2 Tesalonika 3 - Muna Southern Dialect

Kamesalono Paulus dasumambaheaꞌane 3:1-5

¹ Panda-pandano bhahitieꞌi, sambahea kainsamiomu, sio-siomo bhoasaono Ompu naehimba nalumele bhe datumahima metaaꞌe, peda ne hintimiu.

² Sambaheaꞌomu dua sio-siomo Lahataꞌala namolapa kainsami maiꞌao ne mie modai bhe mie silaka. Kapaꞌamo suano kosasawindo manusia dokokaparasaea.

³ Tamaka Ompu notiparasaea. Namekatangka lalomiu bhe nadhumaganikoomu ne modaiꞌano.

⁴ Taparasaea mpuu ne Ompu putae sabhaha kafoinaꞌu mani habuemoomu bhe humabueꞌomu kansuhu.

⁵ Sio-siomo Ompu namato totono lalomiu lumosangieꞌomu kanini kaasino Lahataꞌala bhe namaꞌangkoomu sabaha dapotaami peda Kristus.

Koise domantawa 3:6-15

⁶ Bhahitieꞌi, weo neano Ompu Yesus Kristus taesalo kodoꞌotidaomu kosasawindo bhahitie mantawano bhe pata mangkafino kafoinaꞌu netahimamiu ne insaodi.

⁷ Ingka pandeꞌaaneomu tabeano mesandahaomu ne insaodi, kapaꞌamo insaodi miina tamantawa wakutuu taeate bhe hintimiu.

⁸ Insaodi miina tataomaamoa, sadhia taeꞌoli, pakade mentae mohondo taꞌulei bhe tafekawule-wule keana taembali wowoꞌomiu.

⁹ Tahabu peda amaitu, suano mbaꞌinomo miina takohakua takonisalo, tamaka tapoindalo taehabuangkoomu sandaha so neangkafimiu.

¹⁰ Ingka wakutuu nandoo kainsami bhe hintimiu, padamo tatangahikoomu peda aini, “Ane o mie nokiido nakumahadhaa, koise nohumaaꞌa.”

¹¹ Kapugauꞌa mani peda aini hampano tafetingke nandoo mantawano kumiidono kumahadhaano, gunando fisa deꞌatoro urusundo bhaindo.

¹² Mie medando anaꞌa taefeꞌulaianda bhe tatangahida weo neano Ompu Yesus Kristus, damotoho lalondo dakumahadhaa neanomo daomaa otindo wutondo.

¹³ Hintimiu bhahitieꞌi, koise mowoowuleomua habu metaaꞌomu.

¹⁴ Ane nandumandoo mie so pata mangkafino pugau mani weo suha aini, tandaiꞌeomu, koise posabhangkaaneomu, noambanoꞌao.

¹⁵ Ampamo kaowu, koise abhieꞌomu kaewa, tamaka tangahieꞌomu peda bhahitiemiu.

Kasongkono suha 3:16-18

¹⁶ Ompu kamaiꞌaoꞌano katohopono dadi. Sio-siomo sadhia namaꞌangkoomu katohopono dadi ne sabhaha waweno dadimiu. Sio-siomo Ompu sadhia napobhaiangkoomu.

¹⁷ Salam maiꞌao ne idi, Paulus. Wamba aini abuhiane limaku wutoku, aini katandaino buhiku weo sabhaha suhaku. Pedamo aini kabuhiku.

¹⁸ Sio-siomo kosasawimiu itu sadhia napobhaiangkoomu kabarakatino Ompuntoomu Yesus Kristus.