2 Petrus 3 - Muna Southern Dialect

Oleo kahatoꞌano Ompu 3:1-16

¹ Bhahitieꞌiku timoasiꞌaono, aini o suhakumo kahaa pakuno. Ne kohaatangkeꞌae suhaku ini aꞌuleiꞌe laloku afeꞌulaiangkoomu bhahi-bhahiꞌae ini so nomoindaꞌao fekihimiu.

² Gaoku meꞌulaiꞌeomu wambano Lahataꞌala nekosuahaꞌaondo wawo ana-anabii mongkilo, bhe meꞌulaiꞌeomu dua sabhaha pahintano Ompu bhe Fosalamatino, nefosampendo rasuluꞌi ne hintimiu.

³ Foliuno kafaraluu so nepandeꞌaomiu: namaꞌo pandano dhamani dahumato mie foele-eleno damele-elekoomu. Andoa dodadi doangkafi kaowu kapoindalono mbadhando.

⁴ Andoa dapugau ambado, “Ingka ambado, Ompu nopodhandi namai, kaowua ne amaiꞌemo bhahaa? Kapaꞌamo awuaꞌintoomu domatemo, maka o dhunia mpini pakatifokonandoono, taꞌampamo aitu ingka sadaa-daaꞌemo.”

⁵ Andoa dofepuuꞌe dongahe datumandaiꞌe putae we dhamani wawono Lahataꞌala tanokobhoasao nonandoomo lani bhe dhunia, o dhunia nomaiꞌao ne oe bhe bhahi-bhahiꞌae ndumandoono dodadiꞌao oe.

⁶ Pedamo anaꞌa ingka o oemo dua mobinasano dhunia wawono, nofobinasaane luano oe bhalano.

⁷ Tamaka hampanomo dua bhoasaono naꞌa lani bhe dhuniantoomu ampa aitu sadaa-daa nodambaꞌaane, neanomo mada kaowu namohansuruane efi; nohunsa-hunsae ampa nahumato tempono so katibhotusiꞌando bhe katifobinasaꞌando mie modai.

⁸ Ampamo kaowu bhahitieꞌiku, koise molimpuꞌaaneomu dua sehondano ini: ne pomatano Lahataꞌala seꞌoleo tanopototomo bhe sehewu taꞌu, sehewu taꞌu tanopototomo bhe seꞌoleo.

⁹ Ompu miina naepoluntu-luntua namekakoꞌula dhandino, mahingga nandoo mie kofekihino peda naꞌa. Tamaka nosabahakikoomu, kapaꞌamo nokiido bhe so binasano, gaono kosasawindo manusia dametompaꞌao dhosando bhe dadumoli ne Anoa.

¹⁰ Oleo kahatoꞌano Ompu tetewei nahumato, nahumato nada kasoꞌo. Ne oleo anaꞌa o lani namiinae napoangka huhu timoteꞌi bhe sabhaha ndumandooꞌano te lani nahumampuniane efi. O dhunia bhe kosasawiꞌae ndumandoono te wawono naosali.

¹¹ Ane kosasawiꞌae damobinasae nada naꞌa, nada amai bhahaa beano so dadimiu? Ingka tabeano naongkilo bhe nalumebe mpuu podiumiu.

¹² Weo dadi medando naꞌa ntumaa-ntaaꞌomu oleono kahatoꞌano Ompu bhe uleiꞌe lalomiu so napikihatoꞌao. Ne oleo anaꞌa o lani naowolo natikantunu, sabhaha ndumandooꞌano te lani nameꞌoe hampano hendeno efi.

¹³ Tamaka pedamo dhandino Lahataꞌala, intaodiomu dentaa-ntaaꞌomu lani bhe dhunia buꞌou, ne itumo kapoindalono Lahataꞌala sadhia damangkafie.

¹⁴ Dadiꞌanomo, bhahitieꞌiku timoasiꞌaono, poowa ntaa-ntaaꞌomu bhahi-bhahiꞌae naꞌa, uleiꞌe lalomiu dadi mongkiloomu weo pomatano Lahataꞌala, pae kodengo-dengoomua bhe pometaaꞌomu bhe Lahataꞌala.

¹⁵ Kakosabahano Lahataꞌala tabeano dakumonae mbali kasalawando manusia so dasumalamatiꞌao. Paulus, bhahitientoomu timoasiꞌaono, ingka padamo dua nobuhiangkoeꞌomu, noangkafi kapande neꞌawano.

¹⁶ Ne kosasawiꞌae suhano, Paulus sadhia dua nobuhi kafoinaꞌu aini. Daanumo nandoo sehonda haa honda moꞌaliꞌano domaꞌanakie, sampe dobhansu-bhansulee mie tapa lumosangie bhe monaleno kaparasaea. Pedamo dua anaꞌa nehabundo ne wamba sigaoꞌano weo Kitabi. Panda-pandano naembalimo so kabinasaꞌando.

Kasongkono suha 3:17-18

¹⁷ Tamaka hintimiu, bhahitieꞌiku timoasiꞌaono, ingka pandeꞌaanemoomu wawo bhahi-bhahiꞌae naꞌa. Dadiꞌanomo kodhagaomu koe dobulukoomu weo kalibundo mie kolilinono pata mefadhulino atora, bhahasaa mondawuomu maiꞌao ne kafindaꞌamiu motangkaꞌano.

¹⁸ Naetaa mpuu modhuluomu kabhala bhe kamatangkamiu weo kanini kaasino Yesus Kristus, Ompu bhe Fosalamatino, bhe nasedhuluꞌa dua mandeꞌaaneomu. Nopantasi mpuu damosibhalae haꞌoleo ini ampa suhue dhamani! Amin.