2 Korintus 12 - Muna Southern Dialect

Powoha bhe kafohato netahimano Paulus 12:1-10

¹ Daanumo miina bhe fahalaano dosangke-sangke wuto, tamaka aitu tetewei asumangke wutoku amohatoangkoomu powoha bhe kafohato neꞌawaku maiꞌao ne Ompu.

² Apandeꞌaane seemie sarani, ompulu fato taꞌu kumundoꞌano maitu notisangke te lani katolu sunsuno, ⸤ maꞌanano surugaa⸥ . (Miina amandeꞌaanea bhahaꞌi kotu-kotuꞌu mbadhano tisangkeꞌano bhahaꞌi weo powoha kaowu, ampamo wutono Lahataꞌala mandeꞌaane).

^3-4 Apandeꞌaane mie anaꞌa notisangke nopesua te Firdaus, ⸤ maꞌanano surugaa⸥ . (Miina amandeꞌaanea bhahaꞌi kotu-kotuꞌu mbadhano tisangkeꞌano bhahaꞌi weo powoha kaowu, ampamo wutono Lahataꞌala mandeꞌaane). Te naꞌa, anoa nofetingke wamba tapa tisambili, tapa dua membaliꞌano dokowambaane manusia.

⁵ Mie aini asumangke-sangkee, tamaka wutoku paise, mpahinomo asumambili kaowu giu motiwohano kanaleku ini.

⁶ Kapaꞌamo ane ibahano asumangke-sangke wutoku, ingka idi ini suano mie kabhohe-bhohe, hampano sabhaha nekowambaꞌaoku nokotuꞌu. Tamaka hunsaꞌanomo koemo apugaua, keana bhe mabhi kanau aliuꞌemo kahadhaaku newohando tawa pugauku nefetingkendo.

⁷ Keana amekalangke diuku hampano powoha mangaliuno naꞌa, defopesua kanau kihi ne uluku, maꞌanano katuduno Kafeompuꞌando seetani mbalimo modee-dee kanau. Patudhuno neanomo pae amekalangke diuku.

⁸ Pokaiꞌano bhe aini tolu pakumo aesalo ne Ompu, gaoku damalieꞌo toha.

⁹ Tamaka Ompu tanotobhoosi, “Nefaraluumu mpahinomo rahamatiku, kapaꞌamo kuasaku kaneꞌo nasumangka ane manusia nonale.” Dadiꞌanomo aoꞌia asangke-sangke wutoku afotiwoha kanaleku ini, neanomo sadhia nakumaolumi kanau kuasano Kristus.

¹⁰ Kanandooꞌanomo aoꞌiaꞌanemo dua kanaleku ini. Aoꞌiamo dua ane mbaꞌinomo afeompu ne Kristus doꞌumbu kanau, aeꞌawa sabhaha kasabha bhe kaseke bhe dofodee-dee kanau. Kapaꞌamo weo kanaleku ini, kaoꞌosaꞌakumo dua.

Kamihino lalono Paulus 12:11-21

¹¹ Daanumo aembalimo bhohe, tamaka hampano sekehemi kanauꞌomu hintimiu. Sakotuꞌuꞌano tabeano mudhi kanauꞌomu, hampano mahingga miina akomaꞌa-maꞌana, miina dua amepandaa ne rasuluꞌi mangaliuno naꞌa.

¹² Wakutuuno aeate bhe hintimiu, ingka padamo afotiwohaangkoeꞌomu bukutii putae idi ini seemie rasulu. Kapaꞌamo akosabaha mpuu aehabu tanda-tanda tapa mentela, giu timenteꞌaono bhe kuasa mangaliuno.

¹³ O ae bhahaa tandano nokae kaꞌondofaoku ne hintimiu bhe kaꞌondofaoku ne tombudo umati sigaoꞌano? Ingka mpahinomo miina tumanggo kanauꞌomu. Aesaloane maafu kaꞌasi kaꞌalaku sehondano inia!

¹⁴ Sakotuꞌuꞌano ampa aitu tolu pakumo amantaa-ntaa amai we hintimiu itu, tamaka akiido amewowoꞌonikoomu. Kapaꞌamo suano fehebuaꞌamiu neꞌondofiku tamaka wutomiu. Ingka suano anaꞌi meꞌondofino kadadiꞌa so kamungkulano, tamaka o kamungkula meꞌondofino kadadiꞌa so anaꞌino.

¹⁵ Dadiꞌanomo idi ahelasianemo sabhaha fehebuaꞌaku so hintimiu, bhahaa bhemo wutoku ini ahelasianemo so kaetaaꞌamiu. Ane idi sadhulu kamoasiꞌaoku ne hintimiu, nopantasi bhahaa sedhulu kakongkono kamoasiꞌaomiu ne idi?

¹⁶ Ingka daanumo undamoomu miina amewowoꞌonikoomu, tamaka ⸤ ambamiu dua⸥ idi ini mie ngkoꞌakala, afekahugiangkoomu kabhohe-bhoheꞌi.

¹⁷ Koasiꞌamo dua! Bhahaa aeala laba ne hintimiu noangka ne mie netuduku ituda?

¹⁸ Ingka padamo atudu Titus bhe seemie bhahitie damai we hintimiu itu. Bhahaa Titus ini mealano laba ne hintimiu? Ingka kohodua mani takahadhaa tasepatudhu bhe tasekaangkaꞌa.

¹⁹ Fenaiku nomponamo nokoduku we lalomiu insaodi tapobenteꞌao wuto mani ne wisemiu. ⸤ Ingka miina.⸥ Sabhaha pugau mani ini takowambaane ne wiseno Lahataꞌala nopoangkafi bhe kapoindalono Kristus. Bhahitieꞌiku timoasiꞌaono, bhahi-bhahiꞌae ini tahabue so kamatangkaꞌano kaparasaeamiu.

²⁰ Kapaꞌamo nomihi laloku bhahasaa amai ahumatofikoomu napoꞌala bhe nepoindaloku, pedamo aitu hintimiu moha kanauꞌomu napoꞌala bhe nepoindalomiu. Nomihi laloku kunanomo bhe pogiha-gihaꞌa, pokondu-konduaꞌa lalo, amaha, kafosibhalano kafaraluuno wuto, poꞌumbu-umbu, pokamu-kamuntuiꞌao, kalangkeno diu, bhe kahungga.

²¹ Nomihi laloku bhahasaa amai toha we hintimiu Lahataꞌala namekapanda kanau ne wisemiu, maka naokompeaha laloku hampano dobhahi ne olotamiu itu kodhosano endefiꞌini miinaꞌo bhe kofetompaꞌa. Andoa sadaa-daa dohabu kansuhu diu pokahaku, pokawite-wite bhe tapa mantasiꞌano.