2 Timotius 1 - Muna Southern Dialect

Kalengkano suha 1:1-2

^1-2 Timotius, anaku timoasiꞌaono! Suha aini nomaiꞌao ne Paulus. Hampano kapoindalono Lahataꞌala nosangke kanau aembali rasuluno Kristus Yesus, maꞌanano notudu kanau aefolele bhihitano dadi nepodhandiꞌaono Lahataꞌala. Dadi anaꞌa dotahimaemoomu hampano doseꞌise bhe Kristus Yesus. Sio-siomo kanini kaasi, rahamati bhe katohopono lalo maiꞌao ne Lahataꞌala Amantoomu bhe Ompuntoomu Kristus Yesus sadhia napobhaiangko.

Katumpuno lalono Paulus bhe katangahino so Timotius 1:3-18

³ Notumpu laloku ne Lahataꞌala nefeompuniꞌiku maiꞌao weo totono lalo mongkilo kumatanga-tangano, pedamo dua nehabundo awuaꞌiku endefiꞌini. Mentae mohondo taenomo asambahea, sadhia dua afeꞌulaiko.

⁴ Afeꞌulai kaowu ndawuno luumu, nokamba laloku apoꞌawaangko toha, nosungkuꞌao kaꞌiaku.

⁵ Afeꞌulai dua kaparasaeamu kumampuu-mpuuno, tapedamo dua kaparasaeando Lois, awuamu hobhine bhe Eunike inamu. Miina apoibhahaanea, kaparasaeamo medano anaꞌa dumadino dua weo totono lalomu.

⁶ Kanandooꞌanomo aefeꞌulaiangko, pakee mpuu kapooli kawaꞌaono Rohino Lahataꞌala neꞌawamu wakutuuno ateiangko limaku te fotumu.

⁷ Kapaꞌamo Rohi kawaꞌaono Lahataꞌala miina nahumabu kaita mbali mie motehe, tamaka o Rohi meowano katangkano lalo, kanini kaasi bhe kapooli so damewanakiꞌao totono lalontoomu.

⁸ Dadiꞌanomo koise moambano membali sakusiino Ompuntoomu, koe dua moambanoꞌao idi titohongkuno mbaꞌinomo Anoa Ompuntoomu. Tamaka bhe kapoolino Lahataꞌala, angkafi kanau kadee-deeꞌao Bhihita Metaa.

⁹ Anoamo mosalamati kaita, Anoamo dua bhasi kaita so dadumadi mongkiloꞌao. Katifosalamatiꞌantoomu suano mbaꞌinomo habu metaantoomu, tamaka nengkoha ne patudhu bhe rahamatino Wutono. Rahamati aini nowaꞌa kaitae noangka ne Kristus Yesus, mpini miinaꞌo natifokonandoo dhunia.

¹⁰ Ampa aitu Lahataꞌala nofotiwohamo rahamatino weo hatono Omputo Fosalamatino Yesus Kristus. Anoa notalomo kuasano mate maka nofosusuꞌao dadi buꞌou so tapa binasano noangka weo Bhihita Metaa.

¹¹ Somo Bhihita Metaa aini, Lahataꞌala nosangke kanau so mosampeno bhoasaono, o rasulu bhe guru.

¹² Kanandooꞌanomo aeꞌawa sabhaha kakadee-dee ini, tamaka miina aoambanoanea, mbaꞌinomo apandeꞌaane o laꞌae neparasaeaku. Apandeꞌaane mpuu Anoa nokokuasa nadhumagani neposahunaꞌaono ne idi ampa ne oleo kahatoꞌano Ompu.

¹³ Fintahakie sabhaha nefetingkemu ne idi, sandahanomo kafoinaꞌu metaa. Dhalangie weo kaparasaeamu bhe kanini kaasimu hampano kaseꞌisemu bhe Kristus Yesus.

¹⁴ Dhaganie kafoinaꞌu neposahunaꞌaono ne hintu tapedamo arataa mokesa, bhe katulumino Rohino Lahataꞌala dumadino weo totono lalontoomu.

¹⁵ Ingka pandeꞌaanemo kosasawindo maiꞌaono ne kadieno Asia dokukundo kanaumo, notilentumo dua ndo Figelus bhe Hermogenes.

¹⁶ Sio-siomo Ompu namosampu rahamatino ne polambuno Onesiforus, hampano nentelamo nofekaꞌia laloku. Anoa miina naoambano kanaua, mahinggamo atitohongku.

¹⁷ Wakutuuno nomai we kotano Roma ini, noꞌuleimo lalono noꞌondofi kanau ampa nopoꞌawa kanau.

¹⁸ Sio-siomo Ompu namosampuane rahamatino ne oleono kahatoꞌano. Ingka pandeꞌaane mpuu kabhalano kaꞌondofaono ne idi wakutuuno we Efesus endefiꞌini.