2 Yohanes 1 - Muna Southern Dialect

Kalengkano suha 1:1-3

¹ Suha aini nomaiꞌao ne idi, kamungkula neangkando umati so hintu, waꞌina nepilino Lahataꞌala bhe anaꞌino kamoasiꞌaoku mpuu. Suano kaowu idi moasiangkoomu, tamaka kosasawindo mie mandeꞌaono kabanarano Lahataꞌala, doasiangkoomu dua.

² Katimoasiꞌamiu hampano kabanarano Lahataꞌala neate weo totono lalontoomu bhe nafopobhaiꞌao ampa suhue dhamani.

³ Kabarakati, rahamati bhe katohopono dadi maiꞌao ne Lahataꞌala Amantoomu bhe Yesus Kristus Anano, sadhia napobhai bhe intaodiomu meateno weo kabanara bhe pomoa-moasiꞌao.

Damintahaki kafoinaꞌuno Kristus 1:4-11

⁴ Nowula mpuu laloku afetingke anaꞌimu sigaꞌa dodadi doangkafi kabanara, pedamo pahinta netahimantoomu maiꞌao ne Lahataꞌala Amantoomu.

⁵ Aitu waꞌina, aesalo mpuu ne hintu sio-siomo intaodiomu ini dapomoa-moasiꞌao. Nebuhiku ini suano pahinta buꞌoua, tamaka ingka dofetingkeemoomu mpini pakaparasaeantoomu.

⁶ Dofomoasiꞌao, maꞌanano dodadi doangkafi pahintano Lahataꞌala. Pahintano ingka fetingkeemoomu mpini pakaparasaeamiu, dadiomu weo kanini kaasi.

⁷ Kaebuhiꞌaku peda aini hampano dobhahimo mpahaguru-guruno dolili te dhunia ini dofobhohe-bhoheꞌi. Andoa maitu miina daꞌumakuiꞌe putae Yesus Kristus nomai we dhunia ini peda seemie manusia. Mie pedando naꞌa o fobhohe-bhoheꞌino bhe kaewano Kristus.

⁸ Dadiꞌanomo posiꞌondoomu bhahasaa nosali kahadhaa toka nepooli mani so hintimiu, tamaka tetewei umawaeꞌomu kosekabhalaꞌae ponambo nefontaa-ntaano Lahataꞌala.

⁹ Sasuka tapa mintahakino kafoinaꞌuno Kristus tamaka nekapingkaane, miinamo naseꞌise bhe Lahataꞌala. Sasuka mintahakino kafoinaꞌu anaꞌa noseꞌise bhe Lahataꞌala Ama bhe Anano.

¹⁰ Dadiꞌanomo ane bhe mie maino meowano kafoinaꞌu tapa nefoinaꞌuꞌaono Kristus, mie aitu koe tahimaeꞌomu weo lambumiu, koemo dua fendeꞌaaneomua.

¹¹ Kapaꞌamo laꞌae mendeꞌaane, ingka kao-kaomo neala dua dawu weo habu modaino mie aitu.

Kasongkono suha 1:12-13

¹² Nandoo nobhahi sepaliꞌa so nefohatoꞌaoku ne hintimiu, ampamo kaowu naetaa pae abuhie ne suha. Aposahunaꞌao amai adumongawikoomu maka daetula-tula dapowise-wiseomu, nosangkaꞌao kaꞌiantoomu.

¹³ Nandoo dua kapakatuno salam maiꞌao ne anaꞌino bhahitiemu nepilino Lahataꞌala.