2 Korintus 13 - Muna Southern Dialect

Katangahi kapuliaono 13:1-10

¹ Aini katolu pakunomo amantaa-ntaa amai we hintimiu. ⸤ Weo Kitabi notibuhi,⸥ “Sehonda parakara kaneꞌomo notiangga ane bhe sakusiino dohodua tawa dototolu.”

² Ingka mieꞌi mehabuno dhosa endefiꞌini bhe mie sigaoꞌano dua padamo aefeꞌulaianda wakutuuno amai we hintimiu kahaa pakuno itu. Aitu nandoo dopokodoꞌotiomu, amenduaꞌangkoeꞌomu toha, humato amai mie pedando anaꞌa paemo aooloandaa daeꞌawa kahukumu.

³ Kapaꞌamo hintimiu meꞌondofiomu bukutii putae Kristus nokowamba noangka ne idi. Kristus miina nalumubhakikoomu tamaka nofotiwohae kuasano ne olotamiu itu.

⁴ Daanumo kanaleno Kristus notiwoha wakutuuno dokantaiꞌe te sau salipu, tamaka ampa aitu nodadi hampano kuasano Lahataꞌala. Pedamo dua anaꞌa, insaodi seꞌiseno bhe Anoa taonale, tamaka hampano kuasano Lahataꞌala tadumadi tapoowa bhe Anoa so kaetaaꞌamiu.

⁵ Tiisangi totono lalomiu bhahaꞌi kotu-kotuꞌu parasaeaꞌomu ne Kristus. Udhi wutomiu! Miina mandeꞌaaneomu gahaꞌa putae Kristus Yesus nodadi weo totono lalomiu? Ane pae nada naꞌa, ingka miina mooliomu kaꞌudhi anaꞌa.

⁶ Ampamo kaowu aposahunaꞌao mandeꞌaaneomu insaodi ini suano mie tapa moolino kaꞌudhi anaꞌa.

⁷ Insaodi tasambahea ne Lahataꞌala keana mehabuomu modaiꞌano. Patudhu mani suano so notiwohaꞌao putae taka mani nokohasilimo, tamaka neanomo hintimiu mehabuomu metaaꞌano. Hunsaꞌanomo wohaꞌano taka mani miina nakohasilia.

⁸ Kapaꞌamo pae bhe so nepooli mani ane tapoewangi bhe kabanara, so nepooli mani ampamo tamangkafi kabanara.

⁹ Kapaꞌamo nowula lalo mani ane taonale tamaka hintimiu moꞌosaomu. Ingka ainimo sadhia nesambaheaꞌao mani neanomo nasumangka dadimiu.

¹⁰ Kanandooꞌanomo abuhiangkoomu suha aini tinangke dopokodoꞌotiomu, neanomo humato dapoꞌawa-awaomu paise namaraluua amake kuasano Lahataꞌala aꞌumosapikoomu. Kapaꞌamo kuasano Lahataꞌala nowaꞌa kanaꞌe so amekamatangkaꞌao kaparasaeamiu, suano kuasa so mohansurukoomu.

Kasongkono suha 13:11-13

¹¹ Panda-pandano, bhahitieꞌiku, fowulae lalomiu, fosangkae dadimiu! Tahimaeꞌomu sabhaha katangahi nefohatoꞌaoku ini. Sekakolaloomu, dadiomu weo kapometaa, maka Lahataꞌala kamaiꞌaoꞌano kanini kaasi bhe katohopono dadi sadhia napobhaiangkoomu!

¹² Pofea-feabha bhe pomoni-moniniꞌaoꞌomu peda bhahitie pomoa-moasiꞌaono. Salam maiꞌao ne kosasawindo umati marasaeano ne ini so hintimiu.

¹³ Sio-siomo sadhia napobhaiangkoomu kabarakatino Ompu Yesus Kristus, bhe kanini kaasino Lahataꞌala weo kaseꞌisentoomu bhe Rohino Lahataꞌala.