2 Korintus 11 - Muna Southern Dialect

¹ Gaoku mpuu sumabahaki kanauꞌomu ane feadho apugau ngkabhohe-bhohe; ingka kaomponano ini daanumo kosabahaomu ne idia.

² Nokondua laloku ne hintimiu tapedamo wutono Lahataꞌala. Hintimiu tapedamo seemie kalambe mongkilo, padamo apodhandi amogaakoomu bhe seemie moꞌane, ingka wutono Kristus.

³ Ampamo kaowu nomihi laloku bhahasaa dofekakolilino fekihimiu sampe paemo nakumampuu-mpuu kataino lalomiu ne Kristus, peda endefiꞌini Hawa nobhohe-bhoheꞌie akalano ule.

⁴ Kapaꞌamo wohaꞌamiu ingka tanetaaꞌimo dua ane dofohatoangkoomu Yesus poꞌalaꞌano bhe Yesus toka nefohatoꞌao mani. Wohaꞌano tahimaeꞌomu dua rohi poꞌalano bhe Rohi toka neꞌawamiu maiꞌao ne insaodi. Pedamo dua itu ingka tahimaeꞌomu dua bhihita poꞌalaꞌano bhe Bhihita Metaa toka netahimamiu maiꞌao ne insaodi.

⁵ Tamaka anamisi wutoku miina sepaliꞌa amepandaa ne sabhaha rasulu mangaliuno naꞌa.

⁶ Bheanea miina seaꞌe amandea apugau, tamaka weo kapande aabhi wutoku miina aobhohea; ingka kapande mani ingka padamo tafotiwohaangkoeꞌomu ne sabhaha habu mani ne amai maka dua.

Paulus miina namosibhala wutono 11:7-15

⁷ Wakutuuno aefebhihitaiangkoomu Bhihita Metaano Lahataꞌala, ingka miina aesalo tumanggo kanauꞌomu mahingga naseendai. Patudhuku afekapanda wutoku so asumangkeꞌao hintimiu. Bhahaa aꞌalamo ahabu peda anaꞌa?

⁸ Umati ne tombu-tombu sigaoꞌano kanggetumo afekahugida, hampano kaꞌondofaoku ne hintimiu, kapaꞌamo dotanggo kanau andoa.

⁹ Wakutuuno aeate bhe hintimiu maka aokae, ingka miina amekabhie hintimiu maumo naseemie, tamaka doomputi kanau bhahitieꞌi humatono maiꞌao ne Makedonia ini. Sadhia adhagani wutoku keana afekasabhakoomu, patudhuku nada ini kansuhu, pae aembali wowoꞌomiu.

¹⁰ Bhe kabanarano Kristus weo totono laloku, amohatokoomu: pugauku afowose bhakeku ini pae bhe so umonto-ontomiea ne kadieno Akaya itu.

¹¹ Noafa bhahaa kapugauꞌaku peda naꞌaa? Bhahaa mbaꞌinomo miina aoasiangkoomu? Ingka Lahataꞌala nopandeꞌaane aoasiangkoomu.

¹² O ae toka nehabuku ahumabue kansuhu keana mie andoa naꞌa deꞌawa kasalawa dasumangke-sangke wutondo bhe dapugau putae kahadhaando andoa maitu nopototo bhe kahadhaa mani ini.

¹³ Kapaꞌamo andoa maitu dompaharasu-rasulu, kahadhaando debhohe-bhoheꞌi mie, desahangka kaowu peda rasuluno Kristus.

¹⁴ Pae damentea, kapaꞌamo mahingga Kafeompuꞌando seetani nesahangkamo ne malaꞌekatino tilanga.

¹⁵ Dadiꞌanomo suanomo giu timenteꞌaono ane palima-limano Kafeompuꞌando seetani desahangka dua peda palima-limano kabanara. Panda-pandano daeꞌawa dua kahukumu naposahataa bhe habundo.

Kakadee-deeno Paulus peda seemie rasulu 11:16-33

¹⁶ Amenduaꞌangkoeꞌomu: koise bhe kumona kanau aobhohe. Tamaka ane bhe kofekihino peda naꞌa tatahima kanaumoomu peda seemie bhohe, neanomo naembali asumangke-sangke wutoku seendai.

¹⁷ Pugauku asumangke-sangke wutoku ini miina naposahataa bhe kapoindalono Ompu, tamaka akowambaane peda seemie bhohe.

¹⁸ Ingka dobhahimo sumangke-sangkeno wutondo peda mieno dhunia ini, dadiꞌanomo hunsaꞌanomo o idi dua asumangke wutoku.

¹⁹ Ingka netaa mpuu mesabahakiomu mie bhohe, hampano abhi wutomiu mie mande.

²⁰ Ane dofobhatuakoomu mie bhaindo, pedamo dua dososopi kanandoomiu, doꞌakalaikoomu, dofekalangke diundo ne wisemiu, dobhantofakoomu, ingka tasabahamoomu.

²¹ Hunsaꞌanomo aoambanoana, miina takumapoiꞌea kaꞌasi sabhaha habu medando naꞌa. Tamaka ne ae maka dua mie bhaindo dokado dosangke-sangke wutondo, o idi aokado dua. (Pugauku ini ingka pugaundo bhohe).

²² Bhahaa andoa maitu miendo Ibrani? Ingka idimo dua. Bhahaa andoa maitu miendo Israel? Ingka idimo dua. Bhahaa andoa maitu sampuꞌano Abraham? Ingka idimo dua.

²³ Bhahaa andoa maitu palima-limano Kristus? Aini apugau ngkabheemo, ingka idi ini afoliuda. Idi akahadhaa moꞌosa afoliuda andoa naꞌa, kantuhuno apesua katohongku afoliuda, kantelano dosikisaa kanau afoliuda, bhahamoa nentelamo dua aewiseki mate.

²⁴ Lima pakumo dohambisi kanau miendo Yahudi depake habuta, taenomo dohambi kanau ampa tolu fulu siua paku.

²⁵ Tolu pakumo dowangkuli kanau miendo Roma, sepakumo dua dobhatumbuli kanau kontu, tolu pakumo akalobu ne kapala, padamo dua aelanto-lanto we wuntano ndalo sealo seꞌoleo.

²⁶ Idi ini sakala, nentuhumo aewiseki balaano luano oe, balaano karampasi, balaa maiꞌao ne saliwuku miendo Yahudi bhe mie suano Yahudi; aewiseki balaa weo kota, balaa we pandaso bhalano, balaa we teꞌi; aewiseki dua balaa maiꞌao ne mie mpahabhahi-bhahitieno.

²⁷ Nobhahimo akahadhaa moꞌosa bhe atampu-tampu bukuku; nentela aekamboto, aoꞌaho bhe nokekele wuꞌuku; nentela miina aomaa miina aohoꞌua, aetahangi kahindi bhe kakaeno pakea.

²⁸ We simbalino anaꞌa seꞌo-seꞌoleo nomihi dua laloku afekihi kafaraluundo umati ne amai tombu.

²⁹ Ane bhe monaleno, ingka aonale dua; ane bhe mondawuno weo dhosa totono laloku pasae dotunue.

³⁰ Ane tetewei asumangke-sangke wutoku, ingka asumambili kaowu giu motiwohano kanaleku ini.

³¹ Lahataꞌala, Amano Ompu Yesus, nopandeꞌaane miina akopahaa. Natipudhi neano ampa suhue dhamani.

³² Wakutuuno aeate we kotano Damsyik, gubernur we kafopahintaꞌano omputo Aretas netudu mie dadhumagani kagualino kota dahumako kanau.

³³ Tamaka dotei kanau ne kalangka maka dofosibulu kanau maiꞌao te kaonga ne benteno kota, sampe alapa maiꞌao ne limano.