1 Yohanes 1 - Muna Southern Dialect

Bhoasao Fofodadino 1:1-4

¹ Bhoasao Fofodadino, toka ndumandoono mpini kabhao-bhaono, aituꞌaemo nefosampe ne suha aini. Insaodi padamo tafetingkee, padamo dua tawohaane wuntano mata mani. Padamo taꞌondoe ulano bhe padamo tadampasiane lima mani.

² Dadi anaꞌa nofotiwohamo Wutono, insaodimo mohae, kanandooꞌanomo tasakusiiane. Nefohatoꞌao mani ne hintimiu ini, ingka Anoamo dadi suhue dhamani, pobhaino bhe Lahataꞌala, madano motiwohano Wutono ne insaodi.

³ Madano newoha bhe nefetingke mani maitu, aituꞌaemo dua nefosampe mani ne hintimiu. Patudhu mani neanomo hintimiu seꞌiseomu bhe insaodi. Kaseꞌisentoomu naꞌa o dadi dua weo kaseꞌise bhe Lahataꞌala bhe Yesus Kristus, Anano.

⁴ Bhahi-bhahiꞌae ini tabuhiangkoeꞌomu so nosangkaꞌao kawulano lalontoomu.

Lahataꞌala maitu o tilanga 1:5-10

⁵ Ainimo bhihita nefetingke mani ne Yesus Kristus bhe nefosampe mani ne hintimiu: Lahataꞌala maitu o tilanga, ne Lahataꞌala miina sepaliꞌa bhe kahohondoa.

⁶ Ane ambantoomu dodadi doseꞌise bhe Anoa, gahaꞌa dodadi weo kahohondo, ingka dokopahaomu bhe habuntoomu miina namangkafi kabanara.

⁷ Tamaka ane dodadiomu ne mentaleaꞌano peda Anoa dumadino weo tilanga, ingka doseꞌisemoomu bhe mie bhaintoomu, maka heano Yesus, Anano Lahataꞌala, nofekanggela kaitaomu maiꞌao ne sabhaha dhosa.

⁸ Ane ambantoomu miina dakodhosaomu, ingka dobhohe-bhoheꞌimo wutontoomu bhe kabanara miina naeatea weo totono lalontoomu.

⁹ Tamaka ane domangakuꞌao dhosantoomu ⸤ ne wiseno Lahataꞌala⸥ , teteweimo naꞌumamponie sabhaha dhosantoomu bhe namekanggelaꞌie sabhaha diu modaintoomu. Kapaꞌamo Lahataꞌala nokampuu-mpuu ne dhandino bhe noꞌadhili.

¹⁰ Ane ambantoomu miina daehabuomu dhosa, ingka kabeanga dokonaomu Lahataꞌala nokopaha bhe bhoasaono miina naeatea weo totono lalontoomu.