2 Korintus 6 - Muna Southern Dialect

Taka kaꞌondofaono Paulus 6:1-13

¹ Peda mie kumahadhaano bhe Lahataꞌala, taesalo mpuu koise fosia-siaꞌeomua rahamatino Lahataꞌala toka netahimamiu.

² Kapaꞌamo Lahataꞌala nokobhoasao ⸤ weo Kitabi⸥ , “Ne wakutuu nepoindaloku afetingkekomo, ne oleono kafosalamatiꞌa atulumikomo.” Tandaiꞌeomu, ainimo wakutuu nepoindalono Lahataꞌala, ainimo oleo kafosalamatiꞌa naꞌa.

³ ⸤ Weo dhalangiꞌano taka mani⸥ takiido taehabu tingku so katifoꞌalaꞌa mani ne laꞌae maka dua, neanomo taka kaꞌondofao mani ini paise natisambili modaia.

⁴ Bhahamoa ne ae maka dua nehabu mani tafotiwoha wuto mani putae insaodi ini palima-limano Lahataꞌala: takosabaha tapotaamiꞌao sabhaha kakadee-dee, kaseke bhe kasabha,

⁵ dopepeki kainsami, dotohongku kainsami, dolibu kainsami, takahadhaa moꞌosa, nentela taekamboto, nentela dua nokae oti mani;

⁶ nongkilo totono lalo mani, takotimbangi, takosabaha, netaa lalo mani, bhe katulumino Rohino Lahataꞌala, bhe kanini kaasi kumampuu-mpuuno;

⁷ taefolele bhihitano kabanara, tafotiwoha kuasano Lahataꞌala, dadi banara mbalimo ewanga mani so tapopahisaꞌao bhe tapobentengiꞌao wuto mani;

⁸ dofosibhala kainsami tamaka dofekaꞌaebu kainsami dua, doꞌumbu kainsami tamaka dopudhi kainsami dua, mahinggamo nelaa lalo mani dofisikopahai kainsami;

⁹ doabhi kainsami mie pata tipandeꞌao, gahaꞌaitu dowolo dopandeꞌa kainsami, dokona kainsami tamo mateꞌa mani, gahaꞌaitu nandoo tadadi; dofodee-dee kainsami, tamaka miina dua tatipongkoa;

¹⁰ mahinggamo nokompeaha lalo mani sadhia taoꞌia, mahinggamo taokae tamaka dobhahimo mie nefekahangkaea mani, mahinggamo wohaꞌano miina takoꞌae-aea tamaka sakotuꞌuno nandoo bhahi-bhahiꞌae.

¹¹ Bhahitieꞌiku miendo Korintus! Ingka padamo tafohatokoomu mentalea-mentalea, tapadaemo tawolengkasiangkoeꞌomu totono lalo mani.

¹² Suano insaodi sumongkono totono lalo mani so hintimiu, tamaka hintimiu sumongkono totono lalomiu so insaodi.

¹³ Dadiꞌanomo so nopotimbaꞌao, apugau nada ne anaku wutoku, lengka kainsami totono lalomiu!

Koe foseꞌise wutomiu bhe mie tapa marasaeano 6:14—7:1

¹⁴ Koise foseꞌise wutomiu bhe mie tapa marasaeano ne Kristus. O ae bhahaa pototoꞌano kabanara bhe podiu modai? O ae bhahaa pototoꞌano kantalea bhe kahohondo?

¹⁵ Naembali bhahaa daseꞌise Kristus bhe Kafeompuꞌando seetani? O ae bhahaa pototoꞌano mie marasaeano bhe tapa marasaeano ne Kristus?

¹⁶ O ae bhahaa pokaiꞌano Lambuno Lahataꞌala bhe lambuno barahala? Ingka intaodiomu ini Lambuno Lahataꞌala dumadino, kapaꞌamo Lahataꞌala nokobhoasao, “Aeate bhe andoa, adumadi ne wunta-wuntando; o Idi aembali Lahataꞌalando, andoa daembali umatiku.”

¹⁷ “Dadiꞌanomo, bhoasaono Ompu, limbaomu maiꞌao ne olotando itu, gaatiomu wutomiu maiꞌao ne andoa itu; koemo medampasiomu giu timohakuno, maka atumahimakoomu.”

¹⁸ “Idi aembali amamiu, hintimiu somo anaꞌiku moꞌane bhe hobhine; pedamo naꞌa bhoasaono Ompu, Fofoliuno Kuasa.”