Efesus 2 - Muna Southern Dialect

Domaiꞌao ne mate dohope ne dadi 2:1-10

¹ Endefiꞌini hintimiu kao-kaomo momateomu hampano kodhosaomu bhe kangkalaꞌiomu pahintano Lahataꞌala.

² Wakutuu anaꞌa dadimiu noangkafi kaneano dhunia ini, maꞌanano meangkaomu ne Kafeompuꞌando kuasa modai te antara. Anoamo maitu rohi kumuasaino totono lalondo mie pata meangkano ne Lahataꞌala taꞌampamo aitu.

³ Sakotuꞌuno endefiꞌini kosasawintoomu nopototo dua bhe andoa; dodadi doangkafi nafusuu bhe kapoindalono mbadha bhe fekihi modai. Sakotuꞌuno nopantasi mpuu Lahataꞌala nafoꞌamahaki, peda dua andoa maitu.

⁴ Tamaka kapontalabhi-labhino maka rahamatino Lahataꞌala! Hampano kabhalano kanini kaasino ne intaodiomu,

⁵ Lahataꞌala nofodadi kaita dopoowa bhe Kristus, mahinggamo domatemoomu hampano dokangkalaꞌi pahintano. Tandaiꞌeomu, hintimiu nofosalamatikoomu Lahataꞌala hampano kataano lalono.

⁶ Hampano kaseꞌisentoomu bhe Kristus Yesus, Lahataꞌala nofowanu kaitamo dua maiꞌao ne mate maka nowaꞌa kaita dua kaengkohaꞌa dopoowa-owa bhe Kristus te surugaa.

⁷ Patudhuno Lahataꞌala neanomo ne dhamani te wise namotiwoha kabhalano kataano lalono ne intaodiomu ini. Kataano lalono bhe kanini kaasino nofosampue ne intaodiomu noangka ne Kristus Yesus.

⁸ Katifosalamatiꞌamiu hampano rahamatino Lahataꞌala, noangka ne kaparasaeamiu ne Kristus. O kasalamati maitu suano hasilino kahadhaano wutomiu, tamaka kotu-kotuꞌu katohaino Lahataꞌala.

⁹ Suano hasilino habumiu, keana bhe so sumangke-sangkeno wutono mbaꞌinomo nosalamati.

¹⁰ Intaodiomu ini kahabuno Lahataꞌala. Noangka ne Kristus Yesus, Lahataꞌala nofokonandoo kaita so dahumabu metaaꞌao peda nefontaa-ntaano wawo so intaodiomu.

Doseꞌise bhe Kristus 2:11-22

¹¹ Dadiꞌanomo bhahitieꞌiku, feꞌulaiꞌeomu koeatemiu endefiꞌini. Miendo Yahudi dokona hintimiu suano miendo Yahudi “o mie tapa nesuna”, ⸤ kapaꞌamo miendo Yahudi maitu doabhi wutondo andoamo kaowu umatino Lahataꞌala hampano padamo desuna.⸥ Gahaꞌaitumo kasuna naꞌa ingka dohabue kaowu mie ne mbadhano manusia.

¹² Wakutuu anaꞌa miinaꞌo bhe taiꞌamiu ne Kristus, hintimiu mie we sembalino miendo Israel, miinaꞌo tilentuomu umati nepilino Lahataꞌala. Miinaꞌo dua mealaomu dawu weo podhandino Lahataꞌala toka nedhandiꞌaono ne umatino. Hintimiu dadiomu te dhunia miinaꞌo bhe neposahunaꞌaomiu, miina dua mandeꞌaoꞌomu Lahataꞌala.

¹³ Tamaka ampa aitu nobhaliimo hampano kaseꞌisemiu bhe Kristus Yesus. Endefiꞌini hintimiu mokodoꞌoomu bhe Lahataꞌala, tamaka hampano tuhuno heano Kristus ampa aitu momaꞌomoomu.

¹⁴ Kapaꞌamo wutono Kristus meowanomo pometaaꞌa, moseꞌiseno miendo Yahudi bhe suano Yahudi. Anoamo sumansano kahondomi kumanteeno miendo Yahudi bhe mie suano Yahudi, maꞌanano nofosalimo powengkeꞌando.

¹⁵ Kapaꞌamo mateno Kristus peda seemie manusia nofosaliemo tubhono agama Yahudi bhe sabhaha pahinta bhe atorano. Patudhuno neanomo bansano liwu haa onuno ini daembali naseꞌonu bansano liwu buꞌou seꞌiseno bhe Kristus. Pedamo naꞌa neowa pometaaꞌa.

¹⁶ Mateno Kristus te sau salipu nofoseꞌisemo bansano liwu haa onuno maitu maka nopometaaꞌanda bhe Lahataꞌala. Dadiꞌanomo powengkeꞌando nofosuniemo.

¹⁷ Kristus nomai neowa Bhihita Metaano pometa-metaaꞌa, naetaa ne hintimiu mie suano Yahudi mokodoꞌono bhe Lahataꞌala, naetaa ne miendo Yahudi momaꞌono bhe Lahataꞌala.

¹⁸ Hampano nehabuno Kristus, intaodiomu naetaa miendo Yahudi naetaa suano, deꞌawamoomu kaangkaꞌa kapesuaꞌa damewise ne Lahataꞌala, saneamo weo katulumino Rohino Lahataꞌala seꞌise-isemo.

¹⁹ Dadiꞌanomo, hintimiu suanomo mie we sembali tawa mie humampe. Ampa aitu hintimiu saneamo saliwuno umati mongkilo, saneamo dua mie weo polambuno Lahataꞌala.

²⁰ Hintimiu tapedamo lambu bhalano, nefoeheno Lahataꞌala te wawono kontu sandi. Sandi anaꞌa padamo dofongkohae rasuluꞌi bhe ana-anabii. Sandi foliuno kabhala ingka wutono Kristus.

²¹ Weo kaseꞌiseno bhe Kristus katokano koseꞌonu lambuꞌae, netaa potudu-tuduꞌano bhe dhulu kabhala, nembali lambu mongkilo nefekopuuni ne Lahataꞌala.

²² Hampano kaseꞌisemiu bhe Kristus, maka hintimiu dua tangasano dopotudu-tudumiangkoomu bhe mie bhaimiu membaliomu seꞌonu lambu so Lahataꞌala, somo kaeateꞌano Rohino.