kaasi anaꞌa lumosangieꞌomu, mahinggamo sakotuꞌuno pae damondoiꞌe damahamue, neanomo dadimiu nakumabhintiemo sifatino Lahataꞌala foliuno kasumangka.

²⁰ Kabhalano maka kuasano Lahataꞌala kumahadhaano weo totono lalontoomu, sampe nemondoino Lahataꞌala noliuꞌe sabhaha kamesalo bhe nefekihintoomu, nobhala mpuu poꞌalaꞌano.

²¹ Nopantasimo mpuu namangka ne Kristus Yesus, Lahataꞌala damekakalabhiaꞌe pomantulu-ntulu weo umatino ampa suhue dhamani. Amin.