2 Timotius 3 - Muna Southern Dialect

Koeatendo manusia we oleo mbuhumai 3:1-9

¹ Tandaiꞌe, namaꞌo pandano dhamani nabhahi kasabhano.

² O manusia damosibhalamo wutondo, daembalimo bhatuano dhoi. Pugaundo taꞌo sangke-sangkeꞌano wuto, naelangke diundo, dafoꞌumbu, paemo daeangka ne kamungkulando, paemo daepandeꞌao katumpuno lalo, paemo dua daefadhuli agama.

³ Paemo dapomoa-moasiꞌao, dakiidoemo pometaa, dadumai-dai neando mie bhaindo, paemo damooli damewanaki totono lalondo, damansofopepe, paemo damoindaloea metaaꞌano.

⁴ Dapodai-dai dasisabha-sabhangka, paemo naewantaa fekihindoa, tula-tulando taꞌo kafewahai, madaꞌaomo daoasiꞌao nafusuuno dhunia bhe daoasiꞌao Lahataꞌala.

⁵ Wohaꞌano ingka dodhalangie agamando, tamaka sakotuꞌuꞌano miina damarasaea o sambahea maitu nokokuasa. Fekakodoꞌo wutomu ne mie medando naꞌa.

⁶ Ne olotando andoa maitu nandoo mepesuakino kolambuno miina daefemata-mataa maka dofofoinaꞌu bhe dokabua totono lalondo hobhine monaleno dhagi. Hobhine medano naꞌa nobhahi dhosando bhe nokuasaida sabhaha kapoindalo pata metaa.

⁷ Mahinggamo hobhine andoa ini defefoinaꞌu kansuhu, o kabanara miina sepaliꞌa damooliea dolosangiea.

⁸ Guru-guru andoa maitu doewangi kafoinaꞌu banara, tapedamo Yanes bhe Yambres doewangi Musa endefiꞌini. Fekihindo nodaimo, kaparasaeando miinamo nakofahalaaꞌa.

⁹ Kafoinaꞌundo teteweimo paemo nakodoꞌo nadhumulua, kapaꞌamo kabhohendo naentaleamo ne sabhaha mie, pedamo dua netompaloindo Yanes bhe Yambres endefiꞌini.

Kaparasaea menowu weo kakadee-dee bhe kanea debasa Kitabi 3:10-17

¹⁰ Tamaka hintu, ingka tokamo angkafi kafoinaꞌuku bhe ehe mengkohaku. Ingka wohaemo dua patudhuno dadiku, kaparasaeaku bhe sabahaku, kanini kaasiku bhe kakampuu-mpuuno laloku apotaami.

¹¹ Ingka wohaemo dua kakadee-dee bhe kafoinsa-insana peda neꞌawaku we Antiokia, Ikonium bhe Listra. Kabhalano maka kakadee-dee nenamisiku naꞌa, tamaka Ompu nofosalamati kanau.

¹² Ingka daanumo kosasawindo mie dumadi lumebeno weo kaseꞌise bhe Kristus Yesus tetewei damodee-deeda.

¹³ Tamaka mie modai bhe fobhohe-bhoheꞌino nadhumulu kadaindo, damokolilino totono lalondo mie bhaindo, gahaꞌaitu totono lalondo wutondo nakolilino dua.

¹⁴ Tamaka hintu Timotius, fintahakie kabanara toka nepoguhuꞌaomu bhe neparasaeamu, ingka pandeꞌaanda ndo laꞌae gurumu.

¹⁵ Feꞌulaiꞌe dua, notanda kaanaꞌimu pandeꞌaanemo Kitabi. Nomaiꞌaomo ne Kitabi aini naembali damandeꞌao kaangkaꞌano kasalamati, mangkano weo kaparasaea ne Kristus Yesus.

¹⁶ Kosasawiꞌae tibuhiꞌano weo Kitabi nomaiꞌao ne Rohino Lahataꞌala, nokofahalaa so dafofoinaꞌuꞌao kabanara, so daefeꞌulaiꞌao mie umala, so damekataaꞌiao podiu bhe so dafotangahiꞌao dadumadi damangkafi kapoindalono Lahataꞌala.

¹⁷ Ane nada anaꞌa, manusia fehebuaꞌano Lahataꞌala nasumangkamo bhe katokano so nahumabuꞌao sabhaha metaaꞌano.