2 Petrus 1 - Muna Southern Dialect

Kalengkano suha 1:1-2

¹ Suha aini nomaiꞌao ne Simon Petrus, palima-lima bhe rasuluno Yesus Kristus, so bhahitieꞌi pototoꞌano kaparasaea bhe insaodi. Nepulaoꞌaoku kaparasaeantoomu ne Yesus Kristus, Lahataꞌalantoomu mosalamati kaita bhe meowano kaꞌadhili.

² Sio-siomo sadhia namaꞌangkoomu kabarakati bhe katohopono dadi pontalabhi-labhino, hampano kaparasaeamiu ne Lahataꞌala bhe ne Yesus Ompuntoomu.

Kabhasi bhe kapilino Lahataꞌala 1:3-15

³ Lahataꞌala nopakemo kuasa Kaseemie-mieꞌano, nowaꞌa kaita sabhaha maraluuꞌano so dadumadi lumebeꞌao. Kafowaꞌaoꞌano hampano dopandeꞌaanemoomu Kristus, Anoamo fobhasino so daealaꞌao dawu weo kakalabhiano bhe kataano lalono.

⁴ Pedamo anaꞌa Lahataꞌala nowaꞌa kaitaomu sabhaha dhandino koharagaano bhe foliuno kakalabhia. Hampano dhandi anaꞌa lapamoomu ne sabhaha kapoindalo fodai-daino ne dhunia ini, maka mealaomu dawu weo sifatino Lahataꞌala.

⁵ Dadiꞌanomo uleiꞌe mpuu lalomiu neanomo kaparasaeamiu ne Kristus napotubhahi bhe habu metaa; habu metaa napotubhahi bhe kapande.

⁶ O kapande napotubhahi bhe kafewanakino totono lalo; kafewanakino totono lalo napotubhahi bhe kakosabaha dopotaami weo kasabha; kakosabaha dopotaami weo kasabha napotubhahi bhe dadi lumebe.

⁷ Kalebeno dadi napotubhahi bhe kanini ne bhahitieꞌinto; kanini ne bhahitieꞌinto napotubhahi bhe kanini kaasi ne kosasawindo mie bhainto.

⁸ Ane kosasawiꞌae podiu saꞌituini makesieꞌomu dhulu oleo dhulu kantuhu, tetewei nakumaꞌende-ende totono lalomiu kumahadhaaꞌomu bhe nakohasili metaa, sampe sedhuluꞌa dua mandeꞌaaneomu Yesus Kristus Ompuntoomu.

⁹ Tamaka o mie tapa makesino podiu anaꞌa tapedamo mie mohawuno mata tawa kabunto, nolimpuꞌaanemo ingka dhosano endefiꞌini padamo dofekanggelaꞌiane.

¹⁰ Dadiꞌanomo bhahitieꞌiku, uleiꞌe mpuu lalomiu fotiwohaeꞌomu putae kotu-kotuꞌu hintimiu itu nobhasikoomu bhe nopilikoomu Lahataꞌala. Ane humabuomu nada anaꞌa, ingka paise mondawuomu weo dhosa tawa sumowoaneomu kaparasaeamiu.

¹¹ Nadamo naꞌa hintimiu daelengkaangkoomu kaangkaꞌa molalesa mesuaꞌomu weo kafopahintaꞌa suhue dhamani, ingka aitumo kafopahintaꞌano Yesus Kristus Ompuntoomu mosalamati kaitamo.

¹² Kanandooꞌanomo patudhuku sadhia ameꞌulaiangkoeꞌomu bhahi-bhahiꞌae ini, mahingga pandeꞌaanemoomu bhe nomatangkamo koehemiu weo kabanara toka netahimamiu.

¹³ Kaomponano paeꞌo ahumunsa mbadha kasaraku ini, aabhiemo dua takaku sadhia ameꞌulaiangkoeꞌomu bhahi-bhahiꞌae ini.

¹⁴ Kapaꞌamo apandeꞌaane dadiku ini paemo naomponaa, ingka padamo nofohato kanau wutono Yesus Kristus Ompuntoomu.

¹⁵ Dadiꞌanomo aꞌuleiꞌe laloku neanomo mahinggamo akundomo, kosasawiꞌae naꞌa sadaa-daaꞌe meꞌulaiꞌeomu.

Petrus nembali sakusiino kakalabhiano Kristus 1:16-21

¹⁶ Wakutuuno tafohatoangkoomu kuasano Omputo Yesus Kristus bhe kahatoꞌano mada kaowu, insaodi miina tamangkafi kapu-kapuna nehabundo manusia, tamaka padamo tawohaꞌao wuntano mata mani kakalabhiano.

¹⁷ Insaodi tawohaꞌao wuntano mata mani Yesus netahima kakalabhia bhe kafosibhala ne Lahataꞌala Amano. Wakutuu anaꞌa notifetingke suahano Foliuno Kakalabhia nokobhoasao ne Anoa ambano, “Anoamo ini anaku timoasiꞌaono, neposahasiꞌaono laloku.”

¹⁸ Suaha anaꞌa tafetingkeꞌao wuto mani nomaiꞌao te surugaa wakutuuno tapoowa-owa bhe Anoa te gunu mongkilo.

¹⁹ Dadiꞌanomo sedhuluꞌa kamatangkano tafintahaki putae bhoasaono Lahataꞌala nekosuahaꞌaondo ana-anabii daanumo nentoo. Naetaa mpuu umondofaaneomu bhoasao anaꞌaa, kapaꞌamo nokotilanga pedamo kantalea we mohohondoꞌano. Tilanga aitu ondo-ondoeꞌomu kansuhu, ampa nahumaha kamentae maka o kowine nakotilanga weo totono lalomiu.

²⁰ Foliuno kafaraluu so nepandeꞌaomiu: kaowilino Lahataꞌala mangkaꞌano ne ana-anabii tibuhino weo Kitabi, paise naembali damaꞌanakie ampa kapoindalono wutondo.

²¹ Kapaꞌamo miina nandumandooa kaowilino Lahataꞌala nefosampendo ana-anabii nomaiꞌao ne kapoindalondo manusia, tamaka kuasano Rohino Lahataꞌala kumabhintino ana-anabii sampe dokosuahaꞌao kaowilino Lahataꞌala.