2 Korintus 4 - Muna Southern Dialect

Arataa nsurugaa weo nuꞌua wite 4:1-15

¹ Insaodi tatahima taka kaꞌondofao aini hampano kabhelano lalono Lahataꞌala, patamo kaotembeꞌano lalo mani.

² Ampamo kaowu insaodi takiidoe sabhaha habu tifebuni timoambanoꞌaono, miina takoꞌakala bhe miina tabhansu-bhansule bhoasaono Lahataꞌala, tamaka taefebhihitaiꞌao kabanara mentalea-mentalea. Taehabu peda anaꞌa ne wiseno Lahataꞌala neanomo sabhaha mie daꞌumondo metaa kainsami namaiꞌao weo totono lalondo.

³ Ane ibahano Bhihita Metaa neowa mani ini nandoo notiꞌonto, miina natilosangi, ingka mpahinomo mie humopeno ne kabinasa tapa lumosangie.

⁴ Kafeompuꞌando seetani kumuasaino dhamani aini nosongkowimo fekihindo mie tapa marasaeano sampe miina damoha tilangano Bhihita Metaa. Bhihita aini ingka nofofohatoꞌao kakalabhiano Kristus, ulanomo Lahataꞌala tiwohaꞌano.

⁵ Nefosampe mani ini suano bhihitano wuto mani, tamaka bhihitano Yesus Kristus, Anoamo Ompu. Insaodi taembali palima-limamiu hampano tafeompu ne Yesus.

⁶ Kapaꞌamo Lahataꞌala padamo nokobhoasao, “Nobheteꞌo toha tilanga weo kahohondo.” Ingka Anoamo dua mobheteno tilangano weo totono lalontoomu, neanomo naentalea fekihintoomu so dalumosangiꞌao kakalabhiano Lahataꞌala kotilangano ne ulano Kristus.

⁷ Arataa moꞌali ini neate ne nuꞌua wite ⸤ maꞌanano mbadha kasara mani⸥ , so nentaleaꞌao putae kaꞌosa pontalabhi-labhino naꞌa miina namaiꞌao ne wuto mani tamaka nomaiꞌao ne Lahataꞌala.

⁸ Ne amai maka dua sadhia dodandami kainsami tamaka miina tatiꞌontiꞌia, nomate akala mani tamaka miina naobhotua posahunaꞌao mani.

⁹ Sadhia dofodee-dee kainsami tamaka Ompu miina nakumataho kainsami tamoisa, dohambita kainsami tamaka miina tabinasaa.

¹⁰ Mateno Yesus sadhia tawoowae ne mbadha mani, neanomo dadino Yesus natiwoha dua ne mbadha mani.

¹¹ Maꞌanano, weo dadi mani ini sadhia taewiseki balaano mate hampano Yesus, neanomo dadino Yesus natiwoha dua weo mbadha kasara mani.

¹² Pedamo anaꞌa insaodi sadhia taewiseki mate, tamaka hintimiu meꞌawaomu dadi.

¹³ Weo Kitabi notibuhi peda aini, “Aparasaea, kapugauꞌakumo.” Kaparasaea mani ingka pedamo anaꞌa, dadiꞌanomo kapugauꞌa manimo dua.

¹⁴ Kapaꞌamo tapandeꞌaane putae Lahataꞌala mowanuno Ompu Yesus maiꞌao ne mate, namowanu kainsami dua tapoowa-owa bhe Yesus. Mada anaꞌa namowa kainsami te wiseno tapoowa-owa bhe hintimiu.

¹⁵ Bhahi-bhahiꞌae kasabha ini nokadhadhia so hintimiu. Kapaꞌamo dhulu kabhahindo mie nekapotino kabarakatino Lahataꞌala, dhulu kabhahindo mie so mefoampeno katumpuno lalo, somo kakalabhiano Lahataꞌala.

Koise notembe lalomiu mahinggamo mewisekiomu mate 4:16—5:10

¹⁶ Dadiꞌanomo insaodi ini miina naotembe lalo mani; mahinggamo mbadha kasara mani wohaꞌano dhulu kasiuru, tamaka totono lalo mani seꞌo-seꞌoleo dopahabuꞌounie.

¹⁷ Kapaꞌamo kasabha mosape sebantahano ini, naeowa kainsami kakalabhia suhue dhamani pata tikiha-kihano, sabhaha kasabha mani ini paemo bhe maꞌa-maꞌananoa.

¹⁸ Insaodi miina taoheruao tiwohaꞌano tamaka tapa tiwohaꞌano, hampano tiwohaꞌano ingka sekabantaha kaowu, tamaka tapa tiwohaꞌano nonandoo ampa suhue dhamani.