2 Korintus 2 - Muna Southern Dialect

¹ Dadiꞌanomo padamo abhotusie weo totono laloku, pae kadeki amai toha we hintimiu bhahaa nokompeaha lalomiu.

² Kapaꞌamo ane amekakompeaha lalomiu, laꞌae dua so mekaꞌia kanau? Ingka dowolo dokompeaha lalondo hampano idi.

³ Kanandooꞌanomo aebuhiangkoomu suha, neanomo humato amai paise nakompeaha laloku. Kapaꞌamo hintimiu sakotuꞌuno so mekaꞌia kanau. Aparasaeakoomu mpuu, kawulano laloku ingka kawulanomo dua lalomiu kosasawimiu.

⁴ Wakutuu abuhi suha anaꞌa, nosabha handaku, noꞌuke bhe afeenei, nopontuhufi bhe luuku. Suano patudhuku so nokompeahaꞌao lalomiu, tamaka neanomo mandeꞌaaneomu kabhalano kanini kaasiku ne hintimiu.

Mie kokaꞌala tetewei damaꞌafuane 2:5-11

⁵ Ane bhe fofekakompeahano lalo, ingka suano idia nefekakompeahano laloa, tamaka kosasawimiu, tawa, keana nopontalabhi-labhi pugauku, seemie hodua ne olotamiu itu.

⁶ Mie medando naꞌa netaamo kaowu netahima kahukumu maiꞌao ne hintimiu bhahino.

⁷ Ampa aitu tetewei maꞌafuaneomu kaꞌalano bhe lawesieꞌomu lalono keana notondu weo kakompeahano totono lalono.

⁸ Dadiꞌanomo aesalo mpuu fotiwohaeꞌomu putae kotu-kotuꞌu moasianeomu.

⁹ Ingka ainimo patudhuno katibuhiꞌano suhaku endefiꞌitu, somo kaꞌudhimiu bhahaꞌi kotu-kotuꞌu angkafiomu sabhaha kafoinaꞌuku.

¹⁰ Kapaꞌamo laꞌae nemaꞌafuꞌaomiu kaꞌalano, ingka amaꞌafuanemo dua. Kapaꞌamo toka nemaꞌafuꞌaoku, ane daanumo nandoo so nemaꞌafuꞌao, ingka ahabuemo ne wiseno Kristus so kaetaaꞌamiu.

¹¹ Kahabuꞌaku peda naꞌa neanomo Kafeompuꞌando seetani paise naeala kasalawa nafokuasai, ingka dopandeꞌaanemo mpuu patudhu modaino.

Kamihino lalono Paulus we Troas 2:12-13

¹² Ahato we Troas, patudhuku aefolele Bhihita Metaano Kristus, gahaꞌa wutono Ompu padamo nelengka kanau kasalawa metaa so kahadhaa anaꞌa.

¹³ Ampamo kaowu totono laloku miina natumohopoa, hampano miina apoꞌawa bhe bhahitieku Titus. Dadiꞌanomo lasao afealai maka apansuhu ne Makedonia ini.

Kafotalono Kristus 2:14-17

¹⁴ Foampe kaitaomu katumpuno lalo ne Lahataꞌala, kapaꞌamo Kristus noowa kainsami tabhatompa weo hame-hameno kafotaloꞌano, hampano kaseꞌise mani bhe Anoa. Lahataꞌala nopake kainsami taefolele Bhihita Metaano Kristus ne amai maka dua tapedamo wonono mina-mina mowonduno.

¹⁵ Kapaꞌamo insaodi ini tapedamo wonono dupa netununo Kristus so Lahataꞌala, ne olotando mie nefosalamati bhe ne olotando mie so binasano.

¹⁶ Mbali mie so binasano insaodi ini tapedamo wonono bhangke meowano mate, tamaka mbali mie sumalamatino tapedamo wono mowondu meowano dadi. Kaowu laꞌae bhahaa so moolino taka bhalano pedando inia?

¹⁷ Kapaꞌamo insaodi ini miina tapototo bhe mie bhahino meꞌondofino laba ne bhoasaono Lahataꞌala. Patudhu mani nohelasi, weo kaseꞌise mani bhe Kristus tapugau ne wiseno Lahataꞌala peda mie nefotakano wutono Lahataꞌala.