1 Timotius 6 - Muna Southern Dialect

¹ Miendo sarani membalino bhatua, tabeano namabhi kafeompuꞌano mie mantasino meꞌawano kafosibhala, keana neano Lahataꞌala bhe kafoinaꞌuntoomu damekaꞌaebue mie.

^2a Ane kafeompuꞌano mieno sarani dua, koe nofekandidikie hampano kapobhahitiendo weo Ompu. Bhahamoa tanadhumulu kataano kaꞌondofaono bhatua anaꞌa, kapaꞌamo kafeompuꞌa mehapino kaꞌondofaono maitu, ingka mie marasaeano timoasiꞌaono dua.

Kafoinaꞌu tapa kumotuꞌu bhe kahangkaea sakotuꞌuno 6:2b-10

^2b Kosasawiꞌae nebuhiku ini tetewei fofoinaꞌuane bhe fotangahiane.

³ Ane nandoo fofoguhuꞌaono kafoinaꞌu poꞌalatiꞌano bhe kafoinaꞌu aini, maꞌanano miina namangkafiea kafoinaꞌu kumotuꞌuno maiꞌao ne Ompuntoomu Yesus Kristus bhe kafoinaꞌuno agamantoomu,

⁴ mie medando aitu nelangke diuno, gahaꞌaitumo miina nakonipandeꞌaoa. Ingka o sakinomo dua gaono mpuu sapotagali bhe mie bhaino, noꞌondofie mpuu pokelutiꞌano wamba, sampe nonandoo kakonduano lalo, powengke-wengkeꞌa, poꞌumbu-umbu, dukuno lalo tapa metaa,

⁵ bhe posala-salamaꞌana tapa mopoopulino. Fekihindo mie medano anaꞌa nodaimo mpuu, miinamo damangkafi kumotuꞌuꞌano. Kunaꞌendomo agama maitu naeowaanda kahangkaea.

⁶ Daanumo agama neowa kahangkaea bhalano ane notumpumo lalondo ne kanandoo netahimando.

⁷ Kapaꞌamo dohato we dhunia ini miina dakoniwowoꞌoa, pedamo dua dakumala pae dakoniwowoꞌoa.

⁸ Dadiꞌanomo nonandoo kaowu nehumaa bhe pakea ingka netaamo.

⁹ Mie meꞌambano kahangkaea nehimbamo notiwudhu ne modaiꞌano, kao-kaomo nokonamo ne tandono sabhaha kapoindalo sia-sia bhe fodai-daino. Kapoindalo medando ini mobinasano bhe motonduno manusia.

¹⁰ Kapaꞌamo ane dofeompu ne dhoi ingka katandaꞌanomo sabhaha modaiꞌano. Nandoo mie meꞌambano dhoi sampe dopingkamo maiꞌao ne kaparasaeando maka totono lalondo dosikisaaꞌane sabhaha kasabha.

Kasongkono suha 6:11-21

¹¹ Tamaka hintu manusia fehebuaꞌano Lahataꞌala, fekakodoꞌo wutomu ne kosasawiꞌae naꞌa. Ambae dadi banara, dadi lumebe, kampuu-mpuu weo kaparasaeamu, moasianda mie bhaimu, kosabaha potaami weo kasabha, fekamalu lalomu.

¹² Uleiꞌe lalomu weo dadimu peda seemie sarani metaano, tapedamo pogolono, neanomo moolie dadi sakotuꞌuno ampa suhue dhamani. Ingka ainimo katibhasiꞌamu ne Lahataꞌala, wakutuuno kosuahaane ne wiseno umati putae parasaeamo mpuu ne Kristus bhe dobhahi sumakusiiangko.

¹³ Aitu, ne wiseno Lahataꞌala maꞌaono dadi ne sabhaha ndumandoono, ne wiseno dua Kristus Yesus mada sumakusiiꞌaono kabanara ne Pontius Pilatus, aefeꞌulaiangko:

¹⁴ Angkafi sabhaha pahinta aini, koe bhe nekaemimua, koe bhe moꞌalatikoa, ampa ne oleo so kahatoꞌano Ompuntoomu Yesus Kristus.

¹⁵ Kahatoꞌano naꞌa nakoꞌula ne tempo toka nefotantuno wutono Lahataꞌala. Anoamo Kaseemie-mieꞌano kokuasano, foliuno kakalabhia, kolakindomo sabhaha kolaki, kafeompuꞌandomo sabhaha kafeompuꞌa.

¹⁶ Anoamo Kaseemie-mieꞌano tapa nekuasaino mate, neate weo tilanga tapa tiꞌowatiꞌano. Bhe naseemie manusia miina bhe mohaea, daanumo pae bhe kapooli damohaea. Ne Anoamo kafosibhala bhe kuasa suhue dhamani! Amin.

¹⁷ Ne mie hangkaea we dhunia ini mefeꞌulaianda, koise nelangke diundo, koise doposahunaꞌao ne bara pata titangkaꞌaono peda kahangkaea. Tamaka mefeꞌulaianda daposahunaꞌao ne Lahataꞌala, tapa megana-ganano nofowaꞌao sabhaha kafaraluuntoomu so kaetaaꞌano namisintoomu.

¹⁸ Mesaloida dahumabu metaa, dahumangkaea weo podiu metaa, nahumelasi lalondo dafowaꞌao bhe dafotulumi.

¹⁹ Ane nada naꞌa ingka kao-kaomo defoꞌonumo kahangkaea te surugaa so we oleo mbuhumai, bhe daeꞌawa dua dadi sakotuꞌuno suhue dhamani.

²⁰ Hintu, Timotius, dhagani metaaꞌe kafoinaꞌu toka neposahunaꞌao ne hintu. Fekakodoꞌo wutomu ne sabhaha pugau tapa kofahalaa bhe tapa mongkilo. Fekakodoꞌoe dua wutomu ne mie potaga-tagaliꞌaono nekonando kapande, gahaꞌa suano.

²¹ Kapaꞌamo nandoo seemie hodua dokona wutondo dopande sampe dekapingkamo maiꞌao ne kaparasaeando ne Kristus. Sio-siomo kabarakatino Lahataꞌala napobhaiangko!