1 Timotius 5 - Muna Southern Dialect

Katangahi so kaꞌondofaono dopobhahi-bhahitie 5:1-2

¹ Koise noꞌosa lalomu ne kamungkulaꞌi moꞌane, tamaka mefeꞌulaianda pototoanda bhe amamu. Moꞌane mohangkuꞌano dadi pototoanda bhe kakutaꞌamu.

² Kamungkulaꞌi hobhine pototoanda bhe inamu; hobhine mohangkuno dadi pototoanda dua bhe kakutaꞌamu, namaiꞌao ne fekihimu mongkilono.

Katangahi so kaꞌondofaono bhihinanda 5:3-16

³ Fosibhalada bhihinanda dumadino weo kakae samoi-moisano.

⁴ Tamaka ane seemie bhihinanda koanano koawuano, netaa mefeꞌulaianda putae andoamo kadeki so umondofaono lee walakando. Pedamo anaꞌa dameompu ne Lahataꞌala bhe dabhoosi kawulendo kamungkula bhe awuando. Habu medando ini pokantibhaꞌano bhe kapoindalono Lahataꞌala.

⁵ Bhihinanda dumadino weo kakae samoi-moisano, mpahinomo Lahataꞌala neposahunaꞌaonoa. Mentae mohondo nokampuu-mpuu nosambahea bhe nekatondala.

⁶ Tamaka ane seemie bhihinanda gaono nadumadi namangkafi namisino, ingka nomatemo wawo mahingga nandoo nodadi.

⁷ Dadiꞌanomo mefeꞌulaianda neanomo dadindo pae nakodengo-dengoa.

⁸ Ampamo kaowu ane nandoo tapa umondofaono bhahitieꞌino, mangkenomo mie weo lambuno, ingka mie aitu nokukundoemo kaparasaeano, nodaimo dua anoa bhe mie tapa marasaeanoa.

⁹ O mie so mesuano weo kabuhino neando bhihinanda, mpahinomo koꞌumuhuno te wawono nomo fulu taꞌu bhe komoꞌaneno sepaku kaowu.

¹⁰ Weo dadino tabeano notiende-ende o hobhine humabu metaano, ibahano padamo nofekabhala metaada anaꞌino, nolalesa lalono nefotiampe mie ne lambuno, noꞌondofao umati marasaeano peda seemie kantudu-ntudu, netulumi mie mosabha, tangkanomo nokampuu-mpuu nohabu metaaꞌano.

¹¹ Bhihinanda kahangku dadi, koise fopesuada weo kabuhi naꞌa, kapaꞌamo ane sewakutuu namaiꞌida nafusuu, gaondo dagumaa toha maka dakumukundo Kristus.

¹² Ane nada kaowu anaꞌa andoa deowa kahukumu so wutondo, hampano dofosalimo dhandido ne Kristus.

¹³ Pakademo dua, andoa ini domantawa, tadelili-lilimo doala seꞌonue lambua. Suano kaowu anaꞌa, maka dopandemo dua doꞌumbu bhaindo, desampuru urusundo mie bhaindo bhe detula-tulaꞌao sabhaha tapa mantasiꞌano.

¹⁴ Dadiꞌanomo gaoku bhihinanda kahangku dadi dagumaa toha, dakoana maka daꞌumatoro polambudo, neanomo kaewantoomu pae datolalaa damekabuhu neantoomu.

¹⁵ Kapugauꞌaku peda ini, nandoomo bhihinanda kolilinono fekihi sampe doangkafimo Kafeompuꞌando seetani.

¹⁶ Ane seemie hobhine marasaeano ne Kristus, bhe bhahitieno nobhihinandamo, naetaa naꞌumondofaane keana nembali wowoꞌondo umati bhahino. Dadiꞌanomo umati daꞌumondofao kaowu bhihinanda dumadino weo kakae samoi-moisano.

Katangahi sigaoꞌano 5:17—6:2 a

¹⁷ Neangkando umati kumahadhaa metaano, nopantasi naetahima kafosibhala bhe ponambo metaa, mangke-mangkemo andoa umuleino lalondo defosampe bhoasaono Ompu bhe dofofoinaꞌu.

¹⁸ Ingka weo Kitabi notibuhi peda ini, “Ane o sapi tangasano nefinda-findaꞌi gandum so napogaatiꞌao onuno bhe kunsalono, nunsuno koemo kakompoea.” Nandoo dua tibuhino peda ini, “Mie kumahadhaa nopantasi naꞌumawa ponambono.”

¹⁹ Koise metahima kasangkati ne seemie neangkando umati, ane pae bhe sakusiino dahodua totolu so mekamatangkae.

²⁰ Mie mehabuno dhosa tabeano mefeꞌulaiane ne wisendo umati bhahino, neanomo sigaoꞌano daoteꞌimo.

²¹ Aitu aefeꞌulaiangko, ingka bhe wutono Lahataꞌala bhe Kristus Yesus bhe malaꞌekatino tipilino mandeꞌaane: angkafie sabhaha kafoinaꞌu aini, koe poꞌala-alaanda miea, koe dua nobhie seweta weo timbangimua.

²² Koise nehimba fotei limamu te wawondo mie ⸤ so membalino neangkando umati⸥ ; koise dua kaangka-angka ne dhosando mie bhaimu. Dhaganie kangkilono totono lalomu.

²³ Koise fohoꞌu kaowu oe melaa, mepake dua bhe angguru seendai hampano nentela nolea handamu bhe mansosaki.

²⁴ Dhosando mie sigaꞌa nentaleamo dopandeꞌaane mahingga miinaꞌo datibhitahaki, tamaka sigaoꞌano nopalusi dobhitahakida maka notipandeꞌao.

²⁵ Pedamo dua habu metaa lasao notiwoha, tamaka ane miina napikitiwoha, tetewei pae natifebuni kansuhua.