1 Yohanes 3 - Muna Southern Dialect

Anaꞌino Lahataꞌala 3:1-10

¹ Fekihi kaitaomu kabhalano kanini kaasino Amantoomu ne intaodiomu sampe nofokonamo anaꞌino. Intaodiomu ingka daanumo anaꞌino Lahataꞌala, kanandooꞌanomo miendo dhunia ini miina dafopandeꞌao mbaꞌinomo miina damandeꞌao Lahataꞌala.

² Bhahitieꞌiku timoasiꞌaono! Aitu intaodiomu ini anaꞌino Lahataꞌala, tamaka nada amai wutonto ini mada kaowu, miinaꞌo dafofohatoanea. Ampamo kaowu dopandeꞌaaneomu nahumato Kristus namotiwoha toha Wutono, dapototomoomu bhe Anoa, kapaꞌamo ne naꞌa damohaomu wutono Kristus peda katuno sakotu-kotuꞌuno.

³ Sasuka mie posahunaꞌaono ne Kristus peda anaꞌa, namekangkilo dadino maiꞌao ne sabhaha dhosa, pedamo wutono Kristus nongkilo.

⁴ Mie mehabuno dhosa nokangkalaꞌi pahintano Lahataꞌala, kapaꞌamo o dhosa ingka dokangkalaꞌi pahintano Lahataꞌala.

⁵ Ingka pandeꞌaanemoomu Kristus nomai notolosi dhosando manusia, Anoa miina nakodhosaa.

⁶ Dadiꞌanomo mie seꞌiseno bhe Kristus miinamo naehabu kansuhu dhosa. Sasuka mehabuno kansuhu dhosa miina namoha bhe namandeꞌao Kristus.

⁷ Anaꞌiku! Koise kaangka-angkaomu ne mie so mekakolilinono totono lalomiu. Mie dhumalangino kapoindalono Lahataꞌala, anoamo itu mie banara, pedamo wutono Kristus nobanara.

⁸ Tamaka mie mehabuno kansuhu dhosa anaꞌinomo Kafeompuꞌando seetani, kapaꞌamo ingka Kafeompuꞌando seetani nokodhosa mpini kabhao-bhaono. Ainimo patudhuno Anano Lahataꞌala nomai, so namobinasaꞌao sabhaha habuno Kafeompuꞌando seetani.

⁹ Mie toka membalino anaꞌino Lahataꞌala miinamo daehabu kansuhu dhosa, hampano sifatino Lahataꞌala neatemo weo totono lalondo. Andoa pae bhe kapoolia dehabu kansuhu dhosa, kapaꞌamo dembalimo anaꞌino Lahataꞌala.

¹⁰ Mie tapa mangkafino kapoindalono Lahataꞌala bhe tapa moasiꞌaono bhahitieno, suano anaꞌino Lahataꞌala. Ainiꞌaemo poꞌalaꞌano anaꞌino Lahataꞌala bhe anaꞌino Kafeompuꞌando seetani.

Pomoa-moasiꞌao katandainomo dadi buꞌou 3:11-18

¹¹ Ingka fetingkeemoomu bhihita nefosampe mpini pakaparasaeamiu putae tabeano dapomoa-moasiꞌao.

¹² Koise dembaliomu peda Kain, o anano Kafeompuꞌando seetani sampe nopongko aino wutono. Noafa katipongkoꞌano? Dhohono habuno sanea habu modai, tamaka habuno aino sanea habu metaa.

¹³ Bhahitieꞌiku, koemo menteomua ane mieno dhunia dabansikoomu.

¹⁴ Ingka dopandeꞌaanemoomu, intaodiomu ini kao-kaomo dogampiomu maiꞌao ne mate, dopesuaꞌomu ne dadi. Katipandeꞌaoꞌano mbaꞌinomo doasiꞌao bhahitieꞌintoomu. Mie tapa moasiꞌaono bhahitieno sadaa-daaꞌe nokuasaiꞌe mate.

¹⁵ Mie bansino bhahitieno nopototomo nofopongko, maka ingka dopandeꞌaane mie fopongkono miina bhe dadi suhue dhamani weo totono lalono.

¹⁶ Dopandeꞌaaneomu maꞌanano kanini kaasi, hampano Kristus nopotahoꞌao inawano so intaodiomu. Dadiꞌanomo intaodiomu tabeano dua dahumelasi dapotahoꞌao inawanto so bhahitieꞌintoomu.

¹⁷ Ane seemie dumadino weo kanandoo, nowoha bhahitieno nokae tamaka notiꞌonto totono lalono, nokiido natumulumie, nada amai gahaꞌa kanini kaasino Lahataꞌala naeate weo totono lalono?

¹⁸ Anaꞌiku! Koise dofomoasiꞌao ne pugaunto tawa ne wiwinto kaowu, tamaka tabeano kotu-kotuꞌu nakoꞌula ne habunto.

Katohopono lalo dofewise ne Lahataꞌala 3:19-24

¹⁹ Ane dopomoa-moasiꞌao dopandeꞌaanemoomu intaodiomu mieno kabanara, dadiꞌanomo totono lalontoomu natumohopo dua weo dadinto ne wiseno Lahataꞌala.

²⁰ Ane totono lalonto nofoꞌala kaita ⸤ hampano habu modai⸥ , ingka dopandeꞌaane Lahataꞌala nofoliuꞌe kabhalano totono lalonto, kapaꞌamo Lahataꞌala nopandeꞌaane bhahi-bhahiꞌae.

²¹ Bhahitieꞌiku timoasiꞌaono! Ane paemo namoꞌala kaita totono lalonto, maka tetewei daokado dua dadumoli ne Lahataꞌala.

²² Ane nada naꞌa, o ae maka nemesalonto tetewei daꞌumawae, hampano deangka ne pahintano Lahataꞌala bhe dehabu posahataaꞌano bhe lalono.

²³ Pahintano peda aini: damarasaeaꞌomu ne Yesus Kristus Anano Lahataꞌala, bhe dapomoa-moasiꞌao pedamo dua pahintano Kristus ne intaodiomu.

²⁴ Mie mangkafino pahintano Lahataꞌala dodadi doseꞌise bhe Lahataꞌala, Lahataꞌala noseꞌise bhe andoa. Katipandeꞌaoꞌano Lahataꞌala noseꞌise bhe intaodiomu, hampano padamo nofowaꞌao Rohino.