2 Timotius 4 - Muna Southern Dialect

Katangahi ne Timotius nadhumalangi taka kaꞌondofaono 4:1-8

¹ Nandoo so nefeꞌulaiꞌaoku ne hintu, ingka bhe Lahataꞌala mandeꞌaane, bhe Kristus Yesus so bhitahakino dumadino bhe mateno. Anoa nasumuli namai maka namahinta nada seemie Omputo. Dadiꞌanomo aefeꞌulaiangko,

² mefebhihitaiꞌao bhoasaono Ompu, fopahataaꞌe lalomu, dametingkeko bhe paise, naetaa bhe pae naetaa wakutuuno, feꞌulaiandae kaꞌalando, foꞌalada bhe fekatangkae lalondo. Kosabaha tangahida bhe foinaꞌuda.

³ Kapaꞌamo nasewakutuu mie paemo daetahima kafoinaꞌu kumotuꞌuꞌano, tamaka daeꞌondofi sabhaha guru ampa kapoindalondo, damangkafi kaowu kambakano tingalando.

⁴ Andoa tadaꞌumopi tingalando dakiido dametingke kabanara, tamaka datumaꞌo tingalando ne sabhaha kapu-kapuna.

⁵ Tamaka hintu, fotoho lalomu o ae maka dua newisekimu, kosabaha potaamiꞌao kakadee-dee, dhalangie kansuhu takamu mefolele Bhihita Metaa, mpuu-mpuunie taka kaꞌondofao netahimamu.

⁶ Ane wutoku, ampa aini heaku nopotuhumo mbalimo kabubusino kapopanga so Lahataꞌala. Nomaꞌomo tempono ahumunsa dhunia ini.

⁷ Idi ini ibahatino mie meangkafino pogoloꞌa dotende, apooli metaaꞌemo ampa hatoꞌano, kaparasaeaku ne Kristus sadaa-daa adhagani metaaꞌe.

⁸ Aitu nokantaa-ntaamo so idi kawaꞌao so mie fotalono hampano adadi aangkafi kapoindalono Lahataꞌala. Kawaꞌao anaꞌa namaꞌa kanaꞌe Ompu ne oleo kahatoꞌano, kapaꞌamo Anoamo Fobhitahakino umadhilino. Bhahamoa suano kaowu idi so tumahimae, tamaka kosasawindo mie mokambano lalo ne oleo kahatoꞌano.

Kaowili kapuliaono 4:9-18

⁹ Uleiꞌe lalomu pikimai poꞌawa kanau.

¹⁰ Kapaꞌamo Demas nohunsa kanaumo, noasiꞌaomo dhunia ini, nokalamo we Tesalonika. Kreskes nokalamo dua we Galatia, bhe Titus we Dalmatia.

¹¹ Tamo Lukas pobhai kanau. Uleiꞌe bhe Markus maka wowoꞌoe we ini, kapaꞌamo nokofahalaa sepaliꞌa so kaꞌondofaoku.

¹² Tikikus atudue nakumala we Efesus itu.

¹³ Mai kaowu, wowoꞌoe bhe dhuba mokapa nehunsaku we Troas we lambuno Karpus. Wowoꞌo kanauꞌe dua bhe boku-bokuku itu, mangke-mangkemo kabuhi ne kaluluno kuli itu.

¹⁴ Aleksander, pandeno tambaga itu, nobhahimo habu modaino ne idi. Hunsaꞌanomo Ompu so bhoosie naposahataa bhe habuno.

¹⁵ Naetaa dua posiꞌondoꞌao wutomu ne anoa itu, kapaꞌamo nopoewangiane sepaliꞌa kafoinaꞌuntoomu.

¹⁶ Kabhao-bhaono apotunduꞌao wutoku ⸤ wakutuuno dobhitahaki kanau⸥ , bhe naseemie miina bhe tumulumi kanau, dopuli dohunsa kanau. Sio-siomo Lahataꞌala paise namoꞌaladaa.

¹⁷ Tamaka Ompu nopobhai kanau kansuhu, nofekatangkae laloku sampe ampuu-mpuunie aefolele kosasawiꞌae Bhihita Metaa mbali dofetingke kosasawindo mie suano Yahudi. Kanandooꞌanomo asalamati maiꞌao ne balaano mate.

¹⁸ Daanumo Ompu namosalamati kanau maiꞌao ne sabhaha patudhu modai. Anoa namowa kanau asumalamati amesua weo kafopahintaꞌano te surugaa. Nopantasi mpuu damosibhala Lahataꞌala ampa suhue dhamani! Amin.

Kasongkono suha 4:19-22

¹⁹ Fosampe kanau salam ne Priskila bhe Akwila bhe polambuno Onesiforus.

²⁰ Erastus nandooꞌe we Korintus bhe Trofimus ahunsae we Miletus nandoo nosaki.

²¹ Uleiꞌe lalomu paeꞌo nahumato wulano use humatomo we ini. Ebulus, Pudes, Linus bhe Klaudia bhe kosasawindo bhahitie we ini dofosampeangko dua salam.

²² Sio-siomo Ompu napobhaiꞌao totono lalomu. Sio-siomo dua namaꞌangkoomu kabarakatino.