Efesus 1 - Muna Southern Dialect

Kalengkano suha 1:1-2

¹ Suha aini nomaiꞌao ne idi, Paulus, rasuluno Kristus Yesus hampano kapoindalono Lahataꞌala. Apakatue so hintimiu umati mongkilono Lahataꞌala we Efesus, motangkano kaparasaea ne Kristus Yesus.

² Sio-siomo kabarakati bhe katohopono dadi maiꞌao ne Lahataꞌala Amantoomu bhe ne Kristus Yesus, sadhia napobhaiangkoomu.

Kahangkaeando mie tipilino 1:3-14

³ Pudhi kaitaomu Lahataꞌala, Amano Ompuntoomu Yesus Kristus, kapaꞌamo weo kaseꞌisentoomu bhe Kristus nowaꞌa kaita sabhaha kabarakati maiꞌao te surugaa.

⁴ Mpini miinaꞌo natifokonandoo dhunia, Lahataꞌala nofopilimo noangka ne Kristus, neanomo daembali mie mongkilo bhe pata kodengono ne wiseno.

⁵ Hampano kanini kaasino, Lahataꞌala tokamo nofotantue wawo, putae namangka ne Yesus Kristus intaodiomu nasumangke kaita dembaliomu anaꞌino. Ingka pedamo naꞌa kapoindalono bhe patudhuno.

⁶ Nopantasimo mpuu damekakalabhia Lahataꞌala, kapaꞌamo nofotohaiꞌao kanini kaasino noangka ne Anano kamoasiꞌaono.

⁷ Hampano tuhuno heano Kristus bhe kaseꞌisentoomu bhe Anoa, Lahataꞌala nofobebasi kaitamo, maꞌanano noꞌamponiemo dhosantoomu, noposahataa bhe kabhalano rahamatino.

⁸ Kanini kaasi naꞌa nowaꞌa kaitae nopontalabhi-labhi, nopoangkafi bhe kakotimbangino bhe kasangkano fahamuno.

⁹ Hampano kapoindalono Wutono, Lahataꞌala nofohato kaitaomu patudhuno nefebunino endefiꞌini. Patudhuno naꞌa tokamo nobhotusie wawo nakoꞌula namangka ne Kristus.

¹⁰ Patudhuno anaꞌa peda aini: bhahi-bhahiꞌae ndumandoono te surugaa bhe we dhunia namoseꞌiseda bhe Kristus somo neangkando. Aini tetewei namekakoꞌulae Lahataꞌala, nahumato kaowu tempono.

¹¹ Lahataꞌala nofokonandoo bhahi-bhahiꞌae noposahataa bhe kapoindalono bhe patudhuno Wutono. Mpini kabhao-bhaono nofopilimo bhe tokamo nofotantue daembali umatino hampano kaseꞌisentoomu bhe Kristus.

¹² Nopantasimo mpuu damudhi Lahataꞌala, hampano kabhalano kakalabhiano, kapaꞌamo insaodi ⸤ miendo Yahudi⸥ tapaꞌindulu taposahunaꞌao ne Kristus.

¹³ Hintimiu dua membalimoomu umatino Lahataꞌala, wakutuuno fetingkeomu bhihitano kabanara, maꞌanano Bhihita Metaa meowaangkoomu kasalamati. Hampano kaparasaeamiu ne Kristus, Lahataꞌala nowaꞌangkomoomu Rohino toka nedhandiꞌaono. Rohino naꞌa katandainomo membalimoomu fehebuaꞌano Lahataꞌala.

¹⁴ Rohino Lahataꞌala ini kafekantoono dhandino Lahataꞌala putae tetewei namada kaowu daꞌumawae kosasawiꞌae nedhandiꞌaono. Aini nofekatangka dua kaparasaeantoomu, ingka intaodiomu fehebuaꞌano Lahataꞌala ini, kotu-kotuꞌu dabebasi ⸤ maiꞌao ne kuasano dhosa⸥ . Pudhi kaitaomu Lahataꞌala hampano kakalabhiano!

Sambahea so dalumosangiꞌao kakalabhiano Kristus 1:15-23

¹⁵ Dadiꞌanomo safetingkeku putae parasaeamoomu ne Ompu Yesus bhe moasiandaomu kosasawindo umati mongkilo,

¹⁶ miina amenga-mengaasia aefoampe katumpuno lalo ne Lahataꞌala. Taenomo asambahea sadhia asambilikoomu.

¹⁷ Aesalo ne Lahataꞌalano Ompuntoomu Yesus Kristus, Amantoomu kumalabhiano, sio-siomo namaꞌangkoomu Rohino. Rohi aitu namaꞌangkoomu kapande bhe kantaleano fekihi sampe kotu-kotuꞌu mandeꞌaaneomu Lahataꞌala.

¹⁸ Aesalo dua sio-siomo natilengka totono lalomiu, neanomo lumosangieꞌomu kakesano posahunaꞌao so neꞌawamiu maiꞌao ne Lahataꞌala bhasikoomu; neanomo mandeꞌaaneomu dua kapontalabhi-labhino kabarakati nefontaa-ntaano Lahataꞌala so umatino mongkilono.

¹⁹ So mandeꞌaoꞌomu dua kabhibhiisano kuasano Lahataꞌala meateno weo totono lalontoomu mie marasaeano. Kuasa aini nopototo bhe kuasano kumalabhiano,

²⁰ nepakeno nofowanu Kristus maiꞌao ne mate, maka nowaꞌane kaengkohaꞌa foliuno kalangke ne suanano te surugaa.

²¹ Kaengkohaꞌano Kristus ini nofoliuda sabhaha kuasa te surugaa, sabhaha mintahano kuasa, sabhaha mie neangka bhe kafeompuꞌa, bhe laꞌae maka dua meꞌawano soda, naetaa dumadino dhamani aini naetaa we dhamani mbuhumai.

²² Kosasawindo maitu nofotuhuda Lahataꞌala dalumongko ne Kristus, maka Kristus nosangkee mbalimo neangkando bhahi-bhahindo, somo mefotuꞌaono umatino.

²³ Umati marasaeano ingka o mbadhanomo Kristus, nofosangkaemo Anoa mosangkano bhahi-bhahiꞌae ne amai maka dua.