2 Korintus 7 - Muna Southern Dialect

¹ Bhahitieꞌiku timoasiꞌaono! Ampa aitu dotahimaemo sabhaha dhandi anaꞌa. Dadiꞌanomo fekangkilo kaitaomu wutontoomu ne sabhaha mefekahakuno mbadha bhe alusu. Ulei kaitaomu lalontoomu so nasumangkaꞌao kangkilono dadintoomu, hampano doteꞌi ne Lahataꞌala.

Kawulano lalo nopalusi kaguguhu 7:2-16

² Lengka kainsamiomu totono lalomiu! Ingka miina takokaꞌala ne laꞌae maka dua, ingka miina bhe nefekahugi mania, miina dua taeꞌondofi laba ne laꞌae maka dua.

³ Apugau peda ini miina amoꞌalakoomu; ingka padamo afohatokoomu insaodi ini taoasiangkoomu sepaliꞌa, dadiꞌanomo intaodiomu dosedadiꞌa semateꞌamo.

⁴ Aokado apugau mentalea-mentalea ne hintimiu, bhe nowoseangkoomu bhakeku. Weo sabhaha kakadee-dee mani notilawesi mpuu laloku bhe nopontalabhi-labhi kawulano laloku.

⁵ Wakutuuno tahato ne Makedonia ini, mbadha mani miina sepaliꞌa bhe fewulea, hampano ne amai maka kahatoꞌa mani taetompaloi kasabha. Nomaiꞌao we simbali o potaga-tagaliꞌa, nomaiꞌao weo totono lalo mani o kateꞌi.

⁶ Tamaka Lahataꞌala melawesino mie mepandano diu, nolawesi kainsamimo noangka ne hatono Titus.

⁷ Suano kaowu taꞌo hatono Titus katilawesiꞌa mani, tamaka hampano dua tula-tulano neꞌawa kalawesino lalo ne olotamiu. Titus netula-tula kainsami kakambano lalomiu moha kanauꞌomu, kaguguhuno lalomiu, bhe kakampuu-mpuuno lalomiu potunduꞌa kanauꞌomu, sampe sedhuluꞌa dua kawulano laloku.

⁸ Dadiꞌanomo mahinggamo suhaku endefiꞌitu nofekakompeaha lalomiu, miina asumosoanea. Daanumo feadho asosoane dua wakutuuno apandeꞌaane suhaku maitu nofekakompeaha lalomiu, mahinggamo sekabantaha kaowu.

⁹ Tamaka aitu nowulamo laloku, suano mbaꞌinomo pada afekakompeaha lalomiu, tamaka hampano kakompeahano lalomiu naꞌa nofodolikomoomu ne Lahataꞌala fetompaanemoomu dhosamiu. Hampano kakompeahano lalomiu itu nopoangkafi bhe kapoindalono Lahataꞌala, dadiꞌanomo ingka miina tamekahugikoomua maumo naseendai.

¹⁰ Kapaꞌamo kakompeahano lalo poangkafiꞌano bhe kapoindalono Lahataꞌala neowa kafetompaino dhosa meowano kasalamati, maka paise dasumosoanea. Tamaka kakompeahano lalo maiꞌaono ne dhunia ini neowa mate.

¹¹ Ondoomu itu, neowaangkoomu ae bhahaa kakompeahano lalo poangkafiꞌano bhe kapoindalono Lahataꞌala? Ingka kakampuu-mpuuno lalo, nembalimo dua potunduꞌao wutomiu, mohakuemoomu o dhosa, moteꞌimoomu ne Lahataꞌala, nokambamo lalomiu moha kanauꞌomu, nokaꞌende-endemo totono lalomiu, undamoomu mebhotusiomu kokaꞌalano. Ne kosasawiꞌae ini ingka fotiwohaemoomu miina kokaꞌalaomu.

¹² Dadiꞌanomo kaebuhiꞌaku suha endefiꞌini suano mbaꞌinomo bhe mie kokaꞌalano maitu, suano dua mbaꞌinomo mie menamisino kakadee-dee dhohono habu umalano maitu, tamaka katibuhiꞌano neanomo mandeꞌaaneomu ne wiseno Lahataꞌala kakampuu-mpuuno lalomiu ne insaodi.

¹³ Katilawesiꞌanomo lalo mani. We simbalino kalawesi neꞌawa mani, mangke-mangkemo kawulano lalo mani tawoha kaꞌiano Titus, hampano fekatohopoeꞌomu lalono.

¹⁴ Afowoseangkoomu bhakeku ne anoa, ingka miina mekandidikiomu lalokua. Endefiꞌini insaodi sadhia tapugauꞌao kumotuꞌuꞌano ne hintimiu, pedamo dua pugau mani tafowoseangkoomu bhake mani ne Titus, ingka saneamo kumotuꞌuꞌano.

¹⁵ Aitu sedhuluꞌamo dua kabhalano kanini kaasino ne hintimiu, hampano nofeꞌulai kosasawimiu angkafiomu pugauno, wakutuuno tahimaeꞌomu fosibhalae bhe mihikieꞌomu.

¹⁶ Nowula laloku hampano sadhia aposahunaꞌaangkoomu.