2 Korintus 1 - Muna Southern Dialect

Kalengkano suha 1:1-2

¹ Suha aini nomaiꞌao ne idi, Paulus, rasuluno Kristus Yesus hampano kapoindalono Lahataꞌala, bhe nomaiꞌao dua ne Timotius bhahitientoomu. Apakatue so umatino Lahataꞌala we Korintus bhe kosasawindo umati mongkilono we kosekaꞌewaꞌae kadieno Akaya.

² Sio-siomo sadhia napobhaiangkoomu kabarakati bhe katohopono dadi maiꞌao ne Lahataꞌala Amantoomu bhe Ompu Yesus Kristus.

Wambano katumpuno lalo 1:3-11

³ Notipudhi mpuu Lahataꞌala Amano Ompuntoomu Yesus Kristus, Waꞌama kokabhelano lalo bhe kamaiꞌanomo sabhaha kalawesino lalo.

⁴ Anoamo sadhia lumawesi kainsami ne sabhaha kasabha mani, sampe insaodi nembali dua taelawesiane mie metompaloino sabhaha kasabha. Kalawesi aini tatahimae maiꞌao ne Lahataꞌala.

⁵ Kapaꞌamo taeꞌawamo kakadee-dee pontalabhi-labhino hampano kaseꞌisentoomu bhe Kristus, pedamo dua anaꞌa taeꞌawa kalawesi pontalabhi-labhino noangka ne Kristus.

⁶ Ane taeꞌawa kasabha, ingka somo kalawesino lalo bhe kasalamatiꞌamiu; ane dolawesi kainsami ingka somo kalawesino lalomiu, neanomo meꞌawaomu kaꞌosa weo potaamiꞌano kakadee-dee. Kakadee-deemiu itu ingka nopototo bhe netompaloi mani.

⁷ Kaposahunaꞌao mani ne hintimiu notangka, hampano tapandeꞌaane putae tapedamo dua mealaomu dawu ne kakadee-dee mani, mealaomu dawu ne katilawesino lalo mani.

⁸ Bhahitieꞌiku! Gao mani mpuu mandeꞌaaneomu kasabha netompaloi mani we kadieno Asia, ingka miina natipoolia kabhalano bhe kabhieno wowoꞌo netongku mani, sampe nobhotumo posahunaꞌao mani nandoo tadumadia.

⁹ Bhahamoa tanamisi kao-kaomo taeꞌawamo kahukumu mate. Ampamo kaowu, aini nokadhadhia keana sadhia taparasaea wuto mani tamaka tamasande kaowu ne Lahataꞌala mefowanuno mie mate.

¹⁰ Maiꞌao ne balaano mate mobhibhiisano maitu padamo nofosalamati kainsami bhe nandoo dua namosalamati kainsami. Anoamo neposahunaꞌao mani mpuu tetewei sadaa-daa namosalamati kainsami.

¹¹ Bhe hintimiu dua tumulumi kainsami weo sambaheamiu. Ane peda anaꞌa, dabhahi mie so mefoampeno katumpuno lalo ne Lahataꞌala hampano kadawu neꞌawa mani ini, mbaꞌinomo kabhahino sambaheando so insaodi.

Paulus nobhalii patudhuno 1:12—2:4

¹² Nowose bhake mani hampano totono lalo mani kumatanga-tangano nofohato kainsami putae nokotuꞌu dadi mani ne dhunia ini, ingka tadhalangie weo kangkilo bhe kahelasino lalo maiꞌaono ne Lahataꞌala, mangke-mangke dadi mani pokaiꞌano bhe hintimiu. Katidhalangiꞌano miina tamangkafi kapandedo manusia, tamaka tapasande ne rahamatino Lahataꞌala.

^13-14 Insaodi taebuhiangkoomu kaowu so nepooli nebasa bhe nelosangimiu. Ampa aitu ingka losangieꞌomu fekihiku bhe podiuku sigaꞌa kaowu, miinaꞌo nasumangkaa. Tamaka aposahunaꞌao naembali kotu-kotuꞌu lumosangieꞌomu, neanomo nahumato Oleono Ompuntoomu Yesus, hintimiu tetewei mowose kainsamiomu bhake, pedamo insaodi taowoseangkoomu dua bhake mani.

¹⁵ Hampano miina apoibhahaane kaposahunaꞌaomiu ne idi, patudhuku wakutuu anaꞌa amai kadeki apoꞌawaangkoomu, neanomo namehaa paku metahimaomu kabarakati.

¹⁶ Patudhuku wakutuu anaꞌa mada apoꞌawaangkoomu weo kala-kalaku we Makedonia, amaiꞌao we Makedonia asumuli toha se hintimiu, neanomo naembali tumulumi kanauꞌomu amopansuhu kala-kalaku we Yudea.

¹⁷ ⸤ Tamaka patudhu aini padamo abhaliiꞌe.⸥ Kunaꞌemiu nomuda sepaliꞌa abhali-bhalii fekihiku? Bhahaa nokomaꞌana ane akonipatudhu aangkafi kaowu kapoindaloku wutoku sampe sekabantaha afokoꞌuumbe sekabantaha afokopaise?

¹⁸ Bhe Lahataꞌala kumampuu-mpuuno ne dhandino, podhandi mani ne hintimiu miina napoibhaha uumbe bhe paise.

¹⁹ Hampano Yesus Kristus, Anano Lahataꞌala, miina sepaliꞌa napoibhahaa uumbe bhe paise, Anoa tanofokoꞌuumbemo. Anoamo ini toka nefebhihitaiꞌaondo Silas, Timotius bhe wutoku ne hintimiu.

²⁰ Kapaꞌamo noangka ne Kristus, Lahataꞌala nofokoꞌuumbemo ne sabhaha nedhandiꞌaono. Dadiꞌanomo hampano Kristus intaodiomu sadhia dotobhoosiomu “Amin!” ⸤ maꞌanano nokotuꞌu⸥ , mbali kakalabhiano Lahataꞌala.

²¹ Kapaꞌamo wutono Lahataꞌala mekamatangka kainsami bhe hintimiu dua weo kaseꞌisentoomu bhe Kristus. Anoa padamo nopili kaitaomu mbali umondofaane.

²² Padamo dua nokatanda kaita mbali fehebuaꞌano. Anoamo dua fowaꞌaono Rohino weo totono lalontoomu, somo kafekantoono dhandino ⸤ putae tetewei mada kaowu daꞌumawae kosasawiꞌae nedhandiꞌaono⸥ .

²³ Bhe Lahataꞌala sumakusii kanau, ingka nopandeꞌaane totono laloku, pata kamaiꞌaku we Korintus itu hampano akiido amekakompeaha lalomiu.

²⁴ Koe fekihiomu insaodi tamosuhuangkoomu so neparasaeamiu, hampano notangkamo koehemiu weo kaparasaeamiu, tamaka gao mani dakumahadhaa dapoowa-owa so kaowulaꞌano lalomiu.