2 Tesalonika 2 - Muna Southern Dialect

Hatono manusia foliuno kadai 2:1-12

¹ Bhahitieꞌi, aitu tapugauꞌao kahatoꞌano Ompuntoomu Yesus Kristus bhe so katifohompuꞌantoomu bhe Anoa. Taesalo mpuu ne hintimiu,

² koise lasao nebhali-bhalii fekihimiu bhe haliaꞌomu mbaꞌinomo nandoo bhihita putae oleono Ompu nohatomo. Bheanea bhihita maitu nomaiꞌao ne pugauno seemie kosuahano peda anabii, bheanea seꞌise kafoguhu, bheanea nomaiꞌao ne suhando mie kao-kaomo maiꞌaono ne insaodi.

³ Tangkanomo, nada ae maka dua, koise undaomu dabhohe-bhoheꞌikoomu! Kapaꞌamo paeꞌo nahumato oleono Ompu anaꞌa, tetewei nandumandoo wawo kahungga bhalano, dabhahi mie so humunsano kaparasaeando. Tetewei dua seemie manusia foliuno kadai namotiumba wutono, toka nefotantuno so binasano ⸤ we narakaa⸥ .

⁴ Anoa ini mewangino Lahataꞌala, namekalangke wutono te wawono sabhaha nekonando ompu bhe nesombaindo manusia. Bhahamoa sampe naengkoha weo Lambuno Lahataꞌala maka nakumona wutono Lahataꞌala ne wisendo mie bhahi.

⁵ Ingka kosasawiꞌae ini padamo afohatoangkoeꞌomu wakutuu nandoo kanau bhe hintimiu endefiꞌini. Miinamo meꞌulaiꞌeomua bhahaa?

⁶ Aitu pandeꞌaaneomu o ae tumaangie sampe miinaꞌo nakumadhadhia. Tamaka nahumato tempono nefotantuno so anoa, kaneꞌomo manusia foliuno kadai naꞌa namotiumba wutono.

⁷ Kuasa foliuno kadai ini nokahadhaa mpebunimo seendai-seendai, tamaka sadhia dotaa-taangie. Sembali tumaa-taangie ini madamo damogampie,

⁸ kaneꞌomo manusia foliuno kadai naꞌa namotiumba wutono. Tamaka nahumato Ompu Yesus, manusia ini tanabuso komate-mateno, namobinasaane tilangano kumalabhiano.

⁹ Hatono manusia foliuno kadai ini noangkafi kahadhaano Kafeompuꞌando seetani; naehabu sabhaha pasingara, tanda-tanda tapa mentela bhe giu timenteꞌaono, saneamo so nafobhohe-bhoheꞌiꞌao.

¹⁰ Anoa naepake sabhaha akala modai so naefekakolilinoꞌao totono lalondo manusia so binasano. So kabinasaꞌando mbaꞌinomo miina datumahima bhe miina daoasiꞌao kabanara so mosalamatida.

¹¹ Kanandooꞌanomo Lahataꞌala nehatoanda kakolilinono lalo, sampe doparasaea ne sabhaha paha anaꞌa.

¹² Hato pandano, kosasawindo mie tapa marasaeano ne kabanara maitu bhe moindalono habu modai, daeꞌawa kahukumu.

Damekatangka koehe 2:13-17

¹³ Bhahitieꞌi nemoasiꞌaono Ompu! Insaodi tabeano sadhia taefoampe katumpuno lalo ne Lahataꞌala hampano hintimiu, kapaꞌamo mpini kabhao-bhaono Lahataꞌala nopilikoomu namosalamatikoomu. Kasalamatimiu naꞌa noangka ne Rohino Lahataꞌala fofekangkilono bhe kaparasaeamiu ne kabanara.

¹⁴ Anaꞌamo katisaliꞌiꞌamiu ne Lahataꞌala, mangkaꞌano ne Bhihita Metaa nefolele mani, neanomo hintimiu mealaomu dua dawu ne kakalabhiano Ompuntoomu Yesus Kristus.

¹⁵ Dadiꞌanomo bhahitieꞌi, fekatangka koehemiu, fintaha kansuhu ne kafoinaꞌu netahimamiu ne insaodi, naetaa weo pugau mani naetaa weo suha mani.

^16-17 Sio-siomo wutono Ompuntoomu Yesus Kristus bhe Lahataꞌala Amantoomu nalumawesi bhe namekatangka lalomiu, neanomo so nehabumiu bhe so nepugauꞌaomiu sanea metaaꞌano. Kapaꞌamo Lahataꞌala nofomoasiꞌao; weo kataano lalo nofowaꞌao kaposahunaꞌao metaa bhe kalawesino lalo suhue dhamani.