2 Korintus 5 - Muna Southern Dialect

¹ Kapaꞌamo tapandeꞌaane, mada kaowu dahumungga kadempo kaeateꞌantoomu ne dhunia ini ⸤ maꞌanano mbadha kasarantoomu⸥ , Lahataꞌala nofofontaa-ntaaꞌao lambu te surugaa so kaeateꞌa suhue dhamani. Kaeateꞌa anaꞌa miina dahumabue limando manusia.

² Nandoo deateomu weo kadempo ini, sadhia dofedee hampano nokambamo lalonto daetahima kaeateꞌa buꞌou maiꞌao te surugaa ⸤ maꞌanano mbadha nsurugaa⸥ , kao-kaomo daefokana pakea buꞌou.

³ Ane nada naꞌa alusunto bhemo ⸤ mbadha buꞌouno, tapedamo⸥ pakea buꞌou, dadi paemo dakalembi-lembia.

⁴ Nandoo deateomu weo kadempo ini, sadhia dofedee hampano kabhieno wowoꞌontoomu. Daanumo miina gaontoomu dahumunsaemo mbadha kasara ini, tamaka gaontoomu damakeemo mbadha nsurugaa, neanomo mbadha kasarantoomu ini natumoloemo dadi suhue dhamani.

⁵ Tamaka ingka wutono Lahataꞌala montaa-ntaa kaitaomu so patudhu anaꞌa, Anoamo dua maꞌa kaita Rohino somo kafekantoono dhandino ⸤ putae tetewei mada kaowu daꞌumawae kosasawiꞌae nedhandiꞌaono⸥ .

⁶ Dadiꞌanomo sadhia notangka totono lalo mani, tapandeꞌaane putae ane nandoo deate ne mbadha kasara ini, ingka dokodoꞌo bhe Ompu.

⁷ Hampano dadi mani nengkoha ne kaparasaea, suano mbaꞌinomo tawohaꞌao wuntano mata mani.

⁸ Dadiꞌanomo notangka totono lalo mani, tanamisie naetaamo tagumampi maiꞌao ne mbadha kasara ini maka taeate bhe Ompu.

⁹ Kanandooꞌanomo taꞌuleiꞌe lalo mani sadhia tamekaꞌia lalono Ompu, naetaa nandoo taeate ne mbadha kasara ini, naetaa dua tagumampianemo.

¹⁰ Kapaꞌamo ingka kosasawintoomu ini tetewei damewise ne kaengkohaꞌano Kristus so fobhotusino. Ne naꞌa seemie-seemie naꞌumawa so mantasiꞌano neꞌawano naposahataa bhe habuno mbadhano we dhunia, metaaꞌano tawa modaiꞌano.

Taka kaꞌondofao dopometaaꞌao manusia bhe Lahataꞌala 5:11-21

¹¹ Insaodi tapandeꞌaane maꞌanano doteꞌi ne Ompu, kanandooꞌanomo sadhia taꞌulei lalo mani so doparasaeaꞌao mie bhai mani. Lahataꞌala nolosangie mpuu totono lalo mani, bhe aposahunaꞌao naentalea dua weo totono lalomiu mie medano ae insaodi ini.

¹² Aini miina nakomaꞌana tasangke-sangke toha wuto mani ne hintimiu, tamaka tawaꞌangkoomu kasalawa mowose kainsami bhakemiu, neanomo naembali potobhoosiomu bhe mie mefosibhalano ulano manusia, suano totono lalo.

¹³ Ane wohaꞌa mani taobheemo ingka hampano kaꞌondofao ne Lahataꞌala; ane wohaꞌano taototo ingka hampano so kaetaaꞌamiu.

¹⁴ Kanini kaasino Kristus nowadhumpa kainsami, hampano tapandeꞌaanemo lalo mani ane seemie nomateꞌao mie bhahino, nokomaꞌana kosasawindo domatemo.

¹⁵ Kristus padamo nomate so kosasawindo manusia, neanomo manusia dumadino paemo dadumadi so wutondo tamaka so Kristus toka mateanda bhe nefowanu maiꞌao ne mate.

¹⁶ Dadiꞌanomo ampa aitu insaodi miinamo taetiliki kamanusiando mie bhai mani. Daanumo endefiꞌini tatilikie dua kamanusiano Kristus, tamaka haꞌoleo ini miinamo.

¹⁷ Sasuka seꞌiseno bhe Kristus ingka nembalimo manusia buꞌou, ngkodauꞌano nolalomo, nohatomo buꞌouꞌano.

¹⁸ Kosasawiꞌae ini nomaiꞌao ne Lahataꞌala. Noangka ne Kristus Lahataꞌala padamo nopometaa kaita bhe Wutono bhe nowaꞌa kainsami taka kaꞌondofao tapometaaꞌao manusia bhe Wutono.

¹⁹ Noangka ne Kristus Lahataꞌala nopometaaꞌao dhunia bhe Wutono, miinamo naelentu sabhaha kaꞌalando manusia. Insaodimo nefotakano tamolele bhihitano kapometaaꞌa ini.

²⁰ Dadiꞌanomo insaodi ini katuduno Kristus, kao-kaomo wutono Lahataꞌala tumangahikoomu noangka kaowu ne insaodi. Weo neano Kristus taesalo: owaomu wutomiu napometaaꞌangkoomu Lahataꞌala bhe Wutono.

²¹ Kristus tapa mehabuno dhosa, padamo nofoseꞌisee Lahataꞌala bhe manusia kodhosa, neanomo weo kaseꞌisentoomu bhe Kristus nafotahima Lahataꞌala peda mie banara.