2 Korintus 9 - Muna Southern Dialect

Dehompu dhoi so umati we Yudea 9:1-5

¹ Pokaiꞌano bhe kaꞌondofao so umati marasaeano ⸤ we Yudea⸥ , ingka miinamo namaraluu abuhiangkoeꞌomua.

² Apandeꞌaanemo kahelasino fotulumiomu, ingka padamo dua afowoseangkoomu bhakeku ne miendo Makedonia. Ambaku peda aini, “Umati we kadieno Akaya ⸤ we kotano Korintus⸥ domantaa-ntaamo dafowaꞌao mpini ne taꞌu itu.” Dofetingke kakaꞌende-endeno lalomiu itu dobhahi dua tisangkeno totono lalo.

³ Atudu bhahitieꞌi ⸤ totoluno⸥ ini neanomo tula-tula mani tafowoseangkoomu bhake mani ini pae nasumia-siaꞌa, tamaka hintimiu kotu-kotuꞌu mantaa-ntaaꞌomu peda wambaku naꞌa.

⁴ Kapaꞌamo ane bhe miendo Makedonia so mangkafi kanau tamai we hintimiu, maka dahumatofikoomu pae mantaa-ntaaꞌomua, tetewei insaodi, bheane bhe hintimiu dua, taoambanomo hampano kaposahunaꞌao mani ne hintimiu.

⁵ Kanandooꞌanomo weo fekihiku nofaraluu aesalo bhahitie andoa ini damaꞌindulu damai we hintimiu, neanomo damontaa-ntaaꞌemo wawo kawaꞌao toka nedhandiꞌaomiu itu. Ane nada anaꞌa naentalea kawaꞌaomiu itu nomaiꞌao ne lalo mohelasi, suano kawaꞌao nefosuhu.

Dofowaꞌao weo kahelasi neowa kabarakati 9:6-15

⁶ Tandaiꞌeomu! Mie meꞌewino seendai tantumo natumobhe seendai dua, mie meꞌewino nobhahi teteweimo nabhahi dua natumobhea.

⁷ Seemie-seemie tabeano nafowaꞌao ampa kahelasino wobhano handano, koise nokobuku lalono, koise dua hampano dofosuhue, kapaꞌamo Lahataꞌala noasiꞌao mie fowaꞌaono weo kawulano lalo.

⁸ Maka Lahataꞌala nokokuasa namaꞌangkoomu sabhaha kabarakatino napontalabhi-labhi, sampe sabhaha kafaraluu weo dadimiu sadhia napokapo-kapo, bhahamoa tanakolabhimo so mehabuꞌaoꞌomu sabhaha metaaꞌano.

⁹ Aini noposahataa bhe tibuhino weo Kitabi peda aini, “Anoa nopodawu-dawu bhe mie mokae, habu metaano nalumagi ampa suhue dhamani.”

¹⁰ Anoa mefontaa-ntaano wine mbali mie meꞌewino, Anoa mefontaa-ntaano oti so daomaa, Anoamo dua montaa-ntaano wine nefaraluumiu maka namekabhahie wine neꞌewimiu itu sampe nasedhuluꞌa dua kabhalano pehapimiu, maꞌanano o habu metaano.

¹¹ Hintimiu namekahangkaeakoomu ne ae maka dua sampe sadhia nalalesa lalomiu fowaꞌaoꞌomu. Kawaꞌaomiu so neowa mani naꞌa somo tingkuno mie bhahi daefoampe katumpuno lalo ne Lahataꞌala.

¹² Kapaꞌamo taka kaꞌondofao nedhalangimiu ini suano kaowu namokapo nemokaeꞌaondo umati marasaeano, tamaka namodhulu dua kabhahino katumpuno lalo ne Lahataꞌala.

¹³ Kawaꞌaomiu naꞌa bukutiinomo kaꞌondofaomiu, maka ⸤ umati marasaeano we Yudea⸥ damekakalabhia Lahataꞌala, hampano dowoha kakampuu-mpuumiu angkafiomu Bhihita Metaano Kristus neparasaeamiu. Damudhi dua Lahataꞌala hampano bhe kalalesano lalomiu podawu-dawuomu bhe andoa bhe sabhaha mie.

¹⁴ Andoa dasumambaheaꞌangkoomu bhe naokamba mpuu lalondo damohakoomu, hampano rahamatino Lahataꞌala pontalabhi-labhino ne hintimiu.

¹⁵ Foampe kaitaomu katumpuno lalo ne Lahataꞌala hampano kawaꞌaono pata tikiha-kihano!