1 Yohanes 5 - Muna Southern Dialect

Kaparasaea notalo kawudhuno dhunia 5:1-5

¹ Mie marasaeano putae Yesus maitu Omputo Fosalamatino, mie aitu anaꞌinomo Lahataꞌala. Ane doasiꞌao amano ingka teteweimo dua doasiꞌao anaꞌino.

² Ane doasiꞌao Lahataꞌala bhe doangkafi sabhaha pahintano, ingka dopandeꞌaanemo aitu katandainomo doasiꞌao anaꞌino Lahataꞌala.

³ Kapaꞌamo ane doasiꞌao Lahataꞌala, maꞌanano doangkafi sabhaha pahintano, bhe pahintano Lahataꞌala miina naobhiea.

⁴ Kotika anaꞌino Lahataꞌala domondoiꞌe dotalo ⸤ kawudhuno⸥ dhunia. Dotaloane ae bhahaa? Ingka kaparasaeantoomu.

⁵ Laꞌae bhahaa tumalono ⸤ kawudhuno⸥ dhunia? Ingka mpahinomo mie marasaeano putae Yesus maitu Anano Lahataꞌala.

Sakusii motiwohano putae Yesus Anano Lahataꞌala 5:6-12

⁶ Yesus Kristus nomai we dhunia ini, nekadiu oe bhe hea. Anoa nohato miina kaowu naekadiu oe, tamaka nekadiu oe bhe hea. Sumakusiiane Rohino Lahataꞌala, kapaꞌamo Rohino Lahataꞌala miina nakopahaa.

^7-8 Kapaꞌamo sumakusiino nandoo tolu ise: Rohino Lahataꞌala, o oe bhe heano. Kotolu iseꞌae sehonda-honda nesakusiiꞌaondo.

⁹ Kasakusiindo manusia ingka doparasaeaꞌeomu, tamaka tantumo kasakusiino Lahataꞌala nofoliu dua kamatangkano. Ingka pedamo anaꞌa Lahataꞌala nosakusiiꞌao Anano.

¹⁰ Dadiꞌanomo sasuka marasaeano ne Anano Lahataꞌala, miinamo nopoibhahaane putae kasakusii amaitu nokotuꞌu. Tamaka mie tapa marasaeano ne Lahataꞌala kabeanga nokonamo Lahataꞌala nokopaha, mbaꞌinomo miina namarasaea kasakusiino Lahataꞌala so Anano.

¹¹ Kasakusii anaꞌa peda aini: Lahataꞌala nowaꞌa kaitamo dadi suhue dhamani, maka kamaiꞌaoꞌano dadi amaitu ingka o Anano.

¹² Mie tumahimano Anano Lahataꞌala detahimamo dadi; tamaka mie tapa tumahimano Anano Lahataꞌala miina daetahima dadi.

Dadi sakotuꞌuno suhue dhamani 5:13-21

¹³ Bhahi-bhahiꞌae ini abuhiangkoeꞌomu so hintimiu marasaeano ne Anano Lahataꞌala, neanomo mandeꞌaaneomu ingka meꞌawamoomu dadi suhue dhamani.

¹⁴ Intaodiomu dokado dofewise ne Lahataꞌala, hampano doparasaea ane desalo nopoangkafi bhe kapoindalono, tetewei nafofetingke.

¹⁵ Ane dopandeꞌaanemo Lahataꞌala sadhia nofetingke kamesalontoomu, ingka dopandeꞌaanemo dua o ae maka dua nemesalontoomu dotahimaemoomu.

¹⁶ Ane wohaomu bhahitiemiu nehabu dhosa tapa meowano mate, naetaa mesaloaneomu ne Lahataꞌala maka dadi aitu sumuli namaꞌane. Nepulaoꞌaoku ini o dhosa tapa meowano mate. Kapaꞌamo nandoo o dhosa meowano mate, so dhosa pedando ini miina apugauangkoomu sumambahaeꞌomu ne Lahataꞌala.

¹⁷ Kosasawiꞌae habu umala saneamo dhosa, ampamo kaowu nandoo o dhosa tapa mefosalino dadi suhue dhamani toka netahima.

¹⁸ Ingka dopandeꞌaanemo kosasawindo mie toka membalino anaꞌino Lahataꞌala, miinamo daehabu kansuhu dhosa. Andoa nodhaganida Anano Lahataꞌala sampe miina namafa-afaꞌianda Kafeompuꞌando seetani.

¹⁹ Ingka dopandeꞌaanemo intaodiomu ini fehebuaꞌano Lahataꞌala, tamaka kosekaꞌewaꞌae dhunia ini nokuasaiꞌe Kafeompuꞌando seetani.

²⁰ Dopandeꞌaanemo dua Anano Lahataꞌala padamo nomai we dhunia ini, nowaꞌa kaitaomu kapooli damandeꞌao Anoa banarano. Intaodiomu dodadi doseꞌise bhe Lahataꞌala, doseꞌise dua bhe Yesus Kristus, Anano. Anoamo itu Lahataꞌala sakotuꞌuno, Anoamo dua meowano dadi suhue dhamani.

²¹ Anaꞌiku, posiꞌondoomu ne sabhaha barahala!