2 Petrus 2 - Muna Southern Dialect

Mpahaana-anabii bhe mpahaguru-guruno 2:1-22

¹ Endefiꞌini ne olotando umatino Lahataꞌala nandoo mie mpahaana-anabiino, nadamo dua aitu ne olotamiu itu nandumandoo mpahaguru-guruno. Andoa daeowa sabhaha kafoinaꞌu tapa banara so mefobinasano manusia, bhahamoa dagumagaiꞌemo Kafeompuꞌa madano tumolosida. Nadamo anaꞌa dapikiꞌawamo kabinasaꞌano wutondo.

² Dabhahi mie so mangkafino podiundo nekuasaino sabhaha nafusuu modai. Hampano kafoinaꞌu bhe habundo dabhahi mie so mekaꞌaebuno Kaangkaꞌano Kabanara, ⸤ maꞌanano kaparasaea ne Kristus⸥ .

³ Hampano kakadau-daundo mpahaguru-guruno naꞌa daetula-tulaangkoomu sabhaha paha, patudhuno daealaꞌao laba. Tamaka kahukumundo nomponamo dofontaa-ntaaꞌe, Lahataꞌala miina bhe kaodoa, tetewei namobinasada.

⁴ Ingka endefiꞌini malaꞌekati kodhosano miina dalumapaa ne kahukumuno Lahataꞌala, tamaka noꞌohoda we narakaa. Andoa maitu nofopesuada weo kantie mohohondono, nofekataada ampa nahumato oleo so katibhotusiꞌando.

⁵ Pedamo dua anaꞌa we dhamani wawono, mie modai miina dalumapaa ne kahukumuno Lahataꞌala. Anoa nofosampu luano oe bhalano ne dhuniando mie modai naꞌa, maka mpahinomo Nuh bhe mie pipituno poowaꞌano sumalamatino. Nuh ini sadhia nofofohatoꞌao dadi banara.

⁶ Pedamo dua anaꞌa ne kotano Sodom bhe Gomora, Lahataꞌala nohukumuda nohampunianda efi, somo sandahano so kumadhadhiano ne mie modai.

⁷ Wakutuu anaꞌa ampamo Lot nefosalamati. Anoa ini mie banara, nosabha mpuu handano hampano habundo mie tapa mefadhulino atora bhe dumadino weo nafusuu modai.

⁸ Kapaꞌamo Lot, mie banara maitu, nodadi ne olotando maka seꞌo-seꞌoleo nowoha bhe nofetingke diundo, sampe totono lalono nokadee-dee sepaliꞌa.

⁹ Bhahi-bhahiꞌae maitu nofotiwohamo putae Ompu nopandeꞌaane nofosalamati mie banara maiꞌao ne sabhaha kasabha bhe nopandeꞌaane dua nohunsa mie modai ampa nahumukumuda nahumato oleo so katibhotusiꞌando,

¹⁰ mangkenomo andoa mangka-angkafino nafusuu hamesa bhe kapoindalo pokahakuno bhe misakino kuasano Lahataꞌala. Kaꞌosano kakadondo bhe kalangkeno diundo mie mpahaguru-guruno naꞌa, sampe dokadomo dua dofekaꞌaebu dumadino weo kakalabhia te surugaa.

¹¹ Gahaꞌaitumo mahinggamo malaꞌekati moliuno kaꞌosa bhe kuasando mpahaguru-guruno naꞌa, ingka miina daokadoa damekaꞌaebu tawa dasumangkati dumadino weo kakalabhia naꞌa ne wiseno Lahataꞌala.

¹² Tamaka mpahaguru-guruno maitu pasaꞌidamo kadadi tapa kofekihino, tadodadimo so mbadhando, dolente so kaowu dahumakoda bhe dasumumbeleda. Andoa dofekaꞌaebu tapa nelosangindo, sampe habu modaindo maitu somo kabinasaꞌando pasadamo kadadi fohumaano.

¹³ Kakadee-dee so neꞌawando naꞌa kanggetu dua ponambono habu modaindo fofodee-deeno. Dohabu pokahaku ole-oleo dokonaemo dua kataano namisindo. Ane dohumaa dopombali-mbali bhe hintimiu weo kahamendo umati, diundo notimolampi bhe notimoambanoꞌao mbaꞌinomo dololanuꞌao nafusuu modai.

¹⁴ Matando noponoꞌao nafusuu kamonsule bhe miina bhe kangaraa dehabu dhosa. Mie monaleno kaparasaea dowudhuda. Totono lalondo dokane-kaneaꞌane kakadau-dau. Andoa o mie somo nekangkanaino balaano narakaa.

¹⁵ Andoa dokolilinomo mbaꞌinomo miina damangkafi kaangkaꞌa melaaꞌano, tamaka doangkafimo kaangkaꞌano Bileam anano Beor endefiꞌini. Bileam naꞌa noasiane sepaliꞌa neala ponambo ne habu modai.

¹⁶ Tamaka Bileam neꞌawa kafodhaga wakutuuno keledai kasawiꞌano tapa mandeno mugauno tambaꞌomo nokosuaha peda manusia. Pedamo anaꞌa anabii aitu dofosuhue nahumunsa podiu kakambee-mbeeno maitu.

¹⁷ Mie mpahaguru-guruno itu pasadamo matano oe mokekeleno, pedaꞌidamo pakahawu nefololano kawea moꞌosa. Lahataꞌala tokamo nefontaa-ntaaꞌanda kaeateꞌa weo doloma mposo.

¹⁸ Andoa defomantale wamba kalangkeno diu pata kofahalaaꞌano. Depakesimo dua nafusuu modai defetando mie kaneꞌo lumapano maiꞌao ne dadi modai.

¹⁹ Mie andoa naꞌa dodhandianda kabebasi, gahaꞌaitumo wutondo mpahaguru-guruno maitu nofobhatuada kanea fofobinasano. Ingka dopandeꞌaane ane seemie manusia notalo, nembalimo bhatuano o ae maka dua tumaloe naꞌa.

²⁰ Kapaꞌamo ane o mie nopandeꞌaomo Ompu bhe Omputo Fosalamatino Yesus Kristus, ingka nolapamo maiꞌao ne sabhaha kuasano dhunia pokahakuno. Tamaka ane suli toha dotigogantu bhe dotalo ne sabhaha kuasa naꞌa, ingka sedhuluꞌa kadahano bhe endefiꞌini.

²¹ Mie medando naꞌa sakotuꞌuno netaamo paise sepaliꞌa damandeꞌao kaangkaꞌano kabanara, bhe damandeꞌaane maka dokukundo pahinta mongkilo nefosampe ne andoa naꞌa.

²² Podiundo nopokantibha mpuu bhe wambano kapalenda aini “O daꞌu suli nososo tongkano, o wewi mada mekadiuno nosuli toha nofelembo.”