2 Timotius 2 - Muna Southern Dialect

Doangkafi kakadee-deeno Yesus 2:1-13

¹ Dadiꞌanomo Timotius, anaku, fekatangkae lalomu weo rahamati neꞌawanto ne Kristus Yesus.

² Kafoinaꞌu nefetingkemu ne idi endefiꞌini ne wisendo mie bhahi, naetaa posahunaꞌaandae mie tiparasaea bhe mandeno moinaꞌuno mie bhaindo.

³ Tabeano numamisie dua kakadee-dee nenamisi mani, neanomo membali tantarano Kristus Yesus kumampuu-mpuuno.

⁴ Seemie tantara tangasano nodhalangi takano, ingka miina natiteeꞌanea kahadhaano sigaoꞌano, kapaꞌamo patudhuno namekaꞌia lalono neangkano.

⁵ Seemie meangkafino pogoloꞌa dotende, pae naeꞌawa kawaꞌao nefontaa-ntaa so fotalono, ane pae namangkafi sabhaha atorano potandingiꞌa.

⁶ Seemie moꞌosano mekaampono, anoamo kohakuno naꞌumawa pehapi kabhao-bhaono.

⁷ Teiꞌe weo namu-namumu wambaku ini, kapaꞌamo Ompu namaꞌangko kapooli so lumosangiꞌao bhahi-bhahiꞌae.

⁸ Tandaiꞌe inia: Yesus Kristus suli nodadi maiꞌao ne mate, Anoamo sampuꞌano omputo Daud. Ainiꞌaemo Bhihita Metaa neowaku.

⁹ Kakadee-deeꞌaku ini ingka mbaꞌinomo foleleꞌano Bhihita Metaa, bhahamoa sampe dogogantu kanau hante peda mie modai. Gahaꞌaitu bhoasaono Lahataꞌala miina natitaangia.

¹⁰ Kanandooꞌanomo taꞌasabahamo apotaamiꞌao bhahi-bhahiꞌae ini so kaetaaꞌando mie nepilino Lahataꞌala. Patudhuku sio-siomo andoa daeꞌawa dua kasalamati neowano Kristus Yesus bhe kakalabhia suhue dhamani.

¹¹ Ingka nokotuꞌu mpuu bhoasao aini, Ane padamo domateomu bhe Anoa, ingka mada kaowu dadumadiomu dua bhe Anoa;

¹² ane dakosabahaomu dapotaamiꞌao kakadee-dee, ingka mada kaowu damahinta dua bhe Anoa; ane dagumaga miina damandeꞌaane, ingka mada kaowu nagumaga dua miina nafopandeꞌao;

¹³ ane miina natumai lalontoomu ne Anoa, Anoa sadaa-daa kataino lalo ne bhoasaono, kapaꞌamo pae bhe kapoolia nagumagai Wutono.

Katangahi dawiseki mpahaguru-guruno 2:14-26

¹⁴ Mefeꞌulaianda bhe owiliandae mpuu kosasawiꞌae ini. Ne wiseno Lahataꞌala tangahida koise dopotaga-tagaliꞌao maꞌanano sewobha wamba, kapaꞌamo miina sepaliꞌa nakofahalaaꞌa, bhahamoa tanodai-dai kaowu kaparasaeando mie metingkee.

¹⁵ Uleiꞌe lalomu kahadhaa so noꞌiaꞌao Lahataꞌala, membalimo mie tapa moambanoꞌaono nekahadhaano, maꞌanano fofoinaꞌuꞌao bhoasao banara melaa-melaa.

¹⁶ Tamaka fekakodoꞌo wutomu ne wamba tapa kofahalaano bhe tapa mongkilo, kapaꞌamo wamba pedando naꞌa nefodhulu kaowu kadaindo mie.

¹⁷ Kafoinaꞌundo mie medando anaꞌa nohamba tapedamo kanda bubu. Ne olotando andoa maitu notilentu dua ndo Himeneus bhe Filetus.

¹⁸ Andoa dopingkamo maiꞌao ne kabanara, kapaꞌamo dofofoinaꞌu putae kawanuꞌando mie mate ingka nokadhadhiamo, sampe dedai-daimo kaparasaendo mie.

¹⁹ Ampamo kaowu sandi bhalano nefongkohano Lahataꞌala nomatangka. Te wawono notibuhi bhoasao peda aini, “Ompu nopandeꞌaanda ndo laꞌae fehebuaꞌano”, pakade dua, “Sasuka sumambilino neano Ompu tabeano nahumunsa podiu modaino.”

²⁰ We lalono seꞌonu lambu bhalano nobhahi kaenteiꞌa, nandoo maiꞌao ne bulawa bhe salaka, tamaka nandoo dua maiꞌao ne sau bhe wite pulu. Kaenteiꞌa bulawa bhe salaka mbali kafaraluuno hame bhalano, o kaenteiꞌa sau bhe wite pulu mbali kafaraluu maꞌoleo hangkowine.

²¹ Ane seemie nofekangkilo wutono ne sabhaha modaiꞌano, anoa itu tapedamo kaenteiꞌa so kafaraluuno hame bhalano saꞌituini, ingka padamo dofekangkiloe. Anoa nokofahalaa so kafeompuꞌano, nomantaa-ntaamo so sabhaha kahadhaa metaa.

²² Dadiꞌanomo fekakodoꞌoe nafusuundo kahangku dadi, uleiꞌe lalomu angkafi kapoindalono Lahataꞌala, fekatangkae kaparasaeamu, dadi weo kanini kaasi bhe kapometaa bhe mie bhaimu. Dadimo peda anaꞌa bhe mie metondalano ne Ompu maiꞌao ne totono lalo mongkilono.

²³ Koise meangkafi potaga-tagaliꞌando mie kabhohe-bhohe tapa konipandeꞌaono. Ingka pandeꞌaanemo medando naꞌa neowa kaowu pogiha-gihaꞌa.

²⁴ Seemie palima-limano Ompu miina namantasia nopogiha, tamaka tabeano nomalu lalono ne sabhaha mie. Anoa tabeano nopande nofofoinaꞌu bhe nokosabaha.

²⁵ Mie mansoewano tabeano namalu-malusianda katangahi, sio-siomo Lahataꞌala nandoo namaꞌanda kasalawa dametompaꞌao dhosando maka damandeꞌao kabanara.

²⁶ Ane nada naꞌa sumulimo damandeꞌao lalondo, dalumapamo maiꞌao ne kampepeno Kafeompuꞌando seetani. Kapaꞌamo kaomponae ini notapuda neangkando seetani maka nofosuhuda damangkafi kapoindalono.