1 Timotius 4 - Muna Southern Dialect

Mie mpahaguru-guruno 4:1-5

¹ Rohino Lahataꞌala pada nofofohato fotinda-tindae, mada kaowu ne dhamani mbuhumai nandumandoo mie so humunsano kaparasaeando maka damangkafi rohi modai fokolilinono bhe kafoinaꞌundo seetani.

² Kafoinaꞌu anaꞌa dofolelee mie mehaaꞌulano. Andoa miinamo damande dapofelesaoꞌao metaaꞌano bhe modaiꞌano, kao-kaomo totono lalondo kumatanga-tangano dofodapaanemo uti ngkamala-mala.

³ Andoa deꞌeleꞌao mie dagumaa bhe ambado nandoo oti so pata membaliꞌano daomaaꞌe. Gahaꞌaitumo oti amaitu nofokonandooꞌe Lahataꞌala so daomaa mie marasaeano ne Kristus bhe toka mandeꞌaono kabanara, poangka damoampe katumpuno lalondo.

⁴ Kapaꞌamo bhahi-bhahiꞌae nefokonandoono Lahataꞌala netaa, bhe naseꞌise miina bhe moharamuꞌano, sumanomo dotahimae weo katumpuno lalo.

⁵ Hampano bhahi-bhahiꞌae naꞌa nofekangkiloemo bhoasaono Lahataꞌala bhe sambahea.

Palima-limano Kristus kumahadhaa metaano 4:6-16

⁶ Ane kosasawiꞌae ini sadhia meꞌulaiandae bhahitieꞌintoomu, hintu membalimo seemie palima-limano Kristus Yesus kumahadhaa metaano, poowa mekanowu totono lalomu, hampano hewutiane bhoasaono Lahataꞌala neparasaeantoomu bhe kafoinaꞌu kumotuꞌuꞌano toka neangkafimu kaomponae ini.

⁷ Fogampie tingalamu ne sabhaha tula-tula sia-sia bhe kapu-kapunando kamungkula ngkehu. Ulei lalomu kaneaꞌe wutomu so dadi lumebeno.

⁸ Dokane-kanea mbadha ⸤ so doꞌosaꞌao⸥ bhe hatoꞌano fahalaano, tamaka dokanea wuto dodadi lumebe miina nakotompaa fahalaano, kapaꞌamo naeowa dadi te dhunia ini bhe dadi we suliꞌa peda dhandino Lahataꞌala.

⁹ Nokotuꞌu mpuu bhoasao aini, dadiꞌanomo nopantasi mpuu datumahimae bhe damarasaeaꞌe.

¹⁰ Kanandooꞌanomo intaodiomu ini doꞌulei lalontoomu dokahadhaa moꞌosa hampano doposahunaꞌao ne Lahataꞌala dumadino. Anoa mosalamatino kosasawindo manusia, mangke-mangkemo mie marasaeano ⸤ ne Kristus⸥ .

¹¹ Tangahida bhe foinaꞌuandae kosasawiꞌae pahinta aini.

¹² Koise bhe misakiko mbaꞌinomo nandoo nohangku dadimu. Tamaka membalimo sandaha so neangkafindo mie marasaeano, weo pugaumu, weo podiumu, weo kanini kaasi ne mie bhaimu, weo kaparasaeamu ne Kristus Yesus bhe weo kangkilono dadimu.

¹³ Sampe ahumatoko, fotuhu-tuhue lalomu mebasa Kitabi so mie bhaimu, fowanu umatino Lahataꞌala bhe foinaꞌuda.

¹⁴ Koise molimpuꞌao pakee kapooli kawaꞌaono Rohino Lahataꞌala, neꞌawamu wakutuuno nandoo kaowilino Lahataꞌala nefosampendo ana-anabii, bhe kamungkulaꞌindo umati dotei limando te fotumu.

¹⁵ Dhalangie mpuu bhahi-bhahiꞌae naꞌa bhe fintahakie, neanomo sabhaha mie damohae dadimu dhulu kataa.

¹⁶ Dhagani wutomu, dhaganie dua kafoinaꞌumu. Mpuu-mpuunie bhahi-bhahiꞌae naꞌa, kapaꞌamo ane moolie ingka mosalamatimo wutomu bhe kosasawindo mie metingkeko.