2 Korintus 3 - Muna Southern Dialect

Umondofaono Podhandiꞌa Buꞌou 3:1-18

¹ ⸤ Ane tapugau peda aini⸥ bhahaa kao-kaomo tasangke-sangkemo toha wuto mani? Bhahaa nokomaꞌana taefaraluu suha kataranga so hintimiu tawa namaiꞌao ne hintimiu peda nepakendo mie sigaoꞌano itu?

² Hintimiu itu ingka suha kataranga manimo, tokamo notibuhi weo totono lalo mani, dopandeꞌaane bhe nembali dobasae sabhaha mie.

³ Nentaleamo hintimiu itu suha nebuhino Kristus noangka ne insaodi. Suha aini miina dabuhiane dawati tamaka dobuhiane Rohino Lahataꞌala dumadino, miina dua dabuhie ne katibhano kontu tamaka ne katibhano totono lalondo manusia.

⁴ Kapugauꞌa mani peda anaꞌa, mbaꞌinomo kabhalano posahunaꞌao mani ne Lahataꞌala hampano Kristus.

⁵ Miina bhe tingku mania tapugau putae kahadhaa aini tapoolie wuto mani, miina kaꞌasi, tamaka kapooli mani saneamo kawaꞌaono Lahataꞌala.

⁶ Ingka Anoamo maꞌa kainsami kapooli taembali mie umondofaono Podhandiꞌa Buꞌou. Podhandiꞌa aini miina naengkoha ne tubho tibuhino, tamaka nengkoha ne Rohino Lahataꞌala, kapaꞌamo tubho tibuhino neowa mate, tamaka Rohino Lahataꞌala neowa dadi.

⁷ Podhandiꞌa meowano mate naꞌa dobuhiane patota ne katibhano kontu. Mahinggamo peda anaꞌa nopoangkaane kakalabhiano Lahataꞌala. Tilangano kakalabhiano Lahataꞌala anaꞌa nentalea sepaliꞌa, sampe miendo Israel nosomba matando miina damondoiꞌea doꞌondo ulano anabii Musa, mahinggamo tilangano ne ulano sadhulu kahawu. Ane podhandiꞌa meowano mate naꞌa nopoangkaane kakalabhia pedando naꞌa,

⁸ mangke-mangkemo podhandiꞌa buꞌou mengkohano ne Rohino Lahataꞌala, tetewei nasedhuluꞌa dua kakalabhiano.

⁹ Sangiꞌanomo podhandiꞌa meowano kahukumu nokalabhiamo, bhemo toha podhandiꞌa meowano dadi pometaa bhe Lahataꞌala, ingka napontalabhi-labhi kakalabhiano.

¹⁰ Sakotuꞌuno ⸤ podhandiꞌa⸥ endefiꞌini nekonando nokalabhia, miina bhe maꞌa-maꞌananoa ane dopototoane bhe kakalabhiano ⸤ podhandiꞌa buꞌou⸥ moliuno bhahi-bhahiꞌae ini.

¹¹ Ane podhandiꞌa sedhulu-dhuluꞌano kahawu nokalabhiamo, mangke-mangkemo podhandiꞌa pata mohoohawuno, ingka tetewei nasedhuluꞌa dua kakalabhianoa.

¹² Hampano pedamo anaꞌa neposahunaꞌao mani, maka insaodi ini taokado tapugau ⸤ taefolele Bhihita Metaa⸥ .

¹³ Insaodi miina peda anabii Musa kumantutuno ulano, neanomo miendo Israel miina damoha tilangano Lahataꞌala sadhulu-dhuluꞌano kahawu.

¹⁴ Fekihindo nopapa, kapaꞌamo taꞌampamo haꞌoleo ini kantutu endefiꞌini sadaa-daaꞌe dopakee ane debasa Kitabino podhandiꞌa ngkodau. Kantutu aini kaneꞌomo natilengka ane o mie doseꞌise bhe Kristus.

¹⁵ Ingka taꞌampamo aitu ane debasa Kitabino anabii Musa totono lalondo sadhia nodapohie kantutundo naꞌa.

¹⁶ Tamaka ane seemie manusia nodoli ne Ompu, maka kantutu anaꞌa doaliemo.

¹⁷ O Ompu maitu o Rohi, maka ne amai kanandooꞌano Rohino Lahataꞌala, ne itumo dua kanandooꞌano kabebasi.

¹⁸ Ampa aitu kosasawintoomu ini sanea tapa mekantutuno, ulantoomu miina natidapohia, tapedamo paeasa motiwohano kakalabhiano Ompu. Kanandooꞌanomo intaodiomu dotibhaliiꞌomu dhulu kapototo bhe ulano Wutono, dhulu kaompona dhulu kakalabhia. Kakalabhia amaitu ingka nomaiꞌao ne Ompu, Rohinomo Lahataꞌala.