3 Yohanes 1 - Muna Southern Dialect

Kalengkano suha 1:1-4

¹ Bhahitieku Gayus nemoasiꞌaoku! Suha aini nomaiꞌao ne idi, kamungkula neangkando umati, aoasiangko mpuu.

² Bhahitieku nemoasiꞌaoku, aguhaangko sio-siomo sadaa-daa mengkoha-ngkoha weo kataano namisi bhe katotomata, pedamo dua alusumu sametaa.

³ Nowula mpuu laloku afetingke ne bhahitieꞌi marasaeano humato kanau, detula-tulaꞌao kakampuu-mpuuno lalomu dadi angkafi kabanara. Ingka daanumo weo dadimu sadhia angkafi kabanara.

⁴ Pae bhe so moliuno kawulano laloku afetingke anaꞌiku dodadi doangkafi kabanara.

Kapudhi so Gayus 1:5-8

⁵ Bhahitieku nemoasiꞌaoku! Nokampuu-mpuu lalomu weo kahadhaamu ondofao bhahitieꞌi marasaeano, mahinggamo mengkahatono.

⁶ Andoa padamo detula-tulaꞌao kanini kaasimu ne wisendo umati marasaeano ne ini. Naetaa mpuu nehabumu itu ane tulumida damopansuhu kala-kalando. Habu medano naꞌa ingka mekaꞌianomo lalono Lahataꞌala.

⁷ Kapaꞌamo kakalaꞌando ⸤ deowa Bhihita Metaa⸥ so dameompuꞌao ne Kristus, bhe miina dakoniala maiꞌao ne mie tapa marasaeano ne Kristus.

⁸ Dadiꞌanomo intaodiomu tabeano nahumelasi lalontoomu damotiampe bhahitieꞌintoomu peda andoa itu. Nadamo aitu intaodiomu dealamo dua dawu weo foleleꞌano bhihitano kabanara.

Diotrefes dofoꞌalae, Demetrius dopudhie 1:9-12

⁹ Ingka padamo aebuhi suha seendai so umati ne itu, tamaka Diotrefes miina napokihaꞌianea kalentuku, kapaꞌamo gaono naembali neangkando umati.

¹⁰ Dadiꞌanomo ane amai kaowu, atumalesaane sabhaha habu modaino bhe wamba kabuangkano nopulaoꞌao insaodi. Bhahi-bhahiꞌae ini miinaꞌo dua natumumpuane lalono, sampe nokiido natumahima bhahitieꞌi mengkahatono. Suano kaowu taꞌo anaꞌa, bhahamoa umati dua sigaoꞌano noꞌeleꞌaanda datumahima bhahitieꞌi mengkahato maitu. Ane miina damangkafie, nofogampida maiꞌao ne kaseꞌisendo umati.

¹¹ Bhahitieku nemoasiꞌaoku! Koise mesandaha ne habu modai tamaka ne habu metaa. Sasuka humabu metaano, anaꞌinomo Lahataꞌala, tamaka sasuka humabu modaino miinaꞌo sepaliꞌa namandeꞌao Lahataꞌala.

¹² Tamaka Demetrius, ingka kosasawindo umati dopudhie; daanumo ne dadino notiwohamo sepaliꞌa noangkafi kabanara. Insaodi tasakusiiane dua tapudhi habu metaano, maka ingka pandeꞌaane kasakusii mani ini nokotuꞌu.

Kasongkono suha 1:13-15

¹³ Nandoo nobhahi sepaliꞌa so nefohatoꞌaoku ne hintu, ampamo kaowu naetaa pae abuhie ne suha.

¹⁴ Aposahunaꞌao naehimba dapoꞌawa toha maka daetula-tula dapowise.

¹⁵ Sio-siomo napobhaiangko katohopono dadi. Sabhangkaꞌimu we ini dopakatuangko salam. Fosampe kanau dua salam ne sabhangkaꞌintoomu seemie-seemie.