2 Korintus 8 - Muna Southern Dialect

Kalalesano lalo dofowaꞌao 8:1-15

¹ Bhahitieꞌiku, tamohatoangkoomu dua kataano lalono Lahataꞌala ne tombu-tombudo umati we kadieno Makedonia.

² Mahinggamo doꞌudhianda kasabha mobhie, nokaꞌende-ende kawulano lalondo; mahinggamo notolau kakaendo, tamaka nopontalabhi-labhi kalalesano lalondo dofowaꞌao.

³ Asakusiianda wutoku, andoa dofowaꞌao ampa kamondoindo bhahaa tanokolabhimo dua.

⁴ Weo kahelasino lalondo, desalo bhe adho dofosuhu kainsami gaondo damolalesada dua daeala dawu weo katulumi so umati marasaeano ⸤ we Yudea⸥ .

⁵ Kawaꞌaondo noliuꞌe nehatono fekihi mani. Kabhao-bhaono doowa wutondo ne Ompu, pada anaꞌa noposahataa bhe kapoindalono Lahataꞌala, doowamo dua wutondo ne insaodi.

⁶ Kanandooꞌanomo taesalomo Titus namai we hintimiu namotoka kahadhaano kanini kaasi toka nefetompunaꞌino ne olotamiu itu.

⁷ Hintimiu hangkaeamoomu weo kaparasaea, hangkaeamoomu weo folimbaꞌano fekihi bhe kapande, hangkaeamoomu dua weo kakampuu-mpuu so potulu-tulumiꞌa, hangkaeamoomu weo kanini kaasi ne insaodi. Naetaa mpuu ane humangkaeaꞌomu dua weo kahadhaano kanini kaasi ini.

⁸ Apugau peda aini suano kanggetu pahinta, tamaka afotiwohaangkoomu kaowu kakampuu-mpuundo bhahitie sigaoꞌano dofotulumi, neanomo amandeꞌaanemo dua kahelasino kanini kaasimiu.

⁹ Ingka pandeꞌaanemoomu rahamatino Ompuntoomu Yesus Kristus: mahinggamo nohangkaea, nohelasimo nembali mie mokae so hintimiu, neanomo noangka ne kakaeno hintimiu humangkaeaꞌomu.

¹⁰ Naetaa amolimbaangkoomu fekihiku, bhahaꞌi kaowu nakofahalaa dua so hintimiu: naetaa motokaeꞌomu kahadhaa toka nefetompunaꞌimiu itu. Ingka ne taꞌumo itu hintimiumo kabhao-bhaono humelasino fowaꞌaono maka daanumo fodhalaemoomu.

¹¹ Dadiꞌanomo aitu fotokaemoomu. Naetaa nakaꞌende-ende lalomiu motokaeꞌomu naposahataa bhe kahelasino lalomiu pakatitandakino, ampa so nepoo-poolimiu.

¹² Kapaꞌamo sumanomo dohelasi dofowaꞌao, o kawaꞌao naꞌa natumahimae Lahataꞌala ane naposahataa bhe ndumandooꞌano ne manusia; Lahataꞌala miina naesalo pata ndumandooꞌano ne manusia.

¹³ Suano patudhuku dofewowoꞌonikoomu so naosapeꞌao mie bhaimiu, tamaka so nopototo-totoꞌao kabhieno bhe kasapeno wowoꞌo.

¹⁴ Dadiꞌanomo aitu kanandoomiu somo mokapono nemokaeꞌaondo mie bhaimiu; mada kaowu kanandoodo mie bhaimiu somo mokapono nemokaeꞌaomiu, neanomo nopototo kabhieno bhe kasapeno wowoꞌo.

¹⁵ Ingka weo Kitabi notibuhi peda aini, “Mie mobhahino mefoꞌonuno miina napontabhila-bhilaa, mie mefoꞌonuno seendai miina naokaea.”

Titus bhe sabhangkaꞌino dotududa we Korintus 8:16-24

¹⁶ Notumpu lalo mani ne Lahataꞌala hampano Titus nowaꞌane kakampuu-mpuuno lalo noꞌondofao hintimiu, nopototo bhe insaodi.

¹⁷ Daanumo notahima metaaꞌe kamesalo mani, tamaka hampano kabhalano kakampuu-mpuuno nopoindaloꞌao wutono namai we hintimiu itu.

¹⁸ Nopoowa bhe anoa tatudu dua seemie bhahitie tipudhino ne sabhaha tombudo umati, hampano kahadhaano weo foleleꞌano Bhihita Metaa.

¹⁹ Suano kaowu taꞌanaꞌa, tamaka mie aini padamo dua dopilie umati marasaeano so pobhai kainsami weo kala-kala mani ⸤ we Yerusalem⸥ . Kapaꞌamo takumala we naꞌa taewowoꞌo kawaꞌaono kanini kaasi ini, somo kakalabhiano Ompu, somo dua bukutiino kahelasino lalo mani.

²⁰ Gao mani pae bhe so moꞌala kainsami weo dhalangiꞌano taka mani ini hampano hasilino nobhahi sepaliꞌa.

²¹ Patudhu mani sadhia taehabu metaaꞌano, suano kaowu ne wiseno Lahataꞌala tamaka ne wisendo dua manusia.

²² Poowa bhe andoa ⸤ hoduano⸥ ini taetudu dua seemie bhahitientoomu, anoa ini nentuhumo taꞌudhie maka sadhia notiwohamo kakampuu-mpuuno nofotulumi. Aitu sedhuluꞌamo dua kakampuu-mpuuno lalono nafotulumi hampano kabhalano kaposahunaꞌaono ne hintimiu.

²³ Titus ini ingka sabhangkaku pobhai kanau takahadhaa so hintimiu; pedamo dua bhahitie ⸤ hoduano⸥ mangkafie itu, ingka andoa katudundo umati, mie meowano kafosibhala so Kristus.

²⁴ Dadiꞌanomo fotiwohaeꞌomu kanini kaasimiu ne andoa ini, neanomo tombudo umati sigaoꞌano damandeꞌaanemo bhe kawoseno bhake mani kaomponae ini tapulaoꞌao hintimiu itu nakobukutiimo.