2 Korintus 10 - Muna Southern Dialect

Paulus nopotunduꞌao takano 10:1-11

¹ Idi, Paulus, bhe nemesaloku. Ambado miina aokado apugau ne wisemiu, aokado kaowu apugau ane apokodoꞌotiangkoomu. Aitu hampano kamaluno bhe kataano lalono Kristus,

² aesalo mpuu koise fosuhu kanauꞌomu aꞌumosapikoomu humato amai, kapaꞌamo patudhuku daanumo aꞌumosapida mie kumona kainsami tadadi taangkafi kaowu kapoindalono dhunia ini.

³ Insaodi daanumo nandoo tadadi ne dhunia ini, tamaka tapoewangi miina taepake ewangano dhunia.

⁴ Kapaꞌamo ewanga nepake mani suano ewangano dhunia, tamaka ewanga sumangkaꞌano bhe kuasano Lahataꞌala. Ewanga aini nomondoiꞌe nesansa sabhaha benteno liwu motangka.

⁵ Sabhaha akalando manusia tadai-daiꞌe, kalangkeno diundo manusia potagalino bhe kafoinaꞌuno Lahataꞌala tafohansurue kanggetu taesansa bente melangke. Sabhaha fekihindo manusia takuhumae maka tafotuhue ne wiseno Kristus.

⁶ Ane natiwohamo hintimiu kotu-kotuꞌu membaliomu mie meangkano ⸤ ne Kristus⸥ , insaodi tamantaa-ntaa tahumukumu sabhaha mie tapa meangkano.

⁷ Ingka taꞌondoomu kaowu tiwohoꞌano ne wisemiu! Ane seemie nokotu-kotuꞌu noabhi wutono fehebuaꞌano Kristus, naetaa namekihi totono lalono, ingka gahaꞌa insaodi dua ini fehebuaꞌano Kristus tapedamo anoa.

⁸ Ingka paemo aambanoa, mahingga adho asumangke-sangke wutoku putae insaodi ini taeꞌawa kuasa ne Ompu, o kuasa so tamekamatangkaꞌao kaparasaemiu, suano kuasa so mohansurukoomu.

⁹ Ampamo kaowu akiido kao-kaomo akateꞌifiangkoomu suhaku ini.

¹⁰ Kapaꞌamo ambado mie, “Suhano daanumo nogili bhe noꞌosa, tamaka gahaꞌa hato dopowise bhe mieno tanemalu-malusi, wambano miina nakomaꞌa-maꞌanaa.”

¹¹ Naetaa mie kofekihino peda naꞌa namandeꞌao lalono putae wamba mani ne suha wakutuuno dopokodoꞌotiomu, tanapototomo bhe so nehabu mani humato dapowiseomu.

Fekihino Paulus nopulaoꞌao wutono 10:12—11:6

¹² Daanumo miina taokado tamopesua wuto mani tawa tapototoꞌao wuto mani bhe mie sumangke-sangkeno wutondo. Ingka dobhohe sepaliꞌa, hampano deala tubho ne wutondo maka dopobandi-bandingiꞌao wutondo sapada-pada andoa.

¹³ Insaodi miina nada naꞌa, mahinggamo tasangke-sangke wuto mani tamaka miina taelimbaki tida. Sadaa-daa nandoo kainsami weo kadie kakahadhaaꞌa toka netidano Lahataꞌala, ingka nohato dua ampa we hintimiu itu.

¹⁴ Kapaꞌamo weo foleleꞌano Bhihita Metaano Kristus tahatomo ampa we hintimiu itu, miina taelimbaki tidano kahadhaa mani, dadiꞌanomo ane tasangke-sangke wuto mani hampano hintimiu, miina natolabhia.

¹⁵ Insaodi miina tasumangke-sangke wuto mani hampano kahadhaando mie sigaoꞌano, nehabundo we sembalino kadie netida so insaodi. Ampamo kaowu taposahunaꞌao kaparasaeamiu dhulu kamatangka bhe kahadhaa mani ne olotamiu itu nasedhuluꞌa dua kalalesa, naposahataa bhe kaꞌewano kadie toka netidano Lahataꞌala so insaodi.

¹⁶ Ane nada anaꞌa naembali dua taefolele Bhihita Metaa we liwu-liwu we simbalimiu itu, tamaka paise namaraluua tasumangke-sangke wuto mani hampano kahadhaa toka nehabundo mie sigaoꞌano weo tidano takando.

¹⁷ ⸤ Weo Kitabi notibuhi,⸥ “Mie sumangke-sangkeno wutono, naetaa namowose bhakeno hampano nehabuno Ompu.”

¹⁸ Kapaꞌamo mie so moolino ne kaꞌudhi, suano mie mudhino wutono, tamaka mie nepudhino Ompu.