1 Yohanes 2 - Muna Southern Dialect

Kristus Fopotunduꞌaono 2:1-6

¹ Anaꞌiku, abuhiangkoomu bhahi-bhahiꞌae ini keana mehabuomu dhosa. Ampamo kaowu ane bhe mehabuno dhosa, nandoomo bhe so potunduꞌa kaita ne Lahataꞌala, Anoamo Yesus Kristus umadhilino.

² Kristus nembalimo kapopanga pometaaꞌaono manusia bhe Lahataꞌala, mosalinomo dhosantoomu. Bhahamoa suano kaowu dhosantoomu, tamaka dhosando manusia kosedhuniaꞌae ini.

³ Ane deangkaomu ne pahintano Lahataꞌala, ingka o katandainomo dopandeꞌaoꞌomu Lahataꞌala.

⁴ Ane seemie nopugau nopandeꞌao Lahataꞌala gahaꞌaitu miina naeangka ne pahintano, mie aitu nekabuangka, maka kabanara miina naeatea weo totono lalono.

⁵ Tamaka mie mangkafino bhoasaono Lahataꞌala, nosangkamo kanini kaasino ne Lahataꞌala. Aitumo katandaino dodadi doseꞌise bhe Lahataꞌala.

⁶ Laꞌae mugauno nodadi noseꞌise bhe Lahataꞌala, tabeano nadumadi namangkafi sandahano dadino Yesus Kristus.

Pahinta buꞌou: dapomoa-moasiꞌao 2:7-17

⁷ Bhahitieꞌiku timoasiꞌaono! Nebuhiku so hintimiu ini suano pahinta buꞌou, tamaka pahinta ngkodau toka nefetingkemiu notanda parasaeaꞌomu ne Kristus. Pahinta ngkodau ini bhoasaono Lahataꞌala nefosampe ne hintimiu endefiꞌini.

⁸ Ampamo kaowu pahinta nebuhiku ini naembali dua dakumonae nobuꞌou, kapaꞌamo kakotuꞌuno notiwohamo ne wutono Kristus bhe ne hintimiu. Ingka aitu o kahohondo dhulumo kasali, tilanga sakotuꞌuno notiumbamo.

⁹ Laꞌae pugauno neate ne mentaleaꞌano tamaka nobansi bhahitieno, mie aitu sadaa-daaꞌe neate weo kahohondo.

¹⁰ Laꞌae moasiꞌaono bhahitieno, neate ne mentaleaꞌano, maka pae bhe kapoolia naehabu kakodhosaꞌa mie bhaindo.

¹¹ Tamaka mie bansino bhahitieno, neate weo kahohondo bhe nekala-kala weo kahohondo. Anoa miina namandeꞌaanea bhahaꞌi nohope ne amai, hampano miinamo napomboha-mbohaa.

¹² Hintimiu membalino anaꞌi, aebuhiangkoomu peda aini kapaꞌamo dhosamiu notiꞌamponimo hampano Kristus.

¹³ Hintimiu membalino ama, aebuhiangkoomu peda aini hampano ingka pandeꞌaanemoomu ⸤ Kristus⸥ ndumandoono mpini kabhao-bhaono. Hintimiu kahangku dadi, aebuhiangkoomu peda aini hampano taloemoomu Kafeompuꞌando seetani.

¹⁴ Hintimiu membalino anaꞌi, aebuhiangkoomu hampano pandeꞌaanemoomu Amantoomu. Hintimiu membalino ama, aebuhiangkoomu hampano pandeꞌaanemoomu ndumandoono mpini kabhao-bhaono. Hintimiu kahangku dadi, aebuhiangkoomu hampano moꞌosaomu bhe bhoasaono Lahataꞌala neate weo totono lalomiu bhe taloemoomu Kafeompuꞌando seetani.

¹⁵ Koise moasiꞌaoꞌomu dhunia ini bhe sabhaha kanandoono, kapaꞌamo laꞌae moasiꞌaono dhunia, miina bhe kanini kaasino ne Amantoomu weo totono lalono.

¹⁶ Kanandoono dhunia ini tanofegiu, peda kapoindalono mbadha, kapoindalo damalaꞌi sabhaha newoha, bhe sabhaha giu kaelangkeꞌa diu. Kosasawiꞌae ini miina namaiꞌao ne Amantoomu tamaka nomaiꞌao ne dhunia.

¹⁷ Dhunia bhe sabhaha kanandoono nepoindalono manusia dhulu kasali, tamaka mie mangkafino kapoindalono Lahataꞌala nadumadi suhue dhamani.

Kaewano Kristus 2:18-29

¹⁸ Anaꞌiku, pandano dhamani nomaꞌomo! Ingka padamo fetingkeeꞌomu putae mada kaowu natiumba seemie nekonando Kaewano Kristus. Gahaꞌa ampa aitu dobhahimo membalino kaewano Kristus. Dadiꞌanomo dopandeꞌaanemo nomaꞌomo pandano dhamani.

¹⁹ Andoa mewangino Kristus maitu daanumo domaiꞌao ne olotantoomu, tamaka sakotuꞌuꞌano suano mientoomu. Kapaꞌamo ane kotu-kotuꞌu mientoomu, teteweimo sadaa-daa dapobhai bhe intaodiomu. Tamaka limbando maitu somo notiwohaꞌao putae kosasawindo maitu suano sabhangkantoomua.

²⁰ Tamaka hintimiu miina nada anaꞌa, ingka metahimamoomu Rohino Lahataꞌala maiꞌaono ne Kristus, dadiꞌanomo kosasawimiu losangiemoomu kabanara.

²¹ Abuhiangkoomu aini suano mbaꞌinomo miina mandeꞌaoꞌomu kabanara, tamaka hampano pandeꞌaanemoomu. Ingka pandeꞌaanemoomu dua miina bhe pahaa maiꞌao ne kabanara.

²² Laꞌae bhahaa kopahano naꞌa? Ingka o mie gumagaino putae Yesus suano Omputo Fosalamatino nedhandiꞌaono Lahataꞌala. Mie amaitu o kaewano Kristus, nokiido naꞌumakui Amantoomu bhe Anano.

²³ Mie tapa mangakuno noparasaea ne Anano Lahataꞌala, miina dua naseꞌise bhe Amano. Mie mangakuno noparasaea ne Anano Lahataꞌala, tetewei dua noseꞌisemo bhe Amanoa.

²⁴ Dadiꞌanomo hintimiu, dhaganieꞌomu mpuu bhihita toka nefetingkemiu mpini pakaparasaeamiu weo totono lalomiu. Ane nefetingkemiu naꞌa sadaa-daaꞌe weo totono lalomiu, maka hintimiu sadaa-daaꞌe seꞌiseomu bhe Anano Lahataꞌala bhe Amantoomu.

²⁵ Maka nepodhandiꞌaono wutono Kristus ne intaodiomu, ingka o dadi suhue dhamani.

²⁶ Bhahi-bhahiꞌae ini abuhiangkoeꞌomu apulaoꞌao mie mesoba-sobano damekakolilino totono lalomiu.

²⁷ Tamaka hintimiu, Kristus ingka padamo nofosampuangkoomu Rohino weo totono lalomiu. Dadiꞌanomo miina namaraluua damoinaꞌukoomu mie sigaoꞌano. Rohino Kristus nofoinaꞌuangkoomu bhahi-bhahiꞌae bhe kafoinaꞌuno nokotuꞌu, suano wamba kabuangkaa. Dadiꞌanomo dadiomu weo kaseꞌise bhe Kristus, peda toka nefoinaꞌuꞌaono Rohino naꞌa.

²⁸ Dadiꞌanomo anaꞌiku, dadi seꞌiseomu bhe Kristus neanomo humato namotiwoha toha Wutono, daokado dapoꞌawaane, paise daꞌumukoꞌao kaambano ne oleo kahatoꞌano.

²⁹ Ingka pandeꞌaanemoomu, Kristus nodadi noangkafi kapoindalono Lahataꞌala. Dadiꞌanomo tabeano mandeꞌaaneomu dua putae sasuka mangkafino kapoindalono Lahataꞌala, ingka anaꞌinomo Lahataꞌala.