1 Yohanes 4 - Muna Southern Dialect

Rohino Lahataꞌala bhe rohi kaewano Kristus 4:1-6

¹ Bhahitieꞌiku timoasiꞌaono! Koise pikiparasaeaꞌomua sabhaha mie mangakuno pugaundo nomaiꞌao ne Rohino Lahataꞌala. Udhieꞌomu kadeki bhahaꞌi rohino kotu-kotuꞌu nomaiꞌao ne Lahataꞌala bhahaꞌi miina. Kapaꞌamo ampa aitu dobhahimo mpahaana-anabiino dohato bhe dolili we dhunia ini.

² Nada aini so notipandeꞌaoꞌao bhahaꞌi rohi ne mie anaꞌa Rohino Lahataꞌala bhahaꞌi suano: sasuka mie mangakuno noparasaea Yesus Kristus nomai we dhunia ini peda seemie manusia, rohino mie aitu nomaiꞌao ne Lahataꞌala.

³ Sasuka mie tapa mangakuno noparasaea ne Yesus peda naꞌa, rohino mie aitu miina namaiꞌao ne Lahataꞌala tamaka nomaiꞌao ne rohi kaewano Kristus. Ingka fetingkeemoomu rohi pedando naꞌa daanumo tetewei namai, gahaꞌa ampa aitu nohatomo te dhunia ini.

⁴ Anaꞌiku! Hintimiu fehebuaꞌano Lahataꞌala, talodamoomu mpahaana-anabiino, hampano Rohino Lahataꞌala weo totono lalomiu nofoliuꞌe kuasano rohi weo totono lalondo miendo dhunia ini.

⁵ Mie mpahaana-anabiino maitu fehebuaꞌano dhunia; kanandooꞌanomo pugaundo pugauno dhunia, sampe miendo dhunia dofetingkee pugaundo.

⁶ Tamaka intaodiomu fehebuaꞌano Lahataꞌala, maka mie mandeꞌaono Lahataꞌala dofofetingke. Tamaka mie suano fehebuaꞌano Lahataꞌala miina dafofetingkea. Pedamo anaꞌa dopandeꞌaanemo poꞌalaꞌano Rohino Lahataꞌala bhe rohi fofekakolilinono.

Lahataꞌala maitu o kanini kaasi 4:7-21

⁷ Bhahitieꞌiku timoasiꞌaono! Pomoa-moasi kaitaomu kapaꞌamo kanini kaasi maitu nomaiꞌao ne Lahataꞌala. Kotika mie fomoasiꞌaono anaꞌinomo Lahataꞌala bhe nopandeꞌao Lahataꞌala.

⁸ Mie tapa fomoasiꞌaono miina namandeꞌao Lahataꞌala, kapaꞌamo Lahataꞌala maitu o kanini kaasi.

⁹ Pedamo aini Lahataꞌala nofotiwohamo kanini kaasino ne intaodiomu, ingka notudu Anano kaenseemie nomai we dhunia ini, neanomo namangka ne Anoa daeꞌawaomu dadi.

¹⁰ Suano intaodiomu maꞌinduluno moasiꞌaono Lahataꞌala, tamaka Anoa fomoasiꞌaono sampe notudu Anano nembali kapopanga pometaaꞌaono manusia bhe Lahataꞌala, mosalinomo dhosantoomu. Ainiꞌaemo kanini kaasi sakotuꞌuno.

¹¹ Bhahitieꞌiku timoasiꞌaono! Ane wutono Lahataꞌala noasiꞌa kaitamo peda maitu, ingka tabeano intaodiomu tetewei dua dapomoa-moasiꞌao.

¹² Miinaꞌo bhe mohano Lahataꞌala, tamaka ane dapomoa-moasiꞌao, Lahataꞌala naseꞌise bhe intaodiomu maka kanini kaasino nasumangka weo totono lalontoomu.

¹³ Lahataꞌala padamo nowaꞌa kaita Rohino, katipandeꞌaoꞌanomo putae intaodiomu doseꞌise bhe Lahataꞌala bhe Lahataꞌala noseꞌise bhe intaodiomu.

¹⁴ Insaodi padamo tawoha Anano Lahataꞌala, maka tasakusiiane putae Anoa notudue Amano so Mosalamatino dhunia.

¹⁵ Mie umakuino putae Yesus Anano Lahataꞌala, ingka Lahataꞌala noseꞌise bhe anoa bhe anoa noseꞌisemo bhe Lahataꞌala.

¹⁶ Ingka dopandeꞌaane bhe doparasaeaꞌemoomu kanini kaasino Lahataꞌala ne intaodiomu. Lahataꞌala maitu o kanini kaasi. Mie dumadino weo kanini kaasi noseꞌise bhe Lahataꞌala bhe Lahataꞌala neate weo totono lalono.

¹⁷ Nahumato oleono kafobhotusiꞌa daokadoomu dapowise bhe Lahataꞌala, hampano dadintoomu we dhunia ini pedamo dadino Kristus. Ainiꞌaemo katandaino putae kanini kaasino Lahataꞌala nosangkamo weo totono lalontoomu.

¹⁸ Mie dumadino weo kanini kaasi, miina bhe kateꞌia. Kanini kaasi sumangkaꞌano nefosali sabhaha kateꞌi. Mie moteꞌino ingka doteꞌi kahukumuno Lahataꞌala. Dadiꞌanomo ane doteꞌi, nokomaꞌana kanini kaasino Lahataꞌala weo totono lalonto miinaꞌo nasumangkaa.

¹⁹ Intaodiomu ini dofomoasiꞌao, hampano Lahataꞌala paꞌindulumo nofomoasiꞌao.

²⁰ Ane bhe mugauno, “Aoasiꞌao Lahataꞌala,” tamaka nobansi bhahitieno, mie aitu nekabuangka. Ane mie miina naoasiꞌao bhahitieno newohano, nada amai bhahaa naoasiꞌao Lahataꞌala tapa newohano?

²¹ Pahinta netahimantoomu maiꞌao ne Kristus peda aini: sasuka moasiꞌaono Lahataꞌala tabeano naoasiꞌao dua bhahitieno.